Сојузниот суд во Вашингтон наложи на администрацијата на претседателот на САД, Доналд Трамп, веднаш да му ја врати акредитацијата на новинарот на телевизијата Си-ен-ен, Џим Акоста.

Си-ен-ен побара на новинарот да му се врати акредитацијата додека судот и понатаму ја разгледува тужбата за одземање на правото на Акоста да ги следи настаните во Белата куќа.

Администрацијата на Трамп минатата недела му ја одзеде пропусницата на новинарот по прес-конференцијата на која Акоста одби да го предаде микрофонот на приправничката во Белата куќа откако Трамп рече дека повеќе не сака да слушне ништо од него.

Градот Рим воведе построга контрола на незаконските туристички атракции и на туристите им забрани голем број активности за да ги заштити од измамници, но и за да ги подобри безбедноста на улиците и квалитетот на животот на граѓаните на Рим, пишува Си-ен-ен.

Затоа, ако набргу планирате да го посетите Рим и да се забавувате на улиците на овој историски град облечени како гладијатор или центурион, размислете добро. Имено, според новиот закон, ако полицијата забележи дека костимирано лице се фотографира со туристи и добива пари, ќе го казни со глоба до 400 евра.

Исто така, во текот на доцните ноќни часови е забрането пиење алкохол на јавно место и пливање во фонтаните.

Така, полицијата ќе ги казни сите оние што се шетаат по улиците со шише, чаша, конзерва или слично, а кои содржат алкохол по 10 часот навечер. Клубовите и баровите веќе не смеат да служат алкохолни пијалаци од 2 до 7 часот наутро.

Ова се само некои од правилата на нацртот на новите урбанистички прописи што го објави Градскиот совет на Рим на својата веб-страница во четвртокот.

Истрагата за убиството на новинарот Џамал Кашоги сè уште е во тек, но новите информации што ги објави „Њујорк тајмс“ дополнително го продлабочуваат сомнежот дека наредбата за неговото убиство во конзулатот во Истанбул доаѓа од самиот врв на саудискиот режим.

Саудиските разузнавачи блиски до принцот Мухамед бин Салман наводно лани прашале група бизнисмени со кои договарале соработка дали за нив би извршиле атентати на непријатели на монархијата, објави „Њујорк тајмс“.

Саудиска Арабија досега традиционално избегнувала тајни операции во странство, ликвидации и воени интервенции од страв дека авантуристичката надворешна политика би можела да доведе до нестабилност и изолација и така да ја загрози позицијата на најголемиот светски извоник на нафта. Но, судејќи по сè, тоа се сменило како што се зголемиле овластувањата на престолонаследникот, принцот Мухамед бин Салман.