Јас вечерва стојам пред вас не само како кандидат за градоначалник, туку како една од вас, човек кој веќе десет години е дел од организацијата и осум години модератор на огранокот на Левица Центар, истакна Марија Среброва.

На собирот во Центар беше отворен и штаб на кандидатите за градоначалници на Град Скопје, Амар Мециновиќ и Општина Центар, Марија Среброва, а присуствуваа и лидерот на Левица, Димитар Апасиев и кандидатите за советници.

„Центар е местото каде се организирале антифашистичките печатници и пунктови, каде што се ковал духот на отпорот и слободата“, порача кандидатката за градоначалник на Левица, додавајќи дека оваа општина не е само административна единица тукуе и симбол на достоинство, истрајност и културен идентитет. Од оваа општина, додаде таа, потекнуваат или во неа живееле бројни револуционери, културни дејци и интелектуалци кои го обликувале македонскиот идентитет, од Павел Шатев и Кузман Јосифовски-Питу, преку Невена Ѓорѓиева Дуња и Орце Николов, до Славко Јаневски, Блаже Конески и Горан Стефановски.

Среброва потсети дека ова е четврти изборен циклус за Левица: „Четири циклуси во кои покажавме што значи истрајност, што значи верност кон идејата, што значи да не се продадеш, да не клекнеш, да не потпаднеш на закани и дефетизам. Вие сте тие што го чувате пламенот на левото крило на организацијата. Вие сте совеста на Центар“.

Во своето обраќање таа нагласи дека нивната борба не била лесна: „Не напаѓаа, не подценуваа, не отпишуваа. А ние стоевме исправени – со достоинство, со срце, со верба. Сега е моментот да покажеме дека нашата истрајност не била залудна. Да му дадеме на Центар она што го заслужува чиста, праведна и човечна општина“.

Среброва заврши со зборовите: „Другари, нема предавање. Затоа што за Центар треба да се дише. Треба да имаме Центар што мисли и Центар што не се продава. Време е, затоа што Центар не е касаба.“.

Патот до Струмица е нашата главна врска со еден од најважните економски центри во регионот, вели Петар Ружински, кандидат за градоначалник на општина Берово.

„Со години тој пат е во лоша состојба, небезбеден и полн со дупки, што го отежнува патувањето и транспортот на стоки.

Во соработка со Владата предводена од ВМРО-ДПМНЕ, како врвен приоритет ја поставуваме целосната рехабилитација на овој патен правец.

Тоа значи темелна обнова на подлогата, комплетно нов асфалт и нова модерна сигнализација“.

Според него, подобрата поврзаност значи побрз економски развој и поголема безбедност за сите.

„Заокружете го бројот 9 за проекти кои не поврзуваат“.

Носителот на листата на советници на „Коалицијата за зелена иднина“ во општина Центар и ко-претседател на зелената партија ДОМ, Антони Новотни, во видео-обраќање ја претстави својата визија за почесна, зелена и пристапна општина со јасни правила што важат за сите.

„Знам како изгледаат заморот и анксиозноста со кои многумина живеат во нашиот Центар — од нечист воздух и врева, до изгубени зелени површини,“ порача Новотни, нагласувајќи дека решението почнува од одговорно управување.

„Чистата општина започнува со чиста совест и правила што важат за сите“, вели Новотни.

Новотни подвлекува дека јавниот интерес мора да биде над поединечните привилегии и бизнис интереси.

„Во Центар, јавниот интерес мора да стои пред туѓите привилегии. Општината не смее да биде трофеј на градежните бизнис интереси,“ нагласува Новотни.

Како приоритети, тој ги наведе зелените и тивки јавни простори, пристапноста „од тротоари до институција“, како и транспарентна трага за секоја општинска одлука.

Говорејќи и од перспективата на лекар, Новотни ја поврза урбаната средина со јавното здравје.

„Како лекар, знам дека квалитетот на урбаното живеење влијае на здравјето. Затоа велам — зелено, чесно и заедно“, порачува Новотни, притоа истакувајќи дека ќе води локална политика што „го штити достоинството на секој човек и го враќа чувството на сигурност во секојдневниот живот.“

„Ни треба зелен, тивок и пристапен простор; ни требаат паркови пред паркинзи. Центар ќе биде општина за живеење, а не за преживување. Ако ова е и ваша мерка за политика, застанете со нас — со Коалицијата за зелена иднина“, порачува до жителите на општина Центар носителот на листата на советници на „Коалицијата за зелена иднина“, Новотни.