Движењето ЗНАМ – За наша Македонија, денеска пред медиумите го промовираше делот од програмата посветен на транспаретното и отчетно работење на општината и вистински квалитетен сервис за граѓаните.

„Во изминатите осум години ја зголемивме транспарентноста повеќе од двојно, и со резултат од 97.1% денес се наоѓаме меѓу најтранспарентните општини во државата“, изјави кандидатот за советник од редоовите на Движењето ЗНАМ – Дарко Митевски.

Општината, рече тој, ќе продолжи да вложува во јакнење на административните капацитети и приближување до граѓаните. Куманово ќе остане пример за правилно управување со јавните ресурси, за чесно, посветено, отчетно и транспарентно работење.

„Во програмата на Движењето ЗНАМ – за наша Македонија предвидуваме серија проекти, активности, и заложби:

· Континуирана оптимизација на општинските сектори и одделенија во насока на подобар, поквалитетен и побрз сервис за граѓаните.

· Зајакнување на капацитетите на сите јавни претпријатија со фокус на доопремување со опрема и механизација, зголемување на кадровскиот капацитет, воведување на нови технологии и програми за обуки и доусовршување.

· Зајакнување на капацитетите на ТППЕ Куманово, со опрема, обуки и тренинг за пожарникарите.

· Дигитализација на најкористените општински услуги и нивно интегрирање на националниот портал за услуги.

· Електронски документ менаџмент систем за локалната самоуправа и јавните претпријатија.

· Воспоставување инфо-центар и инфо-линија во рамките на Општината, каде што граѓаните на едно место ќе можат да добиваат информации и услуги од административните службеници.

· Изработка на нова инклузивна веб-страница на Општината, приспособена за лица со попреченост, со јасен пристап до сите информации од јавен интерес.

· Развивање на нова мобилна и веб-апликација преку која граѓаните ќе имаат можност лесно да пријават проблеми, предлози и барања.

· Организирање на младински форуми и панел дискусии, каде младите ќе имаат можност активно да ги претстават своите идеи, ставови и иницијативи.

· Воспоставување нов систем за информирање во руралните средини преку поставување огласни табли и јавно достапни известувања.

· Одржување на јавни средби и форуми за граѓаните, за подобра интеракција и двонасочна комуникација.

· Навремено и редовно информирање на јавноста преку соопштенија и брифинзи со медиумите за сите значајни активности и одлуки на локално ниво.

· Издавање на дигитален општински весник, со информации за проектите, активностите и сите актуелни настани во општината“, рече тој.

Затоа, потенцира Митевски со полна одговорност може да се каже – Куманово денес е симбол на одговорно, отчетно и транспарентно управување.

Заменик претседателката на СДСМ, Фани Каранфилова – Пановска, заедно со кандидатката за градоначалничка на Велес, Маја Хеско, и носителот на советничката листа Јованче Манасков, денеска се на средби со граѓаните на Велес.

„Во центарот на оваа програма сте вие, луѓето, граѓаните и реалните потреби со кои се соочувате. Нашата цел е да создадеме град кој нуди можности за сите – за младите, за жените, за пензионерите, достоинствен живот за граѓаните на Велес,“ рече Каранфиловa Пановска.

Во делот за младите, програмата предвидува отворање младински иновациски лаборатории – простори за стартапи, ИТ-решенија и креативни проекти, како и програма за младинско вработување во партнерство со компании и институции, и бесплатни обуки за дигитални вештини, странски јазици и претприемништво.

Таа додаде дека особен акцент е ставен и на жените и економското јакнење преку фонд за женско претприемништво, поддршка на креативни индустрии и обуки за добро платени сектори.

Во делот на социјалните политики, СДСМ во Велес планира субвенции за самохрани родители, бесплатен училиштен прибор и книги за деца од ранливи семејства, пристапност за лицата со попреченост и изградба на инклузивни детски игралишта.

Посебен дел од програмата, рече Каранфиловска – Пановска, е посветен на родовото буџетирање и еднаквоста, како и на поддршката за пензионерите со пренамена на „Вила Зора“ во современ Дом за стари лица, бесплатен јавен превоз за пензионерите и активности за трета доба.

„СДСМ се бори Велес, да стане модерен чист и зелен град, со силна економија што создава можности, за град што се грижи за секој човек. Затоа велиме – се бориме за нашиот дом,“ порача Каранфиловa Пановска и ги повика граѓаните својот глас на 19 октоврми да го дадат за бројот 5, за Маја Хеско за градоначланичка и советничката листа на СДСМ и Коалицијата предводена од Јованче Манасков.

Помина точно една година од политичката, а не правна одлука на Уставниот суд, со која беше укинат балансерот – единствениот механизам што гарантираше следење на правичната и соодветна застапеност на етничките заедници во државните институции, изјави потпретседателот на ДУИ, Арбер Адеми.

Според него, една година подоцна, последиците се јасни, болни и алармантни.

„Оваа одлука не беше техничка, ниту административна. Беше политичка и противуставна, затоа што имаше за цел да го избрише етничкото изјаснување и да ги демонтира колективните права загарантирани со Охридскиот мировен договор и санкционирани со Амандман VI на Уставот. Всушност, ова беше институционален напад врз еднаквоста и отворено враќање пред 2001 година – во време кога Албанците сочинуваа помалку од 0,2% од државната администрација. Пред укинувањето на балансерот, Албанците беа застапени со околу 22% во администрацијата – процент што постепено се зголемуваше од година во година. По укинувањето на овој механизам, според јавните податоци, во повеќето државни институции процентот на Албанци во новите вработувања не надминува ниту 5%, а најголемиот дел се членови на тесното семејство“, рече Адеми.

Тој додаде дека една година по оваа одлука, државните институции се понеправични, позатворени и поеднообразни од кога било порано.

„Ова веќе не е само политичко прашање – ова е уставно, национално и егзистенцијално прашање за Албанците и за сите заедници во Северна Македонија“, рече Адеми и побара Владата да го врати механизмот на балансерот во согласност со Охридскиот рамковен договор и Уставот на државата.