Коста Маневски, кандидат за градоначалник за општина „Зелениково“ од редовите на ВМРО-ДПМНЕ, на денешниот митинг одржан во рамките на изборната кампања, под слоганот „Вистинскиот избор! Твојот човек! Твоето место! За твојата иднина!“, се обрати и истакна дел од реализираните проекти во општината за време на неговиот четиригодишен мандат.

„Успеавме да ја реконструираме главната локална улица во должина од 3500м од Орешани до Станица Зелениково, асфалтиравме три нови улици во Пакошево, реконструиравме локален пат во Ново Зело, асфалтиравме и локален пат во Орешани кој води до индустриската зона Џамбовица, извршивме реконструкција на патот до Страхојадица, и на дел од патот во Бабин Дол, изградивме нови пешачки патеки и тампонирање на патот до селата Тисовица, Гумалево, Дејковец и Добрино како и тампонирање на земјоделски патишта. Набавивме и нови возила за собирање и транспорт на отпад кои се со различна кубикажа. Сите училишта, централното и подрачните, беа предмет на реконструкција. Обезбедив бесплатни униформи за учениците. Изградивме четири нови детски паркови, поставивме и нови модерни, инклузивни автобуски постојки“, истакна Маневски.

Маневски исто така наброи и дел од проектите на изборната програма.

„Прво инвестиравме во економијата и новите работни места. Создаваме нова индустриска зона помеѓу Таор и Р’жаничино, формираме локален бизнис-центар кој ќе ги поддржи младите претприемачи со едукација, пристап до фондови и грантови. Второ инвестираме во образованието и младите. Продолжуваме со дигитализација на училиштата, набавка на паметни табли, компјутери и проектори. Финансираме младински проекти, воведуваме стипендии до 15.000 денари, градиме нова спортска сала во Зелениково и мултифункционално игралиште во Пакошево. Го регулираме коритото на Зелениковска Река, за безбедна и уредна околина. Ветувам нова индустриска зона! Ветувам изградба на спортски комплекс Јурија, парцели за млади брачни парови за домување, ќе изградам нов пат помеѓу Таор и Пакошево“, посочи Маневски.

Повика да се направи вистинскиот избор и да се заокружи бројот 9.

„Росоман е пример дека кога локалната власт работи со срце, резултатите се гледаат“, порача претседателот на СДСМ, Венко Филипче, на граѓанската трибина во Росоман „Се бориме за нашиот дом“.

Филипче нагласи дека градоначалникот Стојан Николов за овие години покажа што значи вистинско водење на општината во интерес на граѓаните:

„Над 45 проекти се завршени комплетно, многу улици, плоштад, ново улично осветлување, детски игралишта, водоводи, канализации, покриен пазар, доградба на детската градинка, парк. Стојан Николов ја врати довербата во институцијата што треба да биде најблиску до човекот.“

Тој порача дека Росоман е доказ дека со план, со програма и со луѓе што ја сакаат општината, може да се создаде средина во која се живее подобро.

„Вашата поддршка за Стојан Николов е глас за да продолжи напредокот на Росоман, да не им го оставиме на оние кои ја гледаат општината како плен. Таа ваша поддршка не е само за еден човек, туку за идејата дека политиката може да биде чесна, фер и посветена на граѓаните“, истакна Филипче.

Претседателот на СДСМ потенцираше дека овие локални избори не се обични избори туку на нив се одлучува и како ќе продолжи Македонија понатаму.

„Се бориме за земја што ќе го вреднува трудот. Се бориме за фер цена, за навремена исплата, за сигурен откуп. Се бориме за работниците, за минимална плата над 500 евра, за држава во која секој ќе може да живее достоинствено од она што го создава. Се бориме за младите да не се иселуваат, тука да ја гледаат својата иднина“, рече Филипче.

Претседателот на СДСМ повика на масовна излезност на изборите на 19 октомври и побара поддршка за кандидатите на СДСМ и коалицијата.

„Општина Аеродром е единствената општина во Македонија која нема сопствена зграда. Општинската администрација 20 години функционира во супстандардни услови, во објект за кој плаќа 120.000 евра годишно. Само во последните 4 години Општина Аеродром има потрошено половина милион евра по основ на кирии“, вели д-р Александар Трајановски, кандидат за градоначалник на општина Аеродром од СДСМ.

„Трагедијата да биде уште поголема Тимчо Муцунски пред 4 години ја избриша маркицата каде што СДСМ планираше модерен објект за општинска зграда со готов проект за изведба. На таа локација пред 2 години требаше да биде подигнат паркот „Радост“.

По 4 години реалноста е поразителна. Ни парк, ни општинска зграда немаме на таа локација.

По изборите ја започнуваме постапката за изградба на современ, функционален и енергетски ефикасен објект за општинската администрација, во кој граѓаните ќе ги добиваат сите услуги на едно место.

Новата зграда ќе биде репрезентативен симбол на општината, со мултимедијален центар за млади, повеќенаменски сали и современа сала за венчавки, простор кој ќе им служи на сите жители на Аеродром.

Време е конечно Општина Аеродром да добие сопствен дом, достапен и отворен за сите“, соопшти д-р Александар Трајановски, кандидат за градоначалник на општина Аеродром.