Соопштенија
ДОМ со резолуција против изградба на мали хидроцентрали во Европа и на Балканот

Зелената партија ДОМ учествуваше на 32 Совет на Европските зелени партии, кој поради Ковид-19 пандемијата се одржа онлајн, од 2-6 декември годинава.
Настанот беше организиран од Европската зелена партија заедно со полската Зелена партија-Partia Zieloni. На Советот како делегатка од ДОМ, со право на глас учествуваше Маја Морачанин, претседателката на партијата.
Како што посочуваат од ДОМ, во рамките на сесиите биле предложени и усвоени следните резолуции:
– Владеењето на правото е во срцето на Европската Унија-Ние треба да го заштитиме;
– Да им дадеме на реките нов живот за да го сочуваме нашиот;
– За европска иднина без јаглен-Запирање на рудникот за јаглен во Туров, Полска;
– Права на трансродовите граѓани овде! Права на трансродовите граѓани сега!;
– Право да се протестира;
– Озеленување на Источно-Европското партнерство;
– Опоравување од Ковид-19, градење на одржлив туристички сектор низ цела Европа и резолуцијата ЕУ која делува во поддршка на мирот и правото на самоопределување во Западна Сахара.
Со резолуцијата „Да им дадеме на реките нов живот за да го сочуваме нашиот“, чиј ко-предлагач е и Зелената партија ДОМ, се бара од властите на Балканот и во цела Европа да запрат со градење брани и мали хидроцентрали во заштитените подрачја и да ги забранат субвенциите со кои се поттикнува градењето мали хидроцентрали.
„Градењето мали хидроцентрали предизвикува сечење на шумите, нарушување на водните текови, уништување на речната флора и фауна. Реките се пренасочуваат во цевки што го суши земјиштето и отвара пат за потенцијална ерозија. Некои села го загубија пристапот до вода за добитокот или земјоделие, а загубата на шумите придонесува за почести поплави. Изградбата на мали хидроцентрали не само што доведува до неповратно уништување на животната средина, туку може и да го уништи животот на локалното население преку уништување на нивното земјоделско земјиште и со предизвикување раселување на населението. Браните не треба да да се градат во области подложни на земјотреси, како што е Балканот”, се истакнува во резолуцијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Соопштенија
Трајановски: Контрола врз загадувачите и редовно чистење на дивите депонии

Контрола врз загадувачите и редовно чистење на дивите депонии ветува Александар Трајановски, кандидат за градоначалник на општина Аеродром од ДСМ.
„Аерозагадувањето е сериозен проблем за здравјето на граѓаните, не само во Општина Аеродром, туку и на ниво на целото Скопје. Во зимскиот период, алармот за загаден воздух е многу висок. Нашите деца, повозрасните, хронично болните, сите ние ја чувствуваме оваа закана врз здравјето и квалитетот на живот. Како општина, мораме да преземеме одговорност. Затоа, планираме контрола на загадувачите и редовно чистење на дивите депонии. Ќе воспоставиме континуиран мониторинг на сите регистрирани и потенцијални извори на загадување, со транспарентни податоци достапни за граѓаните. Паралелно, ќе понудиме субвенции за граѓаните кои ќе преминат на еколошки системи за затоплување, со што директно ќе се намали емисијата на штетни честички. Општината ќе вложи и во едукација: подигање на еколошката свест преку кампањи, работилници и училишни програми. Борбата против загадувањето е заедничка задача“, вели тој.
Соопштенија
Реконструкција на училишта, нови сали и современи ИТ кабинети во програмата на ЗНАМ

Движењето ЗНАМ – За наша Македонија денес одржа прес-конференција посветена на образованието во Куманово, нагласувајќи дека тоа е најголемата инвестиција во иднината на градот и неговите жители.
„Квалитетното образование мора да биде право, а не привилегија. Нашата цел е секој ученик и студент да има современи услови за учење и развој, а општината ќе продолжи да вложува во подобрување на наставниот процес, спортските капацитети и инклузивноста,“ беше истакнато на прес-конференцијата.
Во програмата за следниот период се предвидуваат реконструкција и доопремување на централните и подрачните училишта, со акцент на енергетска ефикасност и пристапност за лицата со попреченост, нови и реконструирани училишни спортски сали, современи ИТ кабинети и технолошки зони, уредени училишни дворови со осветлување и нова урбана опрема, целосна реконструкција на повеќе основни училишта и спортски сали низ Куманово и околните населби и промоција на инклузивна средина во сите училишта.
„Нашата визија е преку образованието да создадеме генерации подготвени за предизвиците на новото време, но истовремено свесни за своите корени, култура и вредности. Секој млад ум е искра надеж за подобро утре, а токму образованието е силата што ќе го движи Куманово напред,“ порачаа од Движењето ЗНАМ.
Соопштенија
Бујар Османи најави план за дивоградбите во Чаир

Кандидатот за градоначалник на Чаир, Бујар Османи, на прес-конференција вети итни мерки за решавање на проблемот со дивоградбите, нагласувајќи дека граѓаните кои биле измамени нема да бидат жртви на урбаната мафија.
Како што појасни Османи, работа на кризниот штаб, што ќе биде формиран за таа намена, ќе биде мапирање на дивоградбите и нивна темелна проверка за да се утврди дали ги исполнуваат стандардите за безбедно домување.
„Најпрво е тестирање на структурната стабилност на тие згради, бидејќи нашите информации велат дека, брзајќи да се завршат процедурите, не се почитувале правилата на статиката, динамиката, механиката, приклучоците на електричната мрежа, пристапот до вода, и тие објекти се нестабилни. Оценките на некои архитекти се дека еден земјотрес со многу помала јачина може да ги урне. Не се преземени мерки ниту за противпожарна заштита“, рече Османи.
Тој истакна дека поради непочитувањето на принципите на градба, семејствата што живеат во овие згради поминуваат низ вистински хорор секојдневно.
„Имав можност да се сретнам со група семејства од една од зградите на Серава, која е вистинска карикатура или црна дамка на управувањето со Општината изминативе 20 години. Нивните приказни се потресни. Луѓето биле измамени со сосема поинаков приказ на зградата, висината на зградите им била претставена поинаку. Денес тие живеат таму без ниту еден документ, иако ги потрошиле целите животни заштеди. Нивните станови биле препродавани по десет пати. Тие се искачуваат до десетти кат без лифт, бидејќи не е изграден. Јавните простори и ходниците им се продадени на луѓето за комерцијални цели. И сето ова било овозможено во 2011 година, кога мојот противкандидат бил на функција за издавање дозволи“, рече Османи.
По проверките, како што појасни Османи, доколку зградите го поминат тестот на издржливост и стабилност ќе се работи на изнаоѓање начин на нивно легализирање, за граѓаните да ги добијат потребните документи и да можат мирно да спијат.
„Тоа е прво. Второ, начинот на кој се носеле овие одлуки и како се легализирале на нелегален начин е прашање за Јавното обвинителство, кое ќе го истражи тоа. Но, ние веднаш ќе направиме ревизија на сите прашања и на целата документација во секторот за урбанизам“, истакна Османи.