Марковите Кули ќе блеснат во ново светло, симболот на Прилеп добива современа и уметничка илуминација што ќе ја истакне неговата убавина и историја, изјави Дејан Проданоски, кандидат за градоначалник на Прилеп, од ВМРО-ДПМНЕ.

„Реконструкција на пристапните патишта до овој локалитет и целосно осветлување на Марковите кули. Ставивме во програма да го осветлиме и илуминација на овој комплекс овде. Дополнително, нешто да го надградиме, бидејќи навистина ни е важно, клучното место во градот да го заживееме да има еден побрз културен напредок. Од 2006 година Маркови кули целиов предел, не само ридот, туку и околниот простор се ставени под заштита. Значи, прогласен е за споменик на природата, како предел со исклучителни вредности. Значи, во секој случај илуминацијата не е нарушување на просторот доколку се изведе онака како што е предвидено, односно врз веќе постоечка инфраструктура на просторот надвор од споменикот и итн. Ако го осветлиме, ќе добиеме прво еден посовремен, поубав лик да го претставиме ова културно богатство коешто го имаме од средновековието и да ја збогатиме на некој начин туристичката понуда“, рече тој.

Со паметни интервенции со паметно вложување, додаде Проданоски, само понатаму може да се унапредува и да се зголемува вредноста на самиот локалитет и можностите кои градот ќе ги добие покрај едно вакво природно и културно наследство.

„Идејата согласно програмата е да се обнови осветлувањето коешто некогаш сме го имале со современи уреди да се дополни, односно да се вклучи во она што е понатаму за развој на градот во Сејф Сити, да вклучиме и видео надзор за ова природно богатство да не се уништува и понатаму овие Маркови кули да се реконструираат. Постојат големи можности да се одвиваат работите во тој тек. Во оваа прва фаза ја поздравувам идејата да се вклучи Сејф Сити во Марковите кули“, рече Проданоски.

Кандидатот за градоначалник на Општина Центар и актуелен градоначалник, Горан Герасимовски, во рамки на својата нова програма за работа, најави поставување на три слободни Free Wi-Fi зони на територијата на општината.

Новите Wi-Fi зони е предвидено да се постават во Дебар Маало, Сквер Јадран и Капиштец, во рамки на европскиот проект EU4Digital, и претставуваат конкретен чекор кон дигитална и поврзана општина која им служи на граѓаните и ја следи современата урбана динамика.

„Со поставувањето на овие три слободни Wi-Fi зони им овозможуваме на нашите жители, студенти, млади и туристи подобра поврзаност и полесен пристап до информации. Ова е само дел од нашата визија за модерен, дигитален Центар, во кој технологијата им помага на луѓето и ја подобрува секојдневната комуникација“, вели Герасимовски.

Целосна реконструкција на Здравствена станица, детска градинка и средно училиште во Македонска Каменица, ветува кандидатот за градоначалник на Македонска Каменица од редовите на ВМРО-ДПМНЕ и коалицијата „Твоја Македонија“, Димчо Атанасовски.

„Реализиравме проекти за заштеда на електричната енергија во речиси сите објекти на локалната самоуправа. Во основното училиште поставивме фотоволтаичен систем од 37 киловати, кој обезбедува заштеда на електричната енергија од 50%. Во соработка со Источен плански регион инсталиравме три нови соларни централи на Домот на култура, Куќа на спортот и Дневниот центар за лица со посебни потреби. Вкупната моќност на овие централи е 97 киловати, што на општинско ниво обезбедува 134 киловати чиста и зелена енергија. Во моментот спроведуваме постапка за целосна реконструкција на Здравствена станица проектот ќе биде завршен во наредните шест месеци, а објектот ќе биде современ енергетски ефикасен и со модерен изглед. Во првите две години од новиот мандат целосно ќе ги реконструираме детската градинка Бамби, објектот на ЈП Камена Река, средното училиште Миле Јаневски Џингар, за реконструкција на овие објекти веќе имаме подготвено целосна проектна документација“, рече тој.