Соопштенија
Членките на ШК Алкалоид ВМ Бела Котенашвили и ИМ Лела Јавакхишвили Светски екипни шампиони!

На штотуку завршеното Светско екипно првенство за жени во Рапид шах што се одигра од 05-12 септември Полска првото место го освои екипата на Грузија, и со тоа вторпат во својата историја стана Светски екипен шампион во Рапид шах.
Членките на ШК Алкалоид, ВМ Котенашвили Бела и ВМ Јавакхишвили Лела одиграа клучна улога во остварување на овој голем успех. Пред неполн месец, тие со екипата на ШК Алкалоид го освоија Шампионатот на Македонија за жени.
Покрај нив за Грузија настапија и ИМ Арабидзе Мери, ВМ Батсиашвили Нино и ИМ Мелиа Саломе. Интересен факт е дека екипата на Грузија во ист состав стана Светски шампион и во 2015 година. Повторувајќи го тој успех Грузија ја продолжи низата на одлични резултати на европските и светските првенства во женска конкуренција, потврдувајќи го статусот на шаховска велесила. Како што е добро познато Грузија има две светски шампионки во женска конкуренција Нона Гаприндашвили (1962-1978 година) и Маја Чибурданидзе (1978-1991 година).
На Светскиот шампионат настапија најдобрите дванаесет селекции поделени во две групи. Потоа првопласираните четири екипи од секоја група играа по куп систем на елиминации, во секое коло се играа по два меча. До шампионскиот трофеј екипата на Грузија стигна победувајќи ја во четвртфиналето екипата на Кина. Најнеизвесен беше дуелот во полуфиналето против екипата на САД кој Грузијќите го добија победувајќи во дополнителениот меч откако по првите два меча резултатот беше изедначен. Во финалето искусната екипа на Грузија оствари убедилива победа против младата и талентирана екипа на Казахстан победувајќи во двата меча со 2,5-1,5 и 3,5 – 0,5.
(ПР)
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Соопштенија
Мециновиќ: Среќен сум со текот на кампањата и сè поверојатно е дека влегуваме во втор круг

Вчеравечер, во рамките на своите народни средби во Аеродром, Центар и Кисела Вода, кандидатотот за градоначалник на Скопје од партијата Левица, Амар Мециновиќ презентираше дел од програмата #СкопјеСЕГА и повторно потсети дека досега се третирале симптомите, наместо изворите на аерозагадувањето.
„Град Скопје го посочува прстот кон сиромашните, како тие да се виновни, наместо да работи на санкционирање на вистинските загадувачи. Мора да се зголеми бројот на инспекторите за животна средина, да се опремат со дронови за поефикасна работа на терен и да се унапреди соработката со Министерството за животна средина,“ истакна Мециновиќ.
Тој информираше дека градот, поради актуелната регулатива, нема надлежност без Министерството да врши инспекциски надзори над индустриските загадувачи, кои се најголем извор на аерозагадување.
Мециновиќ додаде: „Повторно ќе истакнам дека со решавање на проблемот со јавниот транспорт – кој, патем, е главен фокус во нашата програма, ќе се реши поголем дел од проблемите во Скопје, вклучително и аерозагадувањето.“
„Среќен сум со текот на кампањата и сè поверојатно е дека влегуваме во втор круг“ – заврши Мециновиќ.
Соопштенија
Тоневски: Во наредните 4 години ќе инвестираме во патната инфраструктура во Пробиштип

Патната инфраструктура е област во која никогаш нема крај, секогаш има потреба од изградба и реконструкција на уште една улица, секогаш има потреба од нови тротоари како на улицата „28 август“, „Партизанска“, на „Браќа Миладиновци“, на улицата „Кочо Рацин“ и на многу други локации, рече Тони Тоневски, кандидат за градоначалник на општина Пробиштип од ВМРО-ДПМНЕ.
„Но Пробиштип не е само градот, во наредните 4 години ќе инвестираме во секое населено место. Асфалтерките ќе стигнат до секоја населба и секое село. Ќе го изградиме патот до Јамиште, Шталковица, Пестришино, Близанци, Кундино, Костомар, Горни Стубол. Ќе го прошириме и реконструираме патот до Свети Николе, преку Неокази и Мечкуевци, за да добиеме вистински регионален пат каков што доликува на нашата општина. На сите жители ќе им овозможиме нормален и безбеден пристап до нивните домови и села. Заборавени места повеќе нема да има. Направете го вистинскиот избор, за тебе за твоето место, за твојата иднина“, рече тој.
Соопштенија
Ливриниќ: Визбегово како уредна и поврзана населба со нови тротоари, градинка и мини плоштад

Кандидатката за градоначалник на Општина Бутел од СДСМ, Оливера Ливриниќ, оствари средби со жителите на населбата Визбегово, каде што разговараше за секојдневните проблеми со кои се соочуваат граѓаните и ги претстави приоритетните мерки од својата програма за овој дел од општината.
„Во Визбегово кога врне и кога не врне е исто – тротоари немаме. Тоа мора да се промени. Мој приоритет ќе биде изградба на тротоари на сите улици и асфалтирање на улиците и нивните краци, за да имаме уредна и безбедна населба. Планираме и поставување лежечки полицајци на повеќе локации за да ја зголемиме безбедноста на пешаците“, истакна Ливриниќ.
Таа додаде дека грижата за животната средина и за животните мора да биде дел од локалната политика, најавувајќи изградба на стационар за кучиња и програми за уредување на јавните површини.
Како дел од визијата за поквалитетен живот, Ливриниќ најави и мини плоштад во центарот на населбата, опремен со урбана опрема – простор за дружење, културни настани и заедништво на жителите.
„Старото училиште ќе добие нова функција – детска градинка. Визбегово заслужува современ и безбеден простор за нашите најмали“, додаде таа.
Ливриниќ рече дека во соработка со Град Скопје, ќе биде воведена и нова автобуска линија Радишани – Визбегово – Карпош, со што ќе се подобри поврзаноста и ќе се намали сообраќајниот метеж.
„Визбегово ќе го направиме пример за тоа како една населба може да биде уредна, безбедна и пријатна за живеење. Ова не се ветувања, туку план кој заедно со жителите ќе го спроведеме“, порача Оливера Ливриниќ.