Соопштенија
Форумот за демократска Македонија бара да им се стави крај на партиските и роднинските вработувања
Форумот за демократска Македонија (#ФДМ) смета дека загрижува растечката тенденција на незаконски дејства на владејачката коалиција во Македонија. Главни белези на управување со државата стануваат сомнежите за корупција, непотизам, партиски вработувања, сомнителни тендери и набавки на луксузни возила (како, на пример, во локалната самоуправа во Струга и деновиве во МЕПСО). Понатаму, се именувваат лица на одговорни места во управни и надзорни одбори во важни државни институции, без да имаат соодветно образование и професионална експертиза.
ФДМ остро реагира на мноштвото примери за непотизам, кои наидуваат на жестока критика во јавноста, но поминуваат без соодветни владини реакции, како оставки или разрешувања од одговорните работни места. Станува збор за десетици роднински вработувања во компаниите ЕЛЕМ и МЕПСО, како и 87 нови вработувања во РЕК „Битола“.
„Особено разочаруваат политичките компромиси во судскиот систем и владеењето на правото во државата. На пример, според новиот Закон за јавното обвинителство, во случаите на СJO отворени по 20.6.2017, прислушуваните разговори не ќе може да служат како докази во многу важни истраги за корупција – онаа за пропаднатиот попис со име „Попис“, во истрагата „Пациент“, ниту во истрагите „Подарок“, „Базни станици“, „Хармонија“ и „Моќник“. Загрижува фактот дека овие истраги се водат против лица што биле и сè уште се на високи политички функции и донесуваат важни одлуки за животот и иднината на сите граѓани во Македонија.
Наведените примери, како и нетранспарентното и пристрасно управување со државни ресурси и материјалните средства, како, на пример, бескрупулозното уништување на охридското крајбрежје и скорешната распределба на буџетот во Министерството за култура, тендерите во здравството и грантовите на Фондот за иновации, доведуваат до топење на довербата во сегашната владејачка коалицијa“, се вели во соопштението.
ФДМ смета дека изговорите и оправдувањата на сегашната владејачка гарнитура за неспроведувањето на ветените реформи, за неправилностите во работењето и отсуството на отчетност, не се разликуваат многу од недемократското и корумпирано владеење на претходната власт, а сегашна опозиција. ФДМ понатаму смета дека на Владата ѝ треба подобра визија и план за справување со заробената држава и создавање систем со мала функционална влада и администрација, систем во кој ќе владее правото и медиумите ќе бидат слободни.
За да се остварат овие цели, потребно е итно да прекинат сите негативни тенденции како партиски и роднински вработувања, а сите постојни вработувања да се преиспитаат од Антикорупциската комисија. Министерството за финансии да го преиспита и спречи расипничкото трошење на парите на даночните обврзници, особено од страна на партиските функционери. Да престанат сите политички компромиси, кои се во име на опстанок на владејачката коалиција, а ја загрозуваат правната држава. Владата сериозно да се посвети на борба против корупцијата, а меѓу другото, и со онаа во сопствените редови, нешто што беше нејзина примарна заложба пред доаѓањето на власт, се навдува во соопштението.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Соопштенија
Ристов: Конче продолжува да се гради и развива паралелно со сите големи општини во Македонија
Златко Ристов, кандидат за градоначалник на општина Конче од редовите на ВМРО-ДПМНЕ, се обрати од денешниот настан одржан во општината, во рамки на вториот круг од локалните избори кои ќе се одржат на 2 ноември. Тој се осврна на темите за младите во општината, инфраструктурата, како и неговата програма како кандидат за градоначалник на општината, која како што вели тој е изготвена да одговори на потребите на граѓаните кои живеат во општина Конче.
,,Во мојата работа како градоначалник, секогаш се водев од потребите на месното население, ги слушав вашите предлози, заеднички ги решававме сите проблеми и затоа сега имаме изградени и реконструирани патишта и улици низ сите населени места. Уредувавме јавни простори, паркови, затоа што сакаме нашите деца да растат во чиста и уредна средина“, рече Ристов и додаде:
,,Конче ја доживеа својата ренесанса во изминатите 4 години. Конче се градеше и развиваше паралелно со сите големи општини во Македонија“.
Ристов истакна дека неговата програма е веќе позната на граѓаните, и има за цел да ги реши сите нивни проблеми, а се состои и од проекти кои се од интерес на жителите на општина Конче.
,,Во вториот изборен круг да излеземе масовно на избори да го направиме вистинскиот избор, за нашата општина. Нашата програма, мојата и на мојот тим на советник. Се потрудивме да стигнеме до секој еден од вас. Во неа се опфатени проекти од сите сфери“, кажа Ристов.
Како што вели тој, младите во општината ќе бидат поддржани преку стипендии и еднократна помош, а во делот на спортот, ќе продолжат да се градат и реконструираат спортски терени.
,,Спортот и најмладите, ќе продолжиме да градиме и реконструираме стадиони, културни домови, ќе продолжиме да ги поддржуваме најмладите преку стипендии за најдобрите ученици, еднократна помош за секој ученик кој го завршува основното образование и се запишува во средно, стипендии за најдобри студенти“, истакна Ристов.
Ристов се осврна и на делот за инфраструктурата каде кажа дека ќе има реконструкција на системите за водоснабдување, а ќе се унапреди и дел од процесот за одржување на патиштата за време на зимскиот период.
,,Водоводните и канализационите системи, ќе се реализираат следните: ќе извршиме реконструкција на системите за водоснабдување, во населените места Лубница, Горни Липовиќ. Дедино, Конче, Ракитец, ќе ги доизградиме системите за фекална канализација во Конче, Горни Липовиќ, Ракитец и Долни Липовиќ. До крајот на годината ќе биде испорачан камионот кипер кој што ќе биде во функција на одржување на патиштата по сите населени места, зимско одржуваме на нашите локални патишта и други потреби кои ќе произлезат од нашите граѓаните“, заклучи Ристов.
Соопштенија
„Влен“: За ДУИ и за Ахмети, министерските позиции се единствената алатка за опстанок во политиката
После пет дена, на Али Ахмети конечно му беа покажани резултатите од „референдумот“. И ете, тој излезе и рече дека победиле на локалните избори, велат од ВЛЕН.
„Ова е апсурдно. Победите на ВЛЕН во Чаир, Сарај, Арачиново, Желино, Теарце и убедливото водство во Тетово, Боговиње, Дебар, Струга, Брвеница и Долнени се далеку поголеми од „победата“ во Пласница и Липково. Мислевме дека Али Ахмети и ДУИ конечно станале свесни за резултатите од „референдумот“, но тие продолжуваат да ги доживуваат локалните избори како парламентарни, бидејќи за нив министерските позиции се единствената алатка за опстанок во политиката. Дваесет години политиката на Али Ахмети се градеше на два столба: власт и само власт. А што се однесува до „ветингот“ што тој денес го бара, тоа одамна му го направи неговата сенка Артан нон грата Груби, за кого и понатаму тврди дека е „чист како солза“. Затоа, пред да побара предвремени избори, Али Ахмети треба да се запраша: Дали ќе може да се соочи со слободниот глас на Албанците кои повеќе не се плашат од него? Затоа што времето на Газиместан заврши. ВЛЕН е сегашноста. ДУИ е минатото“, се наведува во соопштението.
Соопштенија
Македонски концепт со поддршка за Орце Ѓорѓиевски: За стабилно и одговорно раководење со Град Скопје
„Македонски Концепт застанува цврсто зад изборот на Орце Ѓорѓиевски за градоначалник на Град Скопје. Нашата поддршка е резултат на убедувањето дека Скопје заслужува докажан и компетентен кадар, со јасна визија и професионален пристап во управувањето со главниот град“, велат од Македонски Концепт.
„По години на политички егзибиционизам и импровизација, време е да се стави крај на експериментите со судбината на Скопје. На граѓаните им е потребен стабилен, искусен и проверен градоначалник кој ќе работи за интересите на сите скопјани – без популизам, без партиски калкулации и без лични промоции.
Македонски Концепт верува дека Орце Ѓорѓиевски, како кандидат на нашата коалиција “Твоја Македонија”, е вистинскиот избор за враќање на достоинството, редот и функционалноста во управувањето со Град Скопје. Време е Скопје повторно да стане модерен, уреден и безбеден европски град“, се наведува во соопштението на Македонски Концепт.

