Ќе го решиме проблемот со сообраќајниот хаос во центарот на Прилеп, обиколниците ,,Исток“ и ,,Запад“ се огромни капитални проекти, изјави Дејан Проданоски, кандидат за градоначалник на Општина Прилеп од редовите на ВМРО-ДПМНЕ.

„Нашата програма не е само лист хартија и празно ветување. Тоа се реални проекти за подобар живот на прилепчани. Еден од најголемите приоритети претставува изградбата на обиколниците ,,Исток“ и ,,Запад“ современи сообраќајни решенија кои ќе ја променат иднината на Прилеп. Обиколницата ,,Исток“ во должина од 1,6 километри, и профил оф 5,5 метри ќе биде директна артерија што ќе ги насочи тешките товарни возила, надвор од срцето на градот. Таа ќе се протега од стариот пат кон вештачкото езеро, преку склештен мост се до клучката за новиот автопат. Со тоа ќе се растовари центарот, ќе се намали метежот и загадувањето, а прилепчани ќе добијат почист воздух и мирен сообраќај низ централното градско подрачје. Обиколницата ,,Запад“ е огромен капитален проект, долга 4,5 километри со модерен профил од 26 метри кој ќе опфати коловозни ленти, велосипедски и пешачки патеки. Новата траса ќе ја поврзе делницата од Мебел Венеција преку Варош па се до фабриката за Мермер на улица ,,Леце Котески“ и натаму до ,,Црн Бор“. На оваа траса ќе изградиме два надвозници и еден мост овозможувајќи безбеден брз и европски сообраќај за нашиот град. Со реализација на овие два проекти, ќе се реши еден од најголемите проблеми на Прилеп, сообраќајниот хаос во центарот. Но уште поважно, ќе се создатат нови можности за економски развој, бизнисот ќе добие полесен пристап до автопатот што значи нови инвестиции и отворање на нови работни места“, рече Проданоски.

Растоварувањето на срцето на градот, додаде тој, е вистински избор за современ европски и успешен Прилеп.

Кандидатот за градоначалник на Чаир, Бујар Османи, денеска на прес-конференција најави, како што кажа, радикален пресврт во управувањето со општината и конечно искоренување на корупцијата.

„Корупцијата е трулиот корен на сите проблеми во Чаир. На 19 октомври тој корен ќе го сосечеме и ќе го уништиме. Еден денар нема да дозволам да се злоупотреби од парите на граѓаните. Тоа не е праведно, тоа не е чесно, тоа не е визија за иднината,“ истакна Османи.

Во своето обраќање, тој го претстави планот „Граѓанско око“ кој го оцени како најмоќниот механизам против корупција.

„Станува збор за сет од четири антикорупциски реформи кои, според него, ќе ја претворат Чаир во најтранспарентната општина во државата. Планот опфаќа јавно отворање на сите тендери со пренос во живо и достапни снимки на интернет, независен мониторинг преку експерти и невладини организации специјализирани за антикорупција, јавна каса преку која секој граѓанин со еден клик ќе може да ги следи приходите и расходите на општината во реално време и автоматска контрола со вештачка интелигенција која ќе го елиминира човечкиот фактор во злоупотребите. Чаир ќе биде првата општина во регионот која ќе воведе вакви европски практики. Доста беше со тајни договори и злоупотреби. Од 19 октомври, секој денар ќе оди за граѓаните,“ порача Османи.

Во изминатиот мандат успеавме да изградиме осум нови спортски терени, дел на вештачка трева, и дел на најсовремена тартан подлога, а во моментот градиме уште два – едниот на Полјана во Хром и вториот на ул.„Шидска“, изјави градоначаланикот на општина Ѓорче Петров, Александар Стојкоски, кој се кандидира за нов мандат од редовите на ВМРО-ДПМНЕ.

„Во новата програма се обврзуваме на дополнителни работи во делот на спортската инфраструктура, изградба на три нови современи спортски комплекси – во Стопански Двор, во Волково-Пржина и во месноста викана Полјана во Кучково каде што Ѓорче Петров ќе ја добие и првата арена на спортовите. Дополнително, се обврзуваме да инвестираме во изградба на нова спортска сала за учениците од ООУ „Јоаким Крчоски“-подрачното во с.Никиштане, да извршиме реконструкција и да прераснат во спортски центри дворовите на ООУ „Тихомир Милошевски“, и ООУ „Ѓорче Петров“. Ќе поддржиме и ќе ја зголемиме поддршката за индивидуалните спортисти и за колективните спортови. Свесни сме и работиме на тоа да во Ѓорче Петров секој еден има услови да се развива и да се гради низ спортот. Ќе продолжиме со поддршка на општинскиот училишен спорт и на лигите, ќе продолжиме со поддршка на традиционалните турнири во Ѓорче Петров. Спортот е здравје, спортот е начин на живеење, спортот е она што е иднината за секое наше дете овдека во Ѓорче Петров“, рече Стојкоски.