Кандидатот за градоначалник на ВМРО-ДПМНЕ за општина Карбинци, Виктор Паунов, на денешниот митинг во рамките на изборната кампања под слоганот „Вистинскиот избор! Твојот човек! Твоето место! За твојата иднина!“. Паунов се осврна на досега сработеното во изминатите четири години, потенцирајќи дека и покрај 3-годишните опструкции од страна на централната власт, посветеното работење резултираше со реализација на многубројни проекти во патната инфраструктура, расчистени диви депонии како и изградба на нови училишта и детски забавни паркови.

„Реализирани се бројни проекти во делот на патната инфраструктура: вкупно 46 улици во целата општина добија асфалт. Реконструирани и модернизирани се 5 мултифункционални игралишта. Изградивме 2 нови училишта во Таринци и Радање, пет нови детски забавни паркови ги красат нашите населени мести кои пружат можност за рекреација, забава на најмалите, расчистени се сите 6 диви депонии во 6 населени места кои беа опасност по животната средина, подземните води, а и воздухот во Карбинци, тоа беа депонии кои беа стари ѓубришта со децении!“, вели Паунов.

Паунов истакна дека следниот четиригодишен мандат ќе се темели врз неколку основи т.е. столба како обезбедување на нови плацеви за домување, нова спортска сала, велосипедска патека, а воедно посочи дека патната инфраструктура ќе биде повторно во фокусот и следните четири години.

„Следниот четиригодишен мандат ќе го темелиме врз неколку основи или врз неколку столба, обезбедување на 150 нови плацеви за домување, една нова населба помеѓу населените места Карбинци и Таринци, која ќе го добие името „Вршник“, според историската населба во атарот на село Таринци. Нова спортска сала со којашто ќе обезбедиме можност за спортување, услови за спортските клубови кои ги формиравме во општина Карбинци, а тоа се индивидуалните спортски клубови, боречките клубови „Киро Ристов“ и БК Карбинци и карате клубот којшто исто така функционира на територија на општина Карбинци, ќе обезбедиме можност за спортување и натпреварување. И оваа спортска сала ќе има карактер на натпреварувачка сала којашто ќе понуди и програма за различни видови на спортови. И ќе споменам уште 2 покрупни проекти, велосипедска патека долж регионалниот пат од село Таринци до Карбинци во должина од 1.8 км. Патека која е важна и за безбедноста, но и за рекреативците во овој дел од општината. Со тенденција да ја продолжиме од Карбинци во една втора фаза до локалитетот „Баргала“ со должина од дополнителни 4.8 км. Во делот на патната инфраструктура, којашто исто така ќе биде во фокусот и во следните четири години. Клучниот патен правец од село Карбинци до селото Радање целосно ќе го реконструираме во должина од 4.5 км“, појасни Паунов.

Претседателот на ВМРО-ДПМНЕ, Христијан Мицкоски на денешниот митинг во Карбинци кој е во рамки на кампањата за локалните избори која се води под слоганот „Вистинскиот избор! Твојот човек! Твоето место! За твојата иднина!“ се осврна на сработеното од градоначалникот Виктор Паунов, а се осврна и што се може да се направи таму.

„Честитки за сработеното до сега и да продолжи и понатаму со интензивна работа. Сметам дека треба да се размисли да се посвети внимание на демографијата, бидејќи џабе ни се улиците, училиштата, доколку младите не се мажат не се женат и не се формираат многудетни семејства“, рече Мицкоски.

Во оваа насока Мицкоски и со конкретен предлог:

„Да се определи населба за млади брачни парови со парцели од по едно евро квадрат и да бидат ослободени од комуналии. И на тој начин кога ќе формираат заедница, ќе имаат куќа, полесно е да се имаат повеќе деца и мислам дека ова треба да биде приоритет. Ние како Влада ќе помогнеме се што можеме согласно ингеренциите“, вели Мицкоски.

Иако рече тој, ова се локални избори, тоа не значи дека има само локални прашања.

„Овие избори имаат малку поголемо значење и испраќаме пораки и за државни теми бидејќи така допираме и до противникот. За прв пат наместо со промоција со црна кампања со ниски страсти, измислици, дефокус од реалноста. Мојот одговор е ако не го прават тоа, тогаш што ќе прават. Граѓаните видоа што направија за седум години, не само што ништо не направија, туку многу процеси и уназадија, а и ја ограбија државата, народот“, посочи Мицкоски.

Носителката на листата на советници од Движењето ЗНАМ – за наша Македонија и актуелен претседавач на Советот на општина Куманово, Ивана Ѓорѓиевска денеска пред медиумите ги претстави приоритетите за идниот мандат во делот на урбаниот плански развој на општината.

Како што рече носителката на листата Ѓорѓиевска, со современи урбанистички решенија и модерна инфраструктура, Куманово ќе продолжи да се развива во поуреден, подостапен и пофункционален град.

„Создаваме средина во која секој граѓанин ќе има пристап до квалитетни јавни простори, сигурен сообраќај, зелени површини и современи содржини за рекреација, а воедно ќе се зачува и надгради урбаниот идентитет на градот. Куманово мора да се развива организирано, планирано и во интерес на граѓаните, за да остане град со јасна визија и стабилна иднина“ нагласи Ѓорѓиевска.

Затоа, вели таа во програмата на Движењето ЗНАМ е предвидено:

· Нов Генерален урбанистички план (ГУП) со проширен плански опфат и урбанизација на населбите: Карпош, Ајдучка Чешма, Иго Тричковиќ, Говедарски Пат и Железничка Станица.

· Ширење на градскиот опфат и планирање на нови урбани блокови со стандардизиран изглед на наменски зони планирани за домување.

· Инклузивно и одржливо урбанистичко планирање со фокус на јавниот интерес пред интересот на поединецот.

· Урбаните месни заедници ќе останат појдовна точка за учество на јавноста во процесите на урбанистичкото планирање.

Зацртани се и серија активности со кои треба да се остварат целите во урбаниот развој, како отстранување времени објекти кои го узурпираат јавниот простор. Изградба на

административно-деловен комплекс на локалитет Чоробенско ќоше и нов плоштад, подземна катна гаража со голем капацитет, и зелен урбан сквер поврзан со градскиот плоштад.

Дислокација на монтажната катна гаража пред нов Младински центар во НУЦК – Трајко Прокопиев, веднаш по изградба на подземниот паркинг во центар.

Планиран е нов урбан сквер и шеталиште до Спортската сала по должина на булеварот, спротив Градскиот кеј.

Ќе се уреди речното корито, ќе се реконструираат изворите со минерална вода во село Проевце, ќе се изврши уредување на просторот наменет за нови Градски гробишта и ќе се изврши реконструкција на фасади на сите значајни објекти во централното градско подрачје, како и повеќе други проекти.

Куманово, најави Ѓорѓиевска, ќе се развива урбано со тоа што плански ќе се организира просторот. Со тоа ќе се подобри и квалитетот на животот на граѓаните и ќе се заштити животната средина и, при тоа, ќе создадат услови за одржлив економски и социјален развој.