Соопштенија
СДСМ:Скопје и граѓаните 11 години беа жртва на криминалите на ВМРО-ДПМНЕ

Градот Скопје и граѓаните на главниот град 11 години беа жртва на криминалите на ВМРО-ДПМНЕ. Наместо инвестиции за подобрување на квалитетот на живот и почиста животна средина, наместо урбано развивање на градот за граѓаните, ВМРО-ДПМНЕ и Коце Трајановски спроведоа немилосрдно уништување на се што можеа да уништат.Зеленилото во Скопје, по кое градот беше препознатлив, Коце Трајановски го масакрираше за задоволување на мегаломанските апетити на неговиот шеф, Никола Груевски за потребите на најкриминалниот проект„Скопје 2014“, се вели во соопштението на СДСМ.
Според партијата, граѓаните на Скопје беа оставени со години да се гушат во загаден воздух, нездрава животна средина, сообраќаен и урбан хаос, додека се трошеа стотици милиони евра за барокни фасади од стиропор, за жални врби во Вардар, палми, панорамски тркала…
,,Со промените Скопје се гради и се развива по нов урбан концепт кој работи за граѓаните и нивните потреби.За да се врати уништеното зеленило во последните шест месеци засадени се 4.000 дрва а оваа есен се планира да се засадат уште нови 8.000 висококвалитетни садници.За зазеленување на градот реконструирани и подигнати се повеќе јавни зелени површини на околу 40.000 квадратни метри. Во тек е обновата на нови 10.200 квадрати зелени површини на повеќе локации”, се додава во соопштението.
Според партијата, „Дрисла“ повеќе нема да го загадува воздухот. Обезбеден е и ставен во функција е новиот филтер за апсорбирање на ПМ10 честичките, јаглеродмоноксидот и другите честици што се ослободуваат при согорувањето.
,,Започната е постапка за набавка на над 30 нови автобуси на еколошко гориво, вредни над 10 милиони евра, со кои ќе се заменат старите дотраени дизел возила на ЈСП кои загадуваат.Градот Скопје работи на проектот за изградба на нов коридор со мост преку реката Вардар, што ќе го поврзе булевар АСНОМ кај хотелот „Русија“, преку Вардар, низ населбата Ќерамидница, се до раскрсницата кај скопското сајмиште.Изградбата на колекторскиот систем за одведување на отпадните води во реката Вардар е во тек.
Во деветнаесет средни училишта во Град Скопје ова лето ќе се изврши реконструкција и санација на објектите, дел од нив ќе добијат нови енергетски ефикасни фасади, а во дел ќе се врши реконструкција на внатрешноста и ќе се замени столаријата.Конечно Скопје пополека го враќа духот на солидарноста, на културниот живот, онака како што му доликува. Изложби, перформанси, работни и крводарителски акции, концерти и видео-проекции, се само дел од концептот кој ги обединува граѓаните околу вистинските вредности.Овој концепт криминалната матрица на ВМРО-ДПМНЕ не може да го разбере”, се вели во соопштението на СДСМ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Соопштенија
Ливриниќ: Вистинска грижа за бутелчани или прекршување на Изборниот законик на последниот ден на кампањата

Во мојата програма јасно најавив мерка за ослободување од надоместок за плаќање на оброк и ужина за сите деца на сите наши сограѓани во Општина Бутел – без исклучок и без поделби. Денеска, Советот на Општина Бутел усвои две мерки со слична содржина. Тоа не го сметам за проблем, напротив – го поздравувам и поддржувам секој чекор кој е во интерес на граѓаните, вели кандидатката за градоначалничка на Општина Бутел од СДСМ, Оливера Ливриниќ.
Но, како што вели, проблемот е начинот и времето на донесување на овие одлуки.
„Претседателот на Советот и градоначалникот Костовски добро знаат дека се наоѓаме во предизборна кампања, и тоа во последниот ден од истата, кога согласно закон е строго забрането донесување одлуки кои имаат финансиски импликации врз општинскиот буџет. Морале и можеле оваа мерка да ја донесат на законски начин на почеток на училишната година и пред изборната кампања“, вели Ливриниќ.
За жал, додава таа, со ваквите потези, мерките што се носат денес нема да имаат реален ефект врз граѓаните, бидејќи постои сериозна можност да бидат оспорени од Државната изборна комисија (ДИК) и Државната комисија за спречување на корупцијата (ДКСК).
Соопштенија
Насевска: Ќе ја реконструираме киносалата во Злетово

Од песните и ората преку театарот, ликовниот израз, модерниот балет, уметничкото творештво е пулсот на македонското битие. Свесни сме дека без вложување во културата и негување на традицијата ќе го изгубиме она што не прави препознатливи како народ, вели Марија Насевска, кандидат за советник во Советот на општина Пробиштип од ВМРО-ДПМНЕ.
„Затоа во програмата на идниот градоначалник, Тони Тоневски и советничката листа на ВМРО-ДПМНЕ и коалицијата, планираме инвестиции во нови простори за културни активности.
Реконструкција на кино салата во Злетово, кино на отворено, културни фестивали кои ќе промовираат локални уметнци.
Културата расте таму каде што се сее, а ние ја сееме со љубов и визија“.
Соопштенија
Трајанов: Да ги завршиме изборите во првиот круг

Претседателот на Демократски сојуз, Павле Трајанов, упати повик до членовите и симпатизерите на партијата, како и до сите граѓани, масовно да излезат во недела на 19 октомври и да гласаат за кандидатите за градоначалници и советници предложени од Коалицијата „Твоја Македонија“ предводена од ВМРО-ДПМНЕ. Со тоа, како што вели, изборниот процес би се заокружил уште во првиот изборен круг.
„Ова не се избори само за локалната власт, туку и определба за тоа дали ќе градиме држава со сите елементи, во која ќе продолжиме со коренити и суштински реформи и на брза лента ќе се движиме кон ЕУ, дали ќе воспоставиме систем на владеење на правото, дали ќе ја искорениме корупцијата, дали ќе отвориме перспективи за младите во сите средини, а посебно во руралните и дали Македонија ќе биде информатичка сила.
Имаме идеја и визија за Македонија како модерна држава, но за тоа ни е потребна поддршка од граѓаните в недела на 19 октомври, се вели во повикот на лидерот на Демократскиот сојуз“, Павле Трајанов.