Администрацијата на Трамп ќе ја затвори палестинската мисија во Вашингтон, изјави Палестинската ослободителна организација (ПЛО), пренесува „Индепендент“. Високиот палестински претставник Саеб Еракат, кој ја осуди опасната ескалација на американските одмазднички мерки, изјави дека САД го информирале палестинското раководство за одлуката да ја затворат палестинската мисија во Вашингтон.

Тоа е последната одлука од серијата мерки преземени од страна на администрацијата на претседателот Доналд Трамп против палестинското раководство, кое ги замрзна односите со американските официјални лица откако САД во декември 2017 година го признаа Ерусалим за главен град на Израел.

„Американски службеник нè извести за одлуката за затворање на палестинската мисија во САД. Го повторуваме ставот дека палестинскиот народ не е на продажба и нема да потклекне пред заканите и заплашувањето од САД. Станува збор за нов пример на казнената политика што ја користи администрацијата на Трамп против палестинскиот народ, со која веќе е скратена финансиската помош за хуманитарни активности, вклучително и во секторите на здравството и образованието. Оваа опасна ескалација јасно покажува дека САД се обидуваат да го уништат меѓународниот систем за да ги прикријат израелските злосторства“, изјави вториот по ранг човек во ПЛО.

Коментарите доаѓаат пред најавениот говор на советникот за национална безбедност на Доналд Трамп, Џон Болтон, во кој се очекува да го објави затворањето на мисијата како одговор на одбивањето на палестинското раководство да влезе во мировните преговори предводени од САД.

„Администрацијата на Трамп нема да ја остави канцеларијата отворена ако Палестинците одбијат да почнат директни и значајни преговори со Израел. Болтон е подготвен да му се заканува на Меѓународниот кривичен суд со санкции ако ги истражува САД и Израел”, се вели во известувањето на „Волстрит џурнал”.

Меѓу можните мерки што ги најави Болтон во таков случај е и забрана за влез во САД на судиите и обвинителите на МКС.

„Ќе ги санкционираме нивните средства во американскиот финансиски систем и ќе ги гониме во рамките на американскиот кривичен систем. Ние ќе го сториме истото за секоја компанија или држава што ќе помогне во истрагата на МКС за Американците”, најави Болтон.