Кандидатката за Градоначалничка на Град Скопје, Каја Шукова, синоќа на митинг во општина Центар најави еден поинаков, пристап кон кампањата, во духот на солидарноста. Шукова и кандидатите за советници одлучиле да се откажат од градски изборен штаб и средствата да ги насочи таму каде што најмногу се потребни.

„Јас како кандидат за градоначалник и кандидатите за советници во Град Скопје се откажавме од градски штаб. Сите средства за работа на штабот ќе бидат уплатени за Домот за деца без родители на Град Скопје. Нашиот штаб е целиот град. Секоја улица, секое маало ќе ни биде штаб. Не ни треба градски штаб. Средствата се за тие на кои им се најпотребни,“ изјави Шукова.
Со оваа порака, Шукова ја отвори својата визија за политика што не почнува и не завршува во партиски штабови, туку меѓу луѓето во секој дел од градот.

Таа потсети на борбениот дух на Центар, како симбол на отпорот и граѓанската храброст.

„Во 2013 година, кога Македонија беше заробена во канџите на режимот, вие бевте симбол на пркосот и непокорот. Симбол на слободарскиот дух и борбата за слобода. Тука почна борбата за нашиот дом. И борбата ќе почне од тука, и за Скопје и за Македонија” рече Шукова.

Таа истакна дека оваа борба денес продолжува не само за победа на изборите, туку за враќање на достоинството, за создавање модерно, зелено и хумано Скопје, град што ќе биде дом за сите.

„Центар на овие избори повторно е повикан да застане на нозе и да испрати силна порака до Мицкоски и неговата банда на власт. Центар на овие избори прв ќе се разбуди и ќе му порача на ова лажно, арогантно и своеволно владеење на Мицкоски дека е доста“, порача лидерот на СДСМ д-р Филипче на граѓанската трибина во Центар.

Филипче побара поддршка за актуелниот градоначалник Герасимовски и листата на советници предводени од неговиот колега,Александар Савески.

„Луѓе произлезени од граѓаните, луѓе со личен и професионален интегритет каков што центарци можат само да посакаат и луѓе кои ќе работат во најдобар интерес на граѓаните кои ќе им ја дадат поддршката“, посочи д-р Филипче.

Лидерот на СДСМ повика на масовна мобилизација на 19 октомври за СДСМ да оствари убедлива победа во Советот на општината, но и на Каја Шукова за победата да биде целосна.

„Но победата нема да биде целосна без да дадеме силна поддршка и за нашата Каја Шукова. Каја е жена борец, социјалдемократ по убедување, жена која го сака Скопје и знае како да го води градот. Каја е експерт за животна средина и сигурен сум дека ќе ги реши најгорливите проблеми на скопјани, со реални и остварливи проекти“, нагласи д-р Филипче.

Тој додаде дека таа е чиста спротивност на лажните, шарени програми на нејзиниот противкандидат, човек кој ќе прави воз покрај Вардар.

„Човек кој веќе три кампањи по ред ветува дека од Вардариште ќе направи парк — и, секако, лаже. Скопјани и центарци веќе не смеат да бидат излажани, ги повикувам да го дадат својот глас за луѓе на кои зборот им држи“, рече д-р Филипче на граѓанската трибина во Центар.

Карпош е нашиот дом, нашите улици, дворови, училишта, спомените од детството и надежите, порача Маја Мојсова Мијовска, кандидат за градоначалничка на Карпош од СДСМ, најавувајќи визија за нов почеток и суштинска промена во начинот на функционирање на општината.

Таа нагласи дека Карпош се соочува со реални проблеми кои повеќе не смеат да се игнорираат: загаден воздух, дупки по тротоарите, диви депонии, сообраќаен метеж, темни улички, преполните паркинзи, оштетени јавни површини, недостиг на зеленило и простор за децата, нефункционална инфраструктура.

Мојсова ја претстави и својата програма за темелна трансформација на Карпош, базирана на инклузивност, транспарентност, зелена енергија, квалитетна социјална грижа и развој на младиот потенцијал.

-Реконструкција на секој кварт: нови паркови, осветлување, дрвореди, детски игралишта. Грижа за зеленилото со системски пристап. Домови на култура и центри за млади во помалите населби, подобрување на водоводната и канализациска мрежа, јавни консултации, транспарентна администрација, засилена контрола од граѓанскиот сектор, поддршка за мали бизниси и иновации се само дел од програмата, рече Мојсова.

Во програмата за Карпош се и младински културен спортско рекреативен центар, нови детски градинки во Влае, Нерези и покрај Вардар, со што ќе се стави крај на листите на чекање.

„Карпош ќе добие свое претпријатие за хигиена, паркинзи и јавен ред, со специјализирани возила и опрема, со цел чистота и уредност во секоја улица. Во најоптоварените зони , Лептокарија, Влае, Карпош 4, кај Воената болница, ќе се постават монтажни паркинг платформи со бесплатен паркинг за жителите на општината.“, порача Мојсова.

Во програмата се и поддршката за децата и образованието со субвенции и бесплатен базен, мобилна здравствена заштита и грижа за ранливите, ангажирање на пензионерите.

„Како лекар, научив дека ништо не се решава со одложување, дека секоја криза бара знаење, брза реакција и тимска работа. Сега е време да ги споиме зборовите со дела. Да гласаме за број 5, за надеж, за доверба, за нашиот дом Карпош. Број 5 за Карпош што го сакаме“, порача Мојсова.