„Со визија, со јасен план и со енергија, заеднички ќе продолжиме да градиме Делчево, град со кој сите се гордееме“, порача кандидатот за градоначалник на Делчево од СДСМ, Дејан Глинџарски.

Глинџарски, ја најави својата програма која се темели на современа инфраструктура, подобар живот и подобри можности за младите:

„Дом за стари лица „Сигурна старост“, Централен плоштад, катна гаража, регулација на речното корито на Брегалница, изградба на скејт парк, нов театар, бесплатен летен одмор за полуматуранти и бесплатна екскурзија низ Европа за матурантите, финансиска поддршка за првачиња и средношколци, се само дел од програмата“.

Глинџарски најави и нови улици, водоводи и канализации во сите населби, спортски терени, ревитализација на земјоделски патишта, како и поддршка за туризмот.

„Ова не се само зборови, ова е програма, ова е план. План што мора да се оствари. Ајде за силно, модерно и убаво Делчево“, порача Глинџарски.

Во обраќањето пред граѓаните, тој кажа дека ја продолжува работата и визијата на досегашниот градоначалник од СДСМ , Горан Трајковски.

„Со неговата работа се постави темелот, а јас ќе продолжам да градим врз тие темели. Трајкоски покажа дека кога се има визија, се добиваат резултати. Ќе ја продолжиме со уште поголема енергија“, истакна Глинџарски.

„ВМРО-ДПМНЕ ќе продолжи да го поддржува развојот на Општина Аеродром. За таа цел имајќи предвид дека општина Аеродром е општина во кои градинките се преполни со деца и ги надминуваат капацитетите за сместување, ветуваме во следниот четири годишен мандат изградба на 5 детски градинки, и тоа во населбите Долно Лисиче, населба Лисиче, Јане Сандански, Мичурин, како и Острово со капаците на вкупно 700 дечиња“, велат од ВМРО-ДПМНЕ.

„Со ова ќе го решиме проблемот на престој на дечињата и ќе ја намалиме листата на чекање. Ќе обезбедиме модерно уредени детски градинки по највисоки стандарди, каде што најмалите ќе можат да ги добијат најдобрите услови на згрижување, воспитно-образовни активности како и развивање на социјалните вештини.

Програмата на ВМРО-ДПМНЕ за општина Аеродром за локалните избори нуди мерки за сите категории на граѓани, од најмалите до највозрасните.

Идниот градоначалник Дејан Митески и советот предводен од ВМРО-ДПМНЕ со проекти и работа ќе обезбедат подобра иднина за сите граѓани.

Општина Аеродром мора да продолжи да се гради и развива.

Ги повикуваме аеродромци на 19 октомври масовно да излезат за поддршка за Дејан Митески и листата за советници предводена од ВМРО-ДПМНЕ и да заокружат 9“, се наведува во соопштението на ВМРО-ДПМНЕ.

Актуелната пратеничка од Левица и кандидат за Градоначалник на Струга, Јована Мојсоска, обвини дека власта води црна кампања против Левица, токму затоа што, како што вели, Левица бележи раст и сѐ поголема поддршка од граѓаните.

„Токму преку Левица во изминатиот мандат беа поднесени бројни иницијативи до Советот на Општина Охрид. За жал, како што се случува и во Собранието поради теснопартиска суета, голем дел од нашите иницијативи беа одбиени и тука во Советот на општина Охрид“, изјави Мојсоска за време на народниот собир во Охрид викендов.

„На овие избори очекуваме дека Левица ќе порасне со бројот на советници и ќе биде фактор, без кој нема да може да се состави мнозинство во советот. На тој начин, единствено ние можеме да истуркаме повеќе проекти кои се дел од програмата на Левица и од интерес на граѓаните на Охрид“, додаде Мојсоска.

Според неа, додека власта води негативна кампања против Левица, на локално ниво, во Советот на Охрид, може да се види дека ВМРО-ДПМНЕ соработува со советниците од ДУИ.

„Додека власта води црна кампања против Левица, тука во советот на Охрид сведочиме како ДПМНЕ е во коалиција токму со советниците од ДУИ, ние сведочиме како градоначалникот Пецаков делеше тендери на локалните шерифи од ДУИ. Но, ваквата црна кампања покажува дека власта се плаши и само го докажува нашиот раст, кој мислам дека ќе кулминира и на овие локални избори“, рече таа.