Претседателот на Социјалдемократскиот сојуз на Македонија, д-р Венко Филипче на граѓанската трибина во општина Центар, го коментираше однесувањето на актуелната власт и посочи на негативната кампања која ја води против СДСМ. Според Филипче оваа кампања на ВМРО-ДПМНЕ од првиот ден на власт е одраз на нивната немоќ и неспособност.

„Сведоци сме на одвратна лажна и црна кампања против СДСМ која ја водат од првиот ден на власт. Оваа мизерна и ниска кампања на ВМРО-ДПМНЕ е одраз на нивната немоќ и неспобност. Но суштина е уште поболна, а тоа е дека тоа е кампања да се прикријат нивните лоши намери за иднината на оваа земја“, рече Филипче.

Тој додаде дека власт која води негативна кампања кон опозицијата, според него, не е само неспособна, туку и дека не се грижи за напредокот на државата, не сака дијалог и не сака компромиси.

„Тоа е власт за која напредокот на државата е непријател. Тоа е власт која се храни и одржува од внатрешни поделби, од сиромаштија која ја контролира со корупција и од хаос во кој се создава апатија. Ова е целта”, нагласи д-р Филипче.

Филипче истакна дека тој нема да влегува во нивната кал, туку ќе продолжи да ги разобличува.

„Но јас во нивната кал нема да влегувам, туку ќе продолжам да ги разобличувам. Нека се препелкаат во национализмот, во лажниот патриотизам и во својата неспособност самите тие”, порача лидерот на СДСМ, д-р Филипче.

„Не си сама! Прегледај се! Дајте ни термини на државно! Вработете онколози! Овозможете повеќе мамографи – во Тетовската клиника нема термин, нема кадар!“, ова се само дел од пораките што ги упатија жените од ЛО Левица – Тетово и кандидатката за градоначалничка на Општина Тетово од Левица, д-р Катка Божиноска, во рамки на активноста посветена на жените и борбата против ракот на дојка, во рамки на месецот на свесност – Розов октомври.

„Оваа акција е чин на солидарност, но и гласна реакција на игнорантскиот однос на институциите. Во Тетово сè уште нема достапни термини за мамографија, нема доволно кадар, нема онколози. Тоа мора да се промени“, изјави кандидатката за градоначалничка на Тетово, д-р Катка Божиноска.

На настанот, жени-членки, активистки и поддржувачки на Левица, облечени во розово како симбол на солидарност со жените кои се соочуваат со рак на дојка, испратија моќни пораки на поддршка, охрабрување и барања за подобрување на здравствениот систем.

„Целта е да се подигне свеста, но и да се повикаат надлежните да ги преземат неопходните мерки за навремена дијагностика и достапна здравствена заштита“.

Кандидатката за градоначалничка на Тетово од Левица додаде дека ќе продолжат со секојдневни активности, на терен, со народот.

Кандидатот за градоначалник на Центар и актуелен татко на општината Горан Герасимовски, вечерва изјави дека и во вториот мандат продолжува поддршката кон ранливите граѓани и највозрасните.

„Стануваме прва општина која има свој дом за стари лица. Стануваме општина во која ја зголемуваме двојно, на 5000 денари, поддршката за старите лица, покрај негата во домашни услови. Еднаквоста не смее да биде идеал, туку секојдневие! Воведуваме бесплатна втора смена во градинките, продолжуваме со финансиска помош на младите, го зголемуваме износот на стипендиите за нашите талентирани ученици и млади спортисти.Сите добиваат заслужена помош и поддршка, бидејќи мора да си помагаме еден на друг! Центар повторно ќе има шампион! Во текот на кампањата ќе ја видиме новата сала на Работнички, која пак ќе стане центарскиот Вруток на победници и успешни млади луѓе, пример за сите“, рече Герасимовски.

Тој потенцираше дека за да се успее во секоја работа, човек мора да биде чесен, отворен за комуникација и да знае да слуша! Да знае да собере, да го избере најдоброто, и потоа да сработи!

„Започнуваме со новата граѓанско-административна зграда. Сосема одговорно тврдам дека таа ќе биде во поголем дел наменета за граѓаните, а помалку за администрацијата. Во неа сакаме сите да имаат свој простор, да биде отворена и стаклена, за да се во неа се гледа. Затоа што ние немаме што да криеме. Јас и мојот тим, сакаме сите да знаат се и секогаш. Во овие 4 години, направивме многу отчети и за се јавно и јасно кажувавме. Сакав на мојот пример да покажам дека да се биде добар домаќин, добар градоначалник, не мора и не смее да се потроши ниту еден граѓански денар за себе. Не потрошив ниту еден денар за дневници и кафеани, не се возев со шофер бидејќи не сум така скроен. Сите пари за овие намени, го дадовме за социјални потреби, за да помогнат на други, таму каде што е поважно“, изјави Герасимовски.

Герасимовски, посочи дека во Центар е горд на многу работи, но на една суштинска најмногу.

„Верувам дека успеавме да креираме вистинска центарска политичка и граѓанска култура, едно вистинско граѓанско движење и дух. Центарска приказна, во која Општината дава шанса преку нашето невладино Јадро, а потоа слуша и соработува. Центарска приказна, во која со статуите, муралите, но најмногу од се, со почитта и човечкото признание на нашите великани, покажуваме дека го почитуваме минатото, вредностите и личните успеси. И покажуваме дека можеме да ја поддржуваме целосно и силно, нашата македонска, чиста, изворна, историска култура, јазик, традиција и пред се луѓе! Бидејќи луѓето, граѓаните, нивните мали, но огромни во исто време, приказни и успеси се најважни за нас, за нашата нова вистинска приказна во Центар! Бидејќи успесите се заеднички, а обврската за нив е најмногу моја и на мојот тим“, додаде Герасимовски.