Мегааферата „Рекет“ јасно и недвосмислено ги потврдува оценките дека постои спрега помеѓу центрите на моќ, политичкото и бизнис-подземјето, како и мафијата, која е сè подобро организирана и присутна во Македонија, велат од Демократскиот сојуз.

„ДС критички ја опсервира работата на правосудните органи и се залага за нивна самостојност и одговорност во извршувањето на обвинителската и судската дејност. Демократскиот сојуз постојано се залага за генерален реизбор на обвинителите и судиите, како и коренити реформи во поставеноста на судскиот систем, изборот и обуката на судиите, градење механизми за незавизност, двостепеност на постапките, развиен и објективен контролен механизам над судиите и слично“, се вели во соопштението.

Целокупното наше залагање, додаваат од партијата, е да имаме високопрофесионални, одговорни и добро платени судии со висок професионален и морален интегритет.

„Цврсто сме определени политичарите, особено извршната власт, да не се меша во работата на судовите. Без реформи во судството, нема владеење на правото и во право е обвинителката Русковска – нема ниту влез во Европската Унија“, велат од ДС.

Во последните година дена, откако почнав да ги обелоденувам катастрофалните политики на СДСМ во земјоделието станав трн во око за фамилијата Заеви, обелодени на прес-конференција Цветан Трипуновски, член на ИК на ВМРО-ДПМНЕ.

Како што кажа тој, најпрво бил избркан од работа, а потоа се барале начини и трајно да биде замолчан.

„На неколку наврати ми беа испраќани провокатори кои сакаа да ме предизвикаат на физичка пресметка. Не подлегнав. Во последните месеци засилено работеа на изнаоѓање начин како да ми измислат и натоварат дела и да ми подигнат лажно обвинение, како наместо по комитетида ме влечат по судови“, рече претставникот на опозициската партија и додаде дека подолг период во фиока во МВР стои изготвена фингирана кривична пријава против него.

Како што кажа, овие информации дошле до него од укажувачи, кои се загрижени во кој правец се движи државата.

„Правна држава не постои сè додека на власт е Заев и фамилијата. Заев го претвори животот на Македонецот во пекол. Дури и затворот е поблага форма на измачување од пеколот кој Заев им го приредува на граѓаните секој ден“, порача Трипуновски и додаде дека попусти се сите обиди за заплашување, уцени и закани бидејќи тој ќе остане рамо до рамо со земјоделците и ќе се бори за нивните права.

Потпретседателката на СДСМ, Мила Царовска, ги продолжи средбите со граѓаните и разни целни групи. Денеска, на средба со Ромите од населбата Ѓорче Петров, Царовска порача дека реформите што ги реализира СДСМ во социјалата директно влијаат на подобрување на животот на над 300.000 граѓани

„Со социјалната реформа обезбедуваме повеќе пари за граѓаните, го враќаме достоинството и го креваме животниот стандард. Социјланата помош ја зголемивме над 300 отсто. Во споредба со претходно, 20 пати го зголемивме бројот на дечиња на кои сега им следува помош од државата. Конкретно, со новата социјалната реформа 22.374 деца земаат детски додаток, а 8.678 деца добиваат образовен додаток. Гарантиран минимален приход примаат 27.387 граѓани, а над 2.000 возрасни лица веќе користат социјална пензија“, рече Царовска.

Таа рече дека одлуката за покачување на пензиите од 900 денари, која, од друга страна, го следи растот на платите во државата, е најголемо покачување на пензиите досега и покажува вистинска грижа за постарите, но и за идните пензионери.

Царовска зборуваше и за предлог-законот за неевидентираните лица во Матичната книга на родените, со кој ќе го решат долгогодишниот проблем на неевидентираните граѓани.

„Овие наши граѓани премногу долго живееја на маргините на нашето општество. Со ова наше решение преточено во закон, кој веќе ја помина владината процедура, овозможуваме право на здравствена и социјална заштита и редовен работен однос. Нивните деца, конечно, ќе може да се вклучат во образованиот процес“, дополни таа.

На денешната средба со граѓаните од Ѓорче Петров се дискутира и за активните мерки за вработување, кои се дел од оперативниот план, за што оваа година се издвоени 1,1 милијарда денари.