Во италијанскиот град Kампобасо се случи тешка семејна трагедија во која 15-годишно девојче и нејзината мајка починале, откако ненадејно се разболеле, додека таткото бил хоспитализиран со сериозни симптоми. Се сомнева дека причината е труење со храна по вечера, а обвинителството покрена истрага за да се утврди точниот причинител, пишува „Кориере декла села“.

Градот Кампобасо е потресен од трагедијата во која, во рок од само неколку часа, починале 15-годишната Сара Ди Вита и нејзината мајка, 50-годишната Антонела Ди Јелси, додека таткото, 55-годишниот Џани Ди Вита, е примен во болница во тешка здравствена состојба.

Сара Ди Вита починала во саботата навечер во болницата „Кардарели“ во Кампобасо. Неколку часа подоцна, во неделата наутро, во истата здравствена установа починала и нејзината мајка. Таткото исто така бил хоспитализиран поради сериозни здравствени тегоби и се наоѓа на лекување.

Семејството, кое живее во местото Пјетракатела, со денови се чувствувало лошо, но според достапните информации, по две интервенции на Итната медицинска помош биле вратени дома, бидејќи нивната состојба во тој момент не била оценета како загрижувачка. Сепак, во саботата попладне состојбата нагло се влошила. Поради силни болки повторно побарале лекарска помош, по што Сара и нејзиниот татко биле итно сместени на Одделот за интензивна нега, додека мајката била примена на интерно одделение.

И покрај напорите на лекарите, на младата ученичка од класичната гимназија не ѝ било спас и таа починала околу 22:30 часот. Единствен член од семејството кој не покажувал никакви симптоми е нивната 20-годишна ќерка.

Истрагата насочена кон бадниковата вечера

Според првичните сознанија, истражителите ја разгледуваат можноста трагедијата да е поврзана со вечерата на Бадник, на која биле послужени риба, морски плодови и школки. Дополнителна недоумица создава фактот што на истата вечера присуствувале и други гости кои не пријавиле никакви здравствени проблеми.

Обвинителството во Кампобасо наложило обдукција на телата на мајката и ќерката, со цел да се утврди дали станува збор за труење со храна, силна алергиска реакција или некоја друга причина. Случајот го истражува мобилна полициска единица.

Трагедијата длабоко ги потресе жителите на Пјетракатела, каде семејството Ди Вита било добро познато. Таткото Џани, по професија сметководител, со години бил активен во локалната политика и извршувал функции како општински советник и градоначалник. Актуелниот градоначалник Антонио Томазоне изрази сочувство до семејството.

„Шокирани сме, ова е трагедија што нè остави без зборови. Целото место е во неверување и во име на заедницата изразувам длабоко сочувство до семејството“, порача тој.

Силна експлозија синоќа ја вознемири загрепската населба Трешњевка, откако во дворот пред основно училиште во Новa цеста била активирана силна пиротехничка направа, јавува „Дневник.хр“.

Според сведоци, се слушнале две експлозии, а една од жителките изјавила дека од силниот удар се треселе прозорците.

Од загрепската противпожарна служба соопштиле дека во 22:56 часот добиле пријава за пожар на игралиштето на Основното училиште „Јулије Кловиќ“, предизвикан од пиротехничка направа, кој бил изгаснат по нивното пристигнување. Во интервенцијата учествувало едно противпожарно возило.

Украинскиот претседател Володимир Зеленски порача дека Украина во рамки на каков било мировен договор со Русија не може едноставно да се повлече од своите територии, нагласувајќи дека тоа прашање не се однесува само на законските рамки, туку директно ги засега животите на луѓето. Тој ова го изјави во интервју за „Фокс њуз“, во разговор со новинарот Брет Бајер.

„Не можеме едноставно да се повлечеме, тоа е надвор од нашиот закон. Не можеме само да се повлечеме од нашите територии. Но не станува збор само за законот. Таму живеат луѓе, 300.000 луѓе… Не можеме да ги изгубиме тие луѓе“, нагласи тој.

Неговите изјави следуваа по средбата со претседателот на САД, Доналд Трамп, во неделата во Мар-а-Лаго. Тој му се заблагодари на претседателот Трамп, а средбата ја оцени како продуктивна.

Украинскиот претседател додаде дека нацрт-верзијата на ревидираниот мировен план во 20 точки, чија цел е завршување на руската сеопфатна инвазија, е речиси завршена.

„Кога реков дека 90 отсто (од планот) е готов, тоа е точно, бидејќи проблеми има само со две точки“, рече Зеленски, потврдувајќи дека клучното нерешено прашање се однесува на териториите.

„Да, тоа е тешко прашање“, призна тој. Истакна дека Украина и Русија имаат спротивставени ставови околу територијалните прашања, но дека Соединетите Американски Држави ги разбираат позициите на двете страни и се обидуваат да најдат компромис.

Додаде и дека Украина во текот на изминатиот месец покажала конкретни чекори кон мир и ја отвори можноста за референдум за мировниот план. Во исто време, нагласи дека референдумот, во постојните околности, не може да се користи како оправдување за повлекување од украинската територија.

„Не можеме да заминеме бидејќи таму се ранети 100.000 луѓе, десетици илјади се убиени. А таму е и нашата војска“, рече тој. Потврди дека Украина како компромис предложила воспоставување демилитаризирана слободна економска зона, во рамки на која двете страни би презеле заемни чекори и би ги повлекле своите сили.

Зеленски наведе дека неодамнешните руски територијални напредувања, проценети на околу 3.000 квадратни километри годишно, се постигнати со огромна човечка цена – околу 400.000 руски жртви во текот на изминатата година и приближно 31.000 загинати секој месец.

Иако Трамп, стоејќи покрај Зеленски, изјави дека „Русија сака да види успешна Украина“ и додаде дека рускиот претседател Владимир Путин, „соработувајќи со Украина“, работи на отворање на нуклеарната електрана Запорожје, Зеленски изрази скепса кон намерите на Путин.

„Не им верувам на Русите и… не му верувам на Путин и тој не сака успех за Украина“, рече Зеленски, додавајќи дека притисокот од Соединетите Американски Држави и понатаму е клучен.

На прашањето дали Украина може да ја добие војната без американска поддршка, Зеленски одговори директно: „Не можеме. Без американска поддршка не можеме да го браниме небото“. Тој додаде дека системите за противвоздушна одбрана и муницијата што ги испорачуваат Соединетите Американски Држави и понатаму се клучни, додека Русија продолжува да лансира стотици дронови и проектили.

Зеленски зборуваше и за безбедносните гаранции, истакнувајќи дека Украина бара долгорочни, правно обврзувачки обврски од САД, по можност со поддршка од Конгресот.

„Денес разговаравме со претседателот и постои предлог. Првиот предлог се однесува на безбедносни гаранции за 15 години. Тоа е добар предлог, со можност за продолжување“, наведе тој, објаснувајќи дека тие гаранции не би значеле членство во НАТО, но би биле „налик на НАТО“.

Зеленски призна дека меѓу Украинците постои замор од војната, но напомена дека јавната поддршка е јасна. „Луѓето го сакаат тоа, 87 отсто поддржуваат мир. Истовремено, 85 отсто се против повлекување од истокот, од Донбас“, рече тој.

На прашањето дали е можен мир под прифатливи услови, Зеленски рече дека Украина нема алтернатива. „Мораме да го направиме тоа, немаме друг пат. Другиот пат би бил војна“, заклучи тој.

Фото: Depositphotos