Соопштенија
ВМРО-ДПМНЕ: СДСМ е во коалиција со криминалот
СДСМ е во коалиција со криминалот и го штити, особено кога нивни функционери стојат зад истиот и се дели пленот. Јавноста вчера беше сведок на уште една фарса во режија на Зоран Заев. Во присуство на неговиот адвокат како бранител, градоначалникот шверцер беше ослободен од притвор. Јавниот обвинител, исто како во случајот на Зоран Заев, го преквалификува обвинението. Недостасуваше уште да се извини што му го нарушиле мирот и морале да го возмемируваат додека тој криумчарел. Нормално, кога е партиското обвинителство и судство во прашање, нема испитување на потекло на имотот, нема заплена на истиот, ниту информации со кого контактирал вечерта кога е фатен во криминал, се вели во соопштението на ВМРО-ДПМНЕ.
Според партијата, вчера партиското судство на СДСМ донесе уште една срамна одлука и го амнестираше градоначалникот на Ново Село од редовите на СДСМ, Боро Стојчев, за шверц со цигари.
„Со вакво обвинителство и судство кое работи по партиска команда, никогаш нема да бидат достигнати европските стандарди. Тоа е цената што ја плаќа Македонија за да може Заев и криминалниот картел на власт безмилосно да ја ограбуваат државата и граѓаните. Затоа одговорните за двата скандали тешки 45 милиони евра во здравство и фондот за иновации уште одат на работа, влакно не им фали и имаат можност да ги прикријат трагите“, се вели во соопштението.
Опозициската партија смета дека Заев и СДСМ од судството прават фарса, а институциите што треба да го гонат криминалот во државата служат за одбрана на истиот. Вчерашната пресуда е доволен доказ дека Македонија е заробена држава во која целосно е урнисан правосудниот систем, а обвинителството и судот се под целосна контрола на Зоран Заев и СДСМ.
„Ваквото уништување на правниот систем, Заев го компензира со продажба на највисоките државни и национални интереси. Зад бришењето на сè што е македонско со капитулантскиот договор кој Заев го склучи со Грција се крие општ грабеж во државата. Во моменти кога се брише македонското име, јазик, култура, историја СДСМ се обиде од граѓаните да украде 45 милиони евра пари на граѓаните за само неколку дена. Се краде безмилосно и бесрамно, на најбрутален и најсвиреп начин, а паралелно се распродаваат националните и државните интереси.
Додека милиони државни пари се делат на медиуми, државни и партиски функционери на СДСМ, граѓаните се доведени до питачки стап. Економијата во Македонија тоне, а тоа го покажуваат сите економски показатели. За сето време Тевдовски безмилосно ја задолжува државата со цел исплата на долговите кон партиските послушници, за што цената на крајот ќе ја платат граѓаните.
На ова лудило мора да му се стави крај. Правната држава мора да се врати, а сите оние кои сега се амнестирани од партиското судство на СДСМ, ќе ги стигне правдата и ќе одговараат за криминалот. Ќе одговараат и тие кои ги злоупотребуваат службената положба и овластувањата и се ставаат во заштита на криминалниот картел на власта. Само така Македонија ќе победи“, се додава во соопштението.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Соопштенија
Сајкоски: Масовно излезете и гласајте за Александар Јовановски, за развој и напредок на Кичево
На вечерашниот мини-митинг во општина Кичево, во рамки на вториот круг од локалните избори кои ќе се одржат на 2 ноември, се обрати генералниот секретар на ВМРО-ДПМНЕ, Ѓорѓија Сајкоски кој упати порака за масовна излезност на 2 ноември за глас на кандидатот Александар Јовановски, за развој и напредок на Кичево.
„Почитувани, ни останаа уште неколку денови до она за коешто работевме долг период. Ни останаа уште 3-4 дена до 2, денот кога треба да излеземе масовно како што излеговме на овој плоштад, да кажеме не за не работата, не за неморалот, не за кандидатот којшто не посрамоти. И да кажеме да за оној којшто сака, којшто може и којшто треба да сработи за нашата општина, да кажеме да за Александар Јовановски за иден градоначалник на Кичево“, рече Сајкоски.
Сајкоски ги повика и оние граѓани кои живеат во дијаспората да го дадат својот глас за бројот 9, за да има подобри услови, кои ќе донесат подобар живот за кичевчани.
„Сакам кратко да порачам и за оние коишто сакаат и се спремаат да доаѓаат од странство. Почитувани, многу ве почитуваме и секогаш нашата врата е отворена за вас, но нашите деца 265 дена дишат нечист воздух, нашите деца 365 одат по калливи улици, нашите деца и ние со нашите автомобили се движиме низ фекалии во населбите од нашиот град. Затоа и вие придружете се кога ќе дојдете тука во Кичево, гласајте за број 9, гласајте за Александар Јовановски, гласајте за победничката опција во Република Македонија“, вели Сајкоски.
Соопштенија
Јовановски: Со заокружување на бројот 9, Кичево ќе добие градоначалник кој ќе се жртвува за својот град
Александар Јовановски, кандидат за градоначалник за општина „Кичево“ од редовите на ВМРО-ДПМНЕ, се обрати на денешниот настан одржан во општината, под слоганот „Вистинскиот избор! Твојот човек! Твоето место! За твојата иднина!“, во рамките на изборната кампања за вториот круг од локалните избори кои ќе се одржат 2 ноември.
Јовановски потенцираше дека кампањата која се водела за локалните избори во општина Кичево, била исклучиво позитивна.
„Ви благодарам на присуството, ви благодарам на поддршката, самата ваша бројка доволно говори. Целата кампања ни се засноваше на позитивна енергија, целата кампања зрачи и ќе продолжи да зрачи после големата победа само со позитивна енергија, ќе продолжи да зрачи со надеж и среќа за сите. Сите оние коишто не веруваат, сите оние коишто сеуште се двоумат, сите оние кои мислат дека не е можно да оствариме победа, нека размислат уште еднаш“, рече Јовановски.
Јовановски истакна дека Кичево заслужува за градоначалник да има чесен и трудољубив човек, кој ќе се жртвува за својот град.
„Верувајте, заслуживме да имаме чесен човек, трудољубив човек и човек којшто ќе се жртвува за овој град, а тој човек сум јас почитувани. Сакам да изразам особена благодарност до припадниците на сите политички партии во нашиот град, без разлика на кој етникум припаѓаат, без разлика на која идеологија припаѓаат, има луѓе кои увидоа со што се соочуваме, за жал сите вие сте сведоци на што се, се изнагледавме изминативе денови, какви снимки изнаслушавме и какви видеа видовме, ние како граѓани не го заслужуваме. Дојдете на 2 на истото ова место, ќе славиме заедно“, истакна Јовановски.
Соопштенија
Митески: Паметен пристап до паркирањето, практично, економично и безбедно решение за Аеродром
Градоначалникот на Општина Аеродром и кандидат за нов мандат, Дејан Митески, најави решение за еден од најчестите проблеми со кои секојдневно се соочуваат граѓаните – недостатокот на паркинг места и хаосот во сообраќајот.
„Наместо нереални ветувања за катни гаражи кои бараат години и милионски буџети, општината се насочува кон брзо и практично решение, воведување еднонасочни улици со обележани ленти за паркирање. Не можеме да изградиме катна гаража за шест месеци, но можеме за шест месеци да обезбедиме до 800 нови паркинг места“, истакна Митески, додавајќи дека ова решение се базира на користење на постојната инфраструктура, без дополнителни големи трошоци.
Тој кажа дека оваа стратегија носи три големи придобивки за жителите на Аеродром: прво, значително се зголемува бројот на достапни паркинг места во густо населените зони, со рационално искористување на секој метар улица, второ, создава можност за воведување велосипедски патеки на делови каде што ширината тоа го дозволува, поттикнувајќи здрави и еколошки навики и трето, самата организација на еднонасочните улици природно го намалува брзото движење на возилата, придонесувајќи кон побезбедно и покултурно сообраќајно однесување.
„Со новиот сообраќаен режим, улиците ќе станат поуредени, побезбедни и попрактични. Наместо да вложуваме време и средства во невозможни проекти, се фокусираме на решенија што граѓаните ќе ги почувствуваат веднаш“, рече Митески.

