Две нови градинки и проширување на капацитетите на постоечките во општина Аеродром, ветува во својата изборна програма Александар Трајановски, кандидат за градоначалник на општина Аеродром од СДСМ.

„Еден од најголемите проблеми во нашата општина е недостатокот на слободни места во детските градинки. Родителите со години се соочуваат со листи на чекање за упис во градинка и преголеми групи на деца во градинките. Секое дете во Аеродром мора да има свое место во градинка. Тоа е еден од главните приоритети на кои ќе се посветам како иден градоначалник. Не нудиме неостварливи ветувања. Две нови современи детски градинки предвидовме за следните 4 години – една во Мичурин со капацитет од 300 деца и една во Ново Лисиче со капацитет од 150 до 250 деца. Овие градинки ќе бидат изградени по највисоки стандарди, со енергетски ефикасни објекти, целосна пристапност за лица со попреченост и со современи услови за престој, воспитание и игра. Со тоа отвораме повеќе од 450 нови места за децата во Аеродром, а дополнително проширување на постоечките градинки конечно ќе го решиме долгогодишниот проблем со недостигот на капацитети во градинките. Нашата цел е ниедно дете во Аеродром да не остане без место во градинка“, рече тој.

Современа противпожарна опрема за сите пожарникари и функционална хидрантска мрежа во Кочани ветува Владко Грозданов, кандидат за градоначалник на општина Кочани поддржан од ВМРО-ДПМНЕ.

„Во наредниот четиригодишен мандат, јас како кандидат за градоначалник, заедно со носителот на листата на советници, најавуваме зајакнување на капацитетите за заштита и превенција од пожари. Тоа значи грижа за граѓаните, шумите, инфраструктурата, односно безбедноста на целиот град. Набавка на современа противпожарна опрема за сите пожарникари, набавка на навално возило и противпожарни цистерни. Ревизија и оспособување на градската хидрантска мрежа, ревизија и оспособување на станбената хидрантска мрежа. Усогласување на бројот на вработени според законската регулатива“, рече тој.

Заменик претседателката на СДСМ, Фани Каранфиловска Пановска, заедно со кандидатот за градоначалник на општина Неготино Петар Мантев, денеска оствари средба со претставници на НВО „Порака – Неготино“, здружение на родители на деца со ментален хендикеп, како и со Центарот за лица со попреченост.

-Во програмата посебно место е посветено на подобрување на условите за лицата со посебни потреби и нивните семејства. Секаде, во сите образовни установи, мораме да обезбедиме непречен пристап и образовна асистенција за учениците со посебни потреби, кои ќе работат професионално, истакна Каранфилова Пановска.

Кандидатот за градоначалник од СДСМ и Коалицијата, Петар Мантев додаде дека во прорамата се предвидува и бесплатен јавен општински превоз за целни групи, како дополнителна мерка за подобрување на квалитетот на животот на сите граѓани.

„Нашата заедничка борба, борбата за нашиот дом е инклузивна и ги вклучува сите, порача заменик претседателката на СДСМ“, Фани Каранфиловска Пановска.