Претседателот на СДСМ, Венко Филипче, на вчерашната граѓанска трибина во Штип во своето обраќање ја истакна исклучителната посветеност на кандидатот за градоначалник, Павел Иванов, како пример за чесност, храброст и верба во социјалдемократските вредности.

„Пред повеќе од една година, по тешкиот пораз на изборите, требаше да се обноват општинските организации. Првата организација што ја средувавме беше штипската. Му се обратив на Павел, го прашав дали е подготвен да ја преземе одговорноста. Тој прифати, иако знаеше дека може да ја изгуби својата работа. И навистина ја изгуби, но остана чесен, храбар и посветен. Тоа е вистинска љубов кон СДСМ и кон социјалдемократските вредности,“ изјави Филипче.

Тој исто така нагласи дека токму таквиот карактер го прави Иванов најдобриот избор за Штип. Филипче воедно зборуваше и за значењето на слоганот на СДСМ „Борба за домот“, истакнувајќи дека тоа е продолжение на историските борби за слобода и правда, од Илинден, преку антифашистичката борба, до денес.

„Нашиот народ точно знае кога некој сака да го угнети, да го замолчи или да го ограби токму тоа што сега го прави ВМРО-ДПМНЕ. Затоа, Штип со Павел и со сите чесни, отворени и работливи кандидати за советници, чесни отворени работливи луѓе, ќе покаже дека победата е на дофат,“ порача претседателот на СДСМ.

Филипче пред штипјани зборуваше и за работата на актуелниот градоначалник Иван Јорданов кој има 90% нереализирана програма, глас за втор мандат и слабост во соочување на дебати.

„Со Јорданов 4 години Штип е без реконструкција на водоводни мрежи, без проекти за заштита на животната средина. Нема гасификација, нема фотоволтаици. Ги остави граѓаните без редовно водоснабдување, да се гушат во чад и смет кој не се собира редовно. Ама затоа цените на основните услуги и даноци ги зголеми. Ете ова е сликата за вледеењето на Јорданов. 4 години загубено време. 4 години застој и разочарување наместо прогрес и развој на Штип. И затоа и бега од дебата со единствениот против-кандидат, кандидатот на СДСМ, Павел Иванов. Бега бидејќи нема како да го брани своето недомаќинско работење“, рече Филипче набројувајќи ги проектите кои остана само ветување од 2021 година на ВМРО-ДПМНЕ.

Кандидатот за градоначалник на Општина Центар од редовите на СДСМ, Горан Герасимовски, денеска ја претстави новата мерка за менторско учење и дополнителни часови, зацртана во идната програма.

Во разговор со група пензионирани наставници, тој посочи дека целта на оваа иницијатива е да се обезбеди поддршка за учениците кои потешко ја совладуваат наставата, како и за надарените ученици кои се подготвуваат за натпревари.

„Недостигот на наставен кадар е системски проблем на ниво на државата, затоа одлучивме да ве ангажираме вас, нашите искусни наставници, кои иако во пензија, можат да помогнат во едуцирањето и споделувањето на своето знаење. Вашиот ангажман ќе значи многу и за училиштата, но и за семејствата. Учениците ќе добијат квалитетна едукација, наместо родителите да плаќаат приватни часови,“ истакна Герасимовски.

Пензионираните наставници ја поздравија мерката и изразија подготвеност да се вклучат во проектот, од кој, велат, ќе имаат корист учениците, родителите и активниот наставен кадар, кој ќе биде растеретен.

Со оваа инцијатива, како што е соопштено, ќе им се овозможи на наставниците во пензија да останат активни во образовниот процес и да го пренесат своето знаење на помладите генерации,

Овие избори ги сојузија едни од најголемите манипуланти и штетници во Македонија против ВМРО-ДПМНЕ во две не толку видливи но сепак проѕирни коалиции, коишто имаат за цел да зашитат два бизнис интереси, истакна на прес-конференција нтонијо Милошоски, член на ИК на ВМРО-ДПМНЕ .

Првата коалиција, како што рече, е коалицијата помеѓу ДУИ и Левица.

„Левица извади свои прокси кандидати во Струга и во Тетово, се со цел за да го спасат ДУИ од пораз во прв круг во овие две општини. Тоа е истата онаа Левица и истиот Апасиев, кои го помагаа СЈО за дебели хонорари.

Апасиев нема кандидат во Штип, каде што има пратеник Крмов, затоа што знае дека ќе изгуби. Апасиев нема кандидат во родниот Велес, затоа што знае дека ќе биде поразен, но во Струга и во Тетово, каде што на сите им е јасно дека немаат ниту теоретски шанси, Левица има кандидати за градоначалници коишто треба да служат како гума за спасување на кандидатите на Али Ахмети.

Пратеничката Јована Мојсоска имала средба со висок претставник на коалицијата на Ахмети, неколку дена пред да ја поднесе својата кандидатура за Струга. Дали се работи за истата Левица којашто за СЈО работеше за хонорари, и сега продолжуваат да шуруваат со Ахмети за одредени хонорари, времето набрзо ќе покаже“.

Втората коалиција, според Милошоски, е коалицијата помеѓу Венко Филипче и Стевчо Јакимовски којшто, според него, се наоѓа на црната листа на САД.

„Оваа коалиција ја прави лично Зоран Заев во име на Венко Филипче, бидејќи Зоран Заев и Стевчо Јакимовски се стари другари од едни претходни локални избори, имаат добро разработена шема со градежната мафија и со доделувањето на маркици во општина Карпош.

Во оваа коалиција гледаме дека кандидатката на СДСМ е кандидирана само ради реда, не се ни појавува на одредени митинзи, не се ни појавува ниту во јавност.

Планот е во иднина Карпош да му послужи и на Заев и на Филипче, но исто така и на Стевчо Јакимовски, да биде базата од каде што ќе се финансираат овие поединци, групи и нивните политички опции, преку коишто треба во иднина да делуваат“.

Милошоски додава дека е проѕирна коалицијата на Заев, Јакимовски и Венко Филипче, бидејќи, како што нагласи, маркиците за градба, тендерите, корупцијата им се побитни од владеењето на правото, и почитувањето на црната листа на САД, иако зборуваат за евроатлантски интеграции и стратешко партнерство со Америка.