Свет
Акции во духовни центри во Шпанија: Пронајдена ајахуаска, отров од жаби
Шпанската полиција уапси три лица и заплени 11 литри ајахуаска, 117 кактуси Сан Педро и неколку шишиња со отров од крастава жаба. Акциите беа извршени на две рурални имоти кои служеле за организирање профитабилни духовни ретрити, каде на учесниците им биле ветувани астрални патувања, јавува „Гардијан“.
Полицијата на Цивилната гарда почнала истрага пред пет месеци во општината Педрегер, провинција Аликанте, по пријава од поранешен клиент. Откриено е дека центарот, кој онлајн се рекламирал како наградуван и меѓународно признат духовен центар, организирал одмори со традиционална медицина, кои биле особено популарни кај посетителите од Европа.
„Пакетите од три и пет дена чинеле во просек по 1.000 евра и вклучувале сместување, поддршка и супстанци кои се конзумираат“, соопшти полицијата. Ретритите собирале групи од по 20 луѓе, кои ги следеле шест лица вработени како водичи за „астралните патувања“.
Таквите собири се одржувале неколку пати неделно, па истражителите проценуваат дека групата во последната година заработила стотици илјади евра. Поголемиот дел од уплатите биле во кеш, непријавени, а парите се префрлале на многу банкарски сметки во различни земји со цел да се сокрие потеклото.
Опасни услови и забранети супстанции
Во моментот на рацијата во центарот биле присутни 16 лица. Цивилната гарда извести дека центарот немал потребна опрема за справување со можни случаи на труење, а подготовките биле правени во „импровизиран, примитивен лабораториски простор без основни хигиенски мерки“.
Портпаролот на Цивилната гарда изјави дека ајахуаска, кактус Сан Педро и отровот од жабата се забранети супстанци во Шпанија, додавајќи дека нивната консумација не е одобрена бидејќи иако се со природно потекло, може да бидат исклучително опасни за човечкото здравје. Полицијата објави фотографии од голема просторија исполнета со душеци, канти и марамчиња каде се одвивале „астралните патувања“.
Уапсени се двајца мажи и една жена, за кои се сомнева дека се лидери на групата, додека уште пет лица што работеле како „духовни водичи“ се под истрага. Сите се сомничат за кривични дела трговија со дрога, перење пари и припадност на криминална организација. Полицијата исто така заплени 945 таблети Риталин и разни билни производи, кои се испратени на лабораториска анализа.
Иако Цивилната гарда не извести дека некој физички бил повреден, предупредија: „Ајахуаска, кактус Сан Педро и отровот од жаба се природни производи кои може да бидат многу штетни за луѓето, а нивните ефекти се тешко предвидливи бидејќи зависат од различни фактори, како метаболизмот на поединецот и применетата количина. Ризикот се зголемува кога отровните супстанци ги користат лица без медицинска обука и кога се произведуваат на домашен начин.“
Што е ајахуаска?
Ајахуаска е силен психоделичен напиток кој се користи со векови во духовни и ритуални практики на домородните племиња од Амазонија, особено во Перу, Бразил, Колумбија и Еквадор.
Тој делува на психата и телото, предизвикувајќи интензивни визии, емотивни и интроспективни искуства, но и физички реакции како повраќање и дијареја. Може да предизвика тешки психички реакции, да ги влоши менталните болести, да биде опасно во комбинација со одредени лекови и во непрофесионални услови. Во многу земји е забранета или строго регулирана поради присуството на ДМТ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Маж е застрелан откако се обидел нелегално да влезе во имотот на Трамп во Флорида
Mаж е убиен откако се обидел нелегално да влезе во имотот на Трамп во Флорида, објави Скај њуз.
Како што објавија разузнавачките служби, мажот на околу 20-годишна возраст бил застрелан околу 1:30 часот наутро.
Идентитетот на осомничениот сè уште е непознат, а обезбедувањето го забележало човекот на северната порта од имотот.
Носел оружје кое личело на пушка и канта со гориво.
Ниеден агент не е повреден.
Во тек се истраги за идентитетот на човекот и неговиот мотив за делото.
Иако Трамп често го поминува викендот на својот имот, во моментот на инцидентот тој бил во Белата куќа, во Вашингтон, а со него била и сопругата Меланија Трамп.
Свет
Гласањето за трговскиот договор ЕУ–САД може да се одложи поради хаосот со тарифите
Претседателот на Комитетот за меѓународна трговија на Европскиот парламент, Бернд Ланге, предложи одложување на гласањето за трговскиот договор меѓу ЕУ и САД, кое беше планирано за следната недела. Тој истакна дека условите и правната основа на договорот се променети поради неодамнешните американски тарифни мерки.
Ланге оцени дека американската администрација создала „тарифен хаос“ со привремените тарифи на претседателот Доналд Трамп, кои првично беа 10%, а потоа беа зголемени на 15%.
Од партијата Зелени во ЕУ исто така побараа пауза во гласањето додека не се разјаснат сите детали.
Договорот, кој беше постигнат минатото лето, предвидува ЕУ да ги укине царините на многу американски производи, додека САД би вовеле тарифа од 15% на поголемиот дел од европскиот извоз. Намалените царини од ЕУ треба да бидат одобрени од владите на земјите-членки и од Европскиот парламент.
Европскиот парламент минатиот месец привремено ја стопираше работата на договорот поради барањето на Трамп за припојување на Гренланд и заканите со царини кон европските сојузници, но подоцна беше одлучено дека договорот ќе биде ставен на гласање крајот на февруари.
Регион
(Видео) Повторно драма на Јахорина: дете висеше од жичара
На Јахорина се случи вистинска драма кога едно дете висеше од жичара.
Како што известува порталот „Drinainfo“, благодарение на брзата реакција на присутните, детето успешно беше спуштено на земја.
На објавеното видео се гледа дека две лица го држат детето кое висеше од седиштето, додека присутните трчаат да му помогнат безбедно да стигне до земјата.
Засега не е познато дали детето е повредено.
Да потсетиме, пред четири дена на Јахорина дете падна од жичара и со повреди на ногата беше пренесено во болница.

