Свет
Активистите за човекови права: Во Белорусија се приведени повеќе од 250 демонстранти
Повеќе од 250 лица се приведени во Белорусија за време на протестите во понеделникот, соопшти центарот за човекови права „Весна“, нерегистриран од белоруското Министерство за правда, пренесува ТАСС.
„На списокот на активисти за човекови права има 254 имиња заклучно со 20 часот и тој се ажурира. Повеќето беа приведени во Минск и Гродно, а има притворени и во Брест, Новополотск и во Борисов“, се вели во соопштението.
Меѓу приведените има и студенти, кои го поддржаа повикот на опозицијата за штрајк на национално ниво. Во текот на денот луѓето во Минск формираа т.н синџири на солидарност и одржуваа протестни маршеви.
Неделата беше последниот ден од ултиматумот поставен од поранешната претседателска кандидатка Светлана Тихановскаја на претседателот Александар Лукашенко. Барањата вклучуваа оставка на актуелниот претседател, слобода на политичките затвореници и прекинување на насилството.
Опозицијата ги повика работниците од индустриските претпријатија да почнат штрајк од понеделник во случај овие барања да не бидат задоволени.
Вработените во некои претпријатија престанаа да работат, но властите тврдат дека сите претпријатија од реалниот сектор на економијата во Белорусија работат рутински и производствените линии не се запрени.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Бајден патува во Германија
Американскиот претседател, Џо Бајден, утре ќе отпатува во посета на Германија, кога минатонеделната посета на таа земја беше одложена поради ураганот што ги погоди САД, соопшти Белата куќа.
Минатата недела Бајден требаше да учествува на состанокот на т.н Контакт група за Украина во американската воена база Рамштајн во Германија.
Тој, исто така, требаше да се сретне со германскиот канцелар, Олаф Шолц, францускиот претседател, Емануел Макрон и британскиот премиер, Кир Стармер во сабота во Берлин пред самитот во Рамштајн за Украина.
Желбата и на германската и на американската страна беше првата билатерална посета на Бајден на Германија да се случи пред претседателските избори во САД на 5 ноември.
За време на неговиот претседателски мандат, Бајден оствари само една официјална посета на Германија, и тоа како дел од самитот на Г7 во 2022 година.
„Иако Бајден патува за Германија, тој нема да се сретне со Зеленски утре додека е во Европа“, рече портпаролката на Белата куќа Карин Жан-Пјер на редовниот брифинг со медиумите.
Зеленски утре ќе биде на самитот на ЕУ, каде пред европските лидери ќе го претстави својот План за победа за ставање крај на војната.
Украинскиот претседател изјави дека војната со Русија би можела да заврши најдоцна следната година доколку неговиот План за победа, кој вклучува безусловна покана за членство во НАТО и конкретна поддршка во вооружувањето и дозвола за употреба на западни ракети со долг дострел кои би биле насочени длабоко на руска територија.
Свет
Шефот на НАТО: Не можам да кажам дека го поддржувам целиот план за победа на Зеленски
Генералниот секретар на НАТО, Марк Руте, рече дека „планот за победа“ на украинскиот претседател Володимир Зеленски е добар сигнал, но дека, како што сега стојат работите, тој не може целосно да го поддржи.
„Тоа е силен сигнал од Зеленски и неговиот тим дека го смислиле тој план, што не значи дека можам да кажам дека го поддржувам во целост, тоа би било малку тешко бидејќи има многу работи кои треба подобро да разбереме“, изјави Руте.
Тој реагираше претпазливо на желбата на Украина за брз прием во западната воена алијанса.
Руте потсети на изјавата на НАТО од самитот во Вашингтон, во која само се вели дека патот на Украина кон членство во тој сојуз е „неповратен“.
Поддржувачите на брзото влегување на Украина во НАТО не надвладеаа над противниците на идејата, вклучително и САД и Германија, кои стравуваат дека понатамошната ескалација ќе ја вовлече Алијансата во војна.
Руте, исто така, рече дека новата украинска мисија на НАТО во Визбаден, Германија ќе биде целосно оперативна во рок од неколку месеци.
Претходно денеска Зеленски изјави дека војната со Русија би можела да заврши најдоцна следната година доколку веднаш биде спроведен неговиот „план за победа“, кој вклучува безусловна покана за членство во НАТО и конкретна поддршка за вооружување и дозвола за употреба на западни ракети со долг дострел со кои би биле насочени длабоко во руска територија.
Тој најави дека утре ќе отпатува на самитот на лидерите на Европската унија во Брисел за и таму да го претстави својот победнички план.
Свет
Израелската војска дозволи 50 камиони со хуманитарна помош да влезат на северот на Газа
Израелската војска соопшти дека дозволила влез на 50 камиони со хуманитарна помош во северниот дел на Појасот Газа, по предупредувањето на Соединетите Американски Држави да ја зголеми помошта на палестинската територија или ризикува да го загрози снабдувањето со американско оружје.
КОГАТ, одделение на министерството за одбрана на Израел задолжено за цивилните работи во Газа, наведе дека помошта е испорачана врз основа на инструкцијата на министерот за одбрана Јоав Галант и на „политичкиот ешалон“, пренесе Асошијетед прес.
Северна Газа беше првата цел на големата израелска офанзива од воздух и од копно по нападот на палестинските екстремисти предводени од Хамас на 7 октомври 2023 година на југот на Израел, кој ја предизвика војната.
Овој дел на Газа претрпе тешко разурнување и израелската војска го опколува речиси една година.