Кандидатот за градоначалник на Општина Центар, Горан Герасимовски, денеска најави дека во новиот мандат почнува изградбата на нова современа детска градинка во непосредна близина на Клиничкиот центар „Мајка Тереза“.

Тој истакнува дека планираната градинка ќе биде модерен и функционален објект, изграден според највисоки стандарди за безбедност и квалитет, со капацитет до 100 деца.

„Градиме нова, современа градинка во непосредна близина на Клиничкиот Центар, кадешто ќе може да се згрижат 100 деца. Оваа градинка ќе биде изградена по највисоки стандарди за безбедност и квалитетот, по примерот на градинката „Пролет“ која во моментов е најубавата и најмодерната градинка во државата. Со отворање на новата градинка, создаваме нови можности за вработување за околу 25 воспитувачи, негуватели, стручни соработници и помошен персонал“, рече Герасимовски.

Се залагаме Автокоманда да стане новиот центар на градот модерна, функционална и урбано уредена населба која ќе им нуди на граѓаните квалитетен живот и решенија за сите долгогодишни проблеми, истакна Влатко Митовски, кандидат за градоначалник на Гази Баба од редовите на СДСМ.

„Денес се наоѓам токму на местото каде што ќе ја изградиме новата катна гаража, која ќе биде наменета за сите граѓани кои секојдневно работат во околните компании и институции. Покрај оваа, ќе изградиме уште две катни гаражи првата на постојниот паркинг на ул. „Јани Лукровски“ до плоштадот, а втората на асфалтираниот паркинг на ул. „Лазар Поп Трајков“.

Со тоа ќе ставиме крај на хаосот со паркирањето, а дополнително сообраќајниот метеж ќе го решиме со воведување еднонасочен режим на улиците низ населба“.

Најави дека ќе се зафати со целосно уредување на како што рече, уништеното зеленило и пешачки патеки, „кои со години беа жртва на градежно дивеење“.

Автокоманда, според него, заслужува да биде пример за урбанистички развој.

„Затоа ќе изградиме и нов парк за миленици, како дел од нашата визија за модерна и зелена животна средина.

Ова е само почетокот на една нова приказна приказна во која Автокоманда ќе стане гордоста и новото срце на Скопје“.

Инвестициите во градинките, не се само инвестиции во објекти, туку во иднината на нашите најмили, изјави кандидатот за градоначалник на Општина Илинден од ВМРО-ДПМНЕ, Александар Георгиевски.

„Во секое семејство, во секое дете, покажавме дека посветеноста, визијата и континуираната работа создаваат современи, функционални и топли простори во кои децата растат безбедно и среќно. Затоа, ќе изградиме нова детска градинка, со цел да им помогнеме на семејствата да добијат поголема достапност на квалитетна предучилишна грижа. Современи и безбедни простории за згрижување, и развој на дечињата“, рече тој.