Актуелниот градоначалник на Гази Баба и кандидат на локалните избори од ВМРО-ДПМНЕ, Бобан Стефковски преку социјалните мрежи најави реконструкција на големите локални улици, за подобар сообраќај, побезбедни улици, за поквалитетен живот на граѓаните.

„Во насока на унапредување на инфраструктурата и секојдневието во нашите населби, започнуваме со комплетна реконструкција на големите локални улици!“, рече Стефковски.

Инвестирање во спортот и спортската инфраструктура е главен фокус на ВМРО-ДПМНЕ, велат од оваа партија.

„Еден од приоритетните проекти во програмата на кандидатот за градоначалник Дејан Митески од ВМРО-ДПМНЕ во Општина Аеродром е изградба на нов модерен спортски центар.

Локацијата каде што е предвидена изградбата е покрај реката Вардар, на потегот од паркот „Авионче“ до „Рајскиот парк“.

Површината на новиот спортски центар е 100.000 м2, и истиот ќе биде наменет за сите спортови, каде што секој ќе најде свое место, од професионалци, аматери, до семејства.

Вложување во спортот е вложување во физичкото и метално здравје на граѓаните. Наша примарна цел е да обезбедиме соодветни услови каде што ќе можат да спортуваат идните млади спортисти, но и докажани врвни шампиони“.

Македонија, додаваат од ВМРО-ДПМНЕ има огромен потенцијал да создава идни спортисти кои ќе носат врвни резултати и успеси.

„Затоа ги повикуваме граѓаните од Општина Аеродром на 19 октомври да излезат и да го поддржат Дејан Митески и советничката листа на ВМРО-ДПМНЕ.

Средношколците на Скопје ќе добијат безбеден, бесплатен и организиран автобуски превоз од врата до училиште. Ова е една од клучните мерки што кандидатот за градоначалник на Град Скопје од коалицијата „Искуство за успех“, Александар Трајановски, ја најави како дел од својата програма „15 клучни проблеми и решенија на Скопје“.

„Скопје мора да биде град што функционира, со чист воздух, уреден јавен транспорт, сигурна инфраструктура и културен живот достапен за сите. Најважно е граѓаните да почувствуваат дека градот работи за нив, а не обратно“, вели Трајановски.

Трајановски исто така нагласи дека токму младите се огледалото на градот и дека Град Скопје мора да обезбеди услови кои ќе им овозможат безбедност, пристап и развој. „Не можеме да зборуваме за европски стандарди, ако учениците немаат безбеден превоз до училиштето. Тие се нашата иднина, а обврска на градот е да им го олесни секојдневието“, изјави Трајановски.

Освен организиран автобуски превоз, Трајановски во програмата предвидува и низа мерки насочени кон подобрување на квалитетот на животот на средношколците:

· формирање на средношколски спортски лиги

· поставување на автомати за рециклирање во училиштата со можност за кеш-бек

· пристап до културни настани по симболична цена

· организирани здравствени и ехо прегледи преку јавните здравствени домови

· бесплатни обуки за самоодбрана

· обезбедување средства за менструална хигиена во сите училишта

· работилници за комуникација меѓу родители и тинејџери

· телефонска линија за пријавување насилничко однесување кон ученици

Во програмата „15 клучни проблеми и решенија на Скопје“ се опфатени и други приоритети како решавање на проблемот со водоснабдувањето, чистиот воздух, уличните кучиња, ГТЦ како нов дом на Градот, производството на пелети од страна на „ЈП Паркови и Зеленило“ за еколошко греење, и дузина други квалитетни решенија.

„Скопје треба да биде град на решенија, не на изговори“, заврши Трајановски