Соопштенија
ОМД: Борбата против корупцијата е основен предуслов за европска перспектива
Групата земји од Советот на Европа со мандат да ја следи усогласеноста во стандардите во борбата против корупцијата и организираниот криминал, попозната како ГРЕКО, во својот последен извештај за Македонија ја нагласи потребата од значителни реформи и напори за конечно приближување на земјата до европските антикоруптивни практики.
Додека, според ГРЕКО, Македонија не бележи напредок во борбата против корупцијата во законодавната, извршната и во судската власт, според Обединетата македонска дијаспора (ОМД) борбата против корупцијата е основниот индикатор за тоа колку една земја е спремна за интеграција и членство во Европската Унија.
„Извештајот на ГРЕКО, кој ја вбројува Македонија во групата земји со разочарувачки напредок, укажува дека само шест од вкупно деветнаесет антикоруптивни препораки се спроведени во пракса. Според групата на Советот на Европа за борба против корупцијата, единствениот делумен напредок во Македонија е усвојувањето на измените и дополнувањата на Законот за Судскиот совет (од декември 2017 и мај 2018 година), а најголемото разочарување во земјата е забележано во контроверзното работење на Државната комисија за спречување на корупцијата (ДКСК)“, се вели во соопштението.
ОМД верува дека корумпираното работење на институциите не само што ја назадува Република Македонија и ѝ штети на нејзиниот углед како држава туку воедно го одложува и нејзиното членство во Европската Унија. Очекувањата дека со промена на името на земјата Македонија би се стекнала со кандидатски статус во Унијата, во кои околности пробемот со корупцијата би станал минато, ОМД верува дека се погрешни.
Според ОМД, решавањето на проблемот со корупцијата е предмет на домашна политика и предуслов за членство во Европската Унија, а не променлива вредност зависна од меѓународниот фактор и бенефит од членство во европското семејство.
Со цел успешно справување со корупцијата и подобрување на угледот на Република Македонија во меѓународната заедница, ОМД препорачува користење на придобивките од технолошкиот развој во следење на работата на институциите, поставување унифицирана казнена политика, која важи еднакво за сите, без право на политички имунитет, практикување поголема инклузивност на владиниот, цивилниот, корпоративниот, академскиот и медиумскиот сектор во донесувањето одлуки, препознавање добри практики, кои би служеле како поттик и пример за другите општествени фактори, воведување транспарентност во институционалните расходи, поедноставување на бирократските процеси за поефективна администрација, како и имплементирање на меѓународните препораки и конвенции во борба против корупцијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Соопштенија
Митески: Паметен пристап до паркирањето, практично, економично и безбедно решение за Аеродром
Градоначалникот на Општина Аеродром и кандидат за нов мандат, Дејан Митески, најави решение за еден од најчестите проблеми со кои секојдневно се соочуваат граѓаните – недостатокот на паркинг места и хаосот во сообраќајот.
„Наместо нереални ветувања за катни гаражи кои бараат години и милионски буџети, општината се насочува кон брзо и практично решение, воведување еднонасочни улици со обележани ленти за паркирање. Не можеме да изградиме катна гаража за шест месеци, но можеме за шест месеци да обезбедиме до 800 нови паркинг места“, истакна Митески, додавајќи дека ова решение се базира на користење на постојната инфраструктура, без дополнителни големи трошоци.
Тој кажа дека оваа стратегија носи три големи придобивки за жителите на Аеродром: прво, значително се зголемува бројот на достапни паркинг места во густо населените зони, со рационално искористување на секој метар улица, второ, создава можност за воведување велосипедски патеки на делови каде што ширината тоа го дозволува, поттикнувајќи здрави и еколошки навики и трето, самата организација на еднонасочните улици природно го намалува брзото движење на возилата, придонесувајќи кон побезбедно и покултурно сообраќајно однесување.
„Со новиот сообраќаен режим, улиците ќе станат поуредени, побезбедни и попрактични. Наместо да вложуваме време и средства во невозможни проекти, се фокусираме на решенија што граѓаните ќе ги почувствуваат веднаш“, рече Митески.
Соопштенија
Ристески: Комплетна реконструкција на улицата Јане Сандански, продолжуваат инфраструктурните проекти во Македонски Брод
Комплетна реконструкција на улицата „Јане Сандански“, продолжуваат инфраструктурните проекти во Македонски Брод, вети Жарко Ристески, кандидат за градоначалник на општина Македонски Брод од ВМРО-ДПМНЕ.
„Денес, заедно со мојот тим извршив увид во градежните активности кои се одвиваат на крак од улица „Јане Сандански“. Вршиме целосна реконструкција на оваа улица, односно реконструкција на коловозната лента, пешачките патеки, подземните инсталации, а исто така ќе вградиме хоризонтална и вертикална патна сигнализација. Македонски Брод, во градското подрачје добива уште една безбедна улица“, рече тој.
Соопштенија
„Влен“: Гласот за НАИ е глас за Левицата
„Тежок политички скандал на овие избори се случува во Тетово. Фотографијата што кружи во медиумите, на која се гледа претставникот на НАИ во Тетово, Арди Исмаили, на средба со кандидатката на Левица, Катка Божиновска, е најјасен доказ дека оваа коалиција е подготвена да продаде каква било национална вредност само за да добие власт“, велат од „Влен“.
„Да не заборавиме која е Левица, партија која: јавно ги навреди Албанците, се изјасни против независно Косово, се спротивставува на членството во НАТО, побара затворање на џамиите и ограничување на правата на Албанците!
И денес, НАИ седи на маса со нив, за валкан изборен договор. Ова не е политика, ова е срамна зделка. Ова не е стратегија, ова е морален колапс.
Сега на секој граѓанин му е јасно: за да го задржат своето фотелја, тие се подготвени да се продадат на секоја сила што ги мрази Албанците.
Тетово, Дебар, Струга и секоја албанска општина треба да знаат, на 2 ноември, гласот за НАИ е глас за Левица, за антиалбанство и за политички срам. Додека ВЛЕН, со својот кандидат Билал Касами во Тетово, Фисник Мела во Дебар и целиот свој тим, претставува достоинство, развој и иднина.
Албанците не се пазарат со оние што ги навредиле. Албанците не се продаваат. Тие гласаат за промената што ВРЕДИ!“, се наведува во соопштението на „Влен“.

