Фамилијарните инсталации на ВМРО-ДПМНЕ во судството 11 години се спроведуваа, реагираат од СДСМ на обвинувањата дека вработувањата во СЈО се вршеле според роднински врски.

„ВМРО-ДПМНЕ, партијата симбол на непотизмот и партизацијата на институциите, особено во судството и нема никаков кредибилитет да зборува на оваа тема. Да ја потсетиме ВМРО-ДПМНЕ на дел од бројните случаи на непотизам. Ексминистерот за правда Михајло Маневски, кој и денес е дел од структурите на ВМРО-ДПМНЕ, заедно со неговата сопруга направија најголема ‘фамилијаризација’ на правосудните институции. Олгица Павловска –судиката во Основниот суд Штип, е прва братучетка на Филимена Маневска, сопругата на Михајло Маневски. Јово Вангеловски, кум на Трајко Вељановски, претседател на Собранието на РСМ , беше избран за претседател на Врховен суд.

Маја Маркова-Котевска, сопругата на Иво Котевски, портпарол на МВР е судија во Основен суд Скопје 2, ќерка на Љубинка Муратовска поранешен член на Врховен суд и актуелен член на антикорупциската комисија и сестра на Серјожа Марков, дежурен адвокат на фамилијата инсталирана во ВМРО-ДПМНЕ“, се вели во реакцијата.

ВМРО-ДПМНЕ, додаваат од таму, е изворот на срамниот непотизам и партизација.

„Покрај тоа што нема кредибилитет да зборува на темата, во јавноста шири и дезинформации и лаги. Потврда за тоа е наведувањето дека син на Игор Милев, кумашинче на Лиле Стефанова бил вработен во СЈО. Лаги од овој тип веднаш се проверуваат и потврдуваат, Игор Милев нема син. ВМРО-ДПМНЕ останува да биде заробена во матрицата на груевизмот, на лаги, измислици и вештачки креирани случаи“, велат од СДСМ.

Визијата на Граѓанско-демократската унија (ГДУ) за ограничување на моќта на владата и нејзините инструменти е втемелена како двигател на нашето политичко дејствување, рече претседателот на партијата, Петар Колев, на прес-конференција.

„Ние како политичка партија секогаш истакнуваме дека е неопходна промена на политичкиот систем, рационализација на државните органи, нивните надлежности, буџет и одговорност. Првиот чекор за тоа е реформа на целиот изборен процес како на национално така и на локално ниво, проследено со намалување на бројот на пратениците и нивните привилегии“, посочи тој.

Колев истакна дека ГДУ ја поздравува секоја искрена иницијатива која може да придонесе во таквиот процес.

Покрај огромните финансиски средства што си ги делеле вработените во СЈО помеѓу себе како додатоци, дневници, награди, фрапантни се податоците што дури сега излегуваат во јавноста, а се поврзани со личниот и партиски непотизам на СДСМ внатре во СЈО, рече денеска пратеничката на ВМРО-ДПМНЕ, Лилјана Затуроска, на прес-конференција.

Како што рече таа, СЈО била институција во која вработувањата се вршеле по три основи: ако сте роднина или близок на некој од обвинителите, ако сте роднина на функционер на СДСМ или добиете партиска препорака и ако сте дете на судија или обвинител кој треба да добие награда за послушност кон СДСМ и СЈО.

„Во изминатите години СЈО вршеше класично партизирање на своите редови со вработување членови на СДСМ, како и внуци, братучеди и други блиски и далечни роднини на самите обвинители, кои беа дел од тимот на Катица Јанева“, изјави пратеничката на ВМРО-ДПМНЕ.

Во продолжение таа наведе повеќе примери за кои посочи дека се класични показатели за партизација и непотизам во редовите на СЈО.

„Ефимија и Љупчо Чучурски, први братучеди на обвинителот Гаврил Бубевски.

– Андријана Ристоска, прва братучетка на обвинителката Ленче Ристоска.

– Обвинителката од СЈО, Лиле Стефанова, си го вработила своето кумашинче, кое случајно е и син на Игор Милев, близок соработник на Зоран Заев и член на ДИК по предлог од СДСМ од Радовиш.

– Елена Јосифовска, чија мајка Елизабета Јосифовска беше обвинител во СЈО.

– Владимир Миладиновски, внук на истата обвинителката Елизабета Јосифовска.

– Петре Бошков, вработен во СЈО, зет за прва братучетка на министерката Рената Дескоска.

– Ѓорге Делиџаков од Гевгелија, внук од сестра на Катица Јанева, вработен како економски приправник.

– Вработена во СЈО е и девојката на Лазар Јанев, син на Катица Јанева.

– Вработен беше и синот на врховната судијка Лидија Неделкова, Давид Неделков.

– Берниса Рахиќ, ќерка на директорот на затворот ‘Скопје, Есад Рахиќ.

– Ќерката на поранешниот директор на МЕПСО, Сашо Василевски, Марија Василевска.

– Синот на обвинителката Мира Ангелеска од Кичево, Стојан Ангелески.

– Ќерката на членот на Советот на јавните обвинители Коле Штериов, Теа Штериова.

– Близок роднина на Ахмед Рушити, судија во Апелација од Гостивар, Вулнет Рушити.

– На платниот список на СЈО е и Катерина Рамбабова, ќерка на кандидат за пратеник на СДСМ и ќерка на поранешен претседател на судот во Штип, Миланчо Рамбабов.

– Синот на судијата Лазар Ризов од Неготино.

– Во низата семејни вработувања е ќерката на Борис Тунџев, директор на Катастарот, Катерина Тунџева.

– Миле Трајковски, советник од редовите на СДСМ во Советот на Општина Крива Паланка.

– Катица Јанева призна исто така дека го вработила членот на СДСМ, Борче (Боки) Трајковски, лице осудено за измама, кое издржало една година затвор.

– Ѓорѓи Камчев, кој активно учествувал во протестите во организација на шарената револуција.

– Пане Нацев од Неготино, кој учествуваше во насилното демолирање и нагрдување државни и културни објекти, е дел од вработениите во СЈО.

– Ангажманот на Мирослав Грчев кој од СЈО е ангажиран да изготви вештачење за случајот Космос.

– Катица Јанева во СЈО си го вработила и шоферот од Основниот cyд во Гевгелија како личен шофер, а неговото име е Вили Јанев, случајно или не.

– Душко Димитреиески како возач во СЈО, сопруг на обвинителката Душица Димитриевска од ОЈО Гостивар, чиј зет за ќерка е Трајче Нешкоски, поранешен генерален секретар на СДММ“.

Со ова Затуроска ја заврши листата и порача дека токму од вакви причини Собранието е должно на македонската јавност да ѝ го обелодени досегашното функционирање на СЈО, кое требало да биде пример за институција имуна на партизација, непотизам и беззаконие.