Потпретседателот на САД, Мајк Пенс, е во самоизолација надвор од Белата куќа по потврдувањето дека неговата портпаролка е заразена со коронавирус, пренесува „Блумберг“ цитирајќи тројца неименувани извори запознаени со ситуацијата.

Како што се наведува, Пенс не присуствувал на состанокот во саботата со претседателот Доналд Трамп и со воените функционери. Еден од изворите наведува дека резултатот на тестот на Пенс во неделата бил негативен. Тој додава дека Трамп и Пенс редовно се тестираат на коронавирус.

Белата куќа не коментира, пренесува „Ројтерс“. Агенцијата претходно објави, повикувајќи се на неименуван извор, дека администрацијата на американскиот претседател не планира да ги раздели Трамп и Пенс иако расте загриженоста за ширење на коронавирусот во Белата куќа.

Во Белата куќа регистрирани се два случаја на коронавирус, што ги поттикна стравувањата дека се зазарени и претседателот и потпретседателот. Еден ден по откривањето дека личниот батлер на Трамп е позитивен на коронавирусот, беше објавено дека се заразени и портпаролката на Пенс и сопругата на советникот на Трамп, Кејти Милер.