Свет
Британскиот муслимански совет: Насловите со „Алаху акбар“ погрешно имплицираат напади мотивирани од исламот

Центарот за мониторинг на медиумите на Муслиманскиот совет на Велика Британија (ЦфММ) тврди дека британските медиуми ставиле непропорционален фокус на исламски терористички напади и дека насловите што го содржат џихадистичкиот воен повик „Алаху акбар“ се заблудувачки бидејќи лажно го поврзуваат тероризмот со исламската вера, пренесува „Тајмс“.
Во извештајот со наслов „Како британските медиуми известуваат за тероризам“ се тврди дека помеѓу 2015 и 2019 година веројатноста зборовите или фразите што ги идентификуваат терористите како муслимани да се користат во медиумските извештаи е деветпати поголема од фразите што идентификуваат терористички нападите од екстремната десница или од белите супермацисти.
Во извештајот се тврди дека меѓу октомври и декември 2018 година една четвртина од интернет-извештаите на британските медиуми за исламот или муслиманите биле за тероризам или за екстремизам.
Ризвана Хамид, директорот на ЦфММ и еден од авторите на извештајот, вели дека остануваат недоследности со непропорционален фокус на муслиманите. Таа тврди дека насловите во кои се користат религиозни термини, како „Алаху акбар“, подразбираат дека религијата е секогаш мотиватор игнорирајќи ги другите фактори, како што се криминалната историја и проблемите со менталното здравје, кои може да се во игра и кои често се спомнуваат кога сторителот не е муслиман.
„Иако сега се чини дека се признава важноста на конзистентноста и обемот на екстремнодесничарската закана кај медиумите, претежно во весниците, сè уште има долг пат пред нас“, рече таа.
Арапската фраза честопати е погрешно преведена во западните медиуми како „Бог е голем“, сепак поточен превод би бил „Алах е поголем“ или „Алах е поголем од твојот Бог или влада“.
Во извештајот се дадени неколку препораки за медиумите за тоа како да известуваат за тероризмот, вклучително и создавањето доследна и транспарентна дефиниција за тоа што претставува тероризам, избегнување користење на терминот „Алаху акбар“ како кратенка за терористички напад во наслови и да не им се даваат платформи на екстремно десничарските или белите супремацистички гласови.
Една од причините за непропорционалниот фокус на исламскиот тероризам и екстремизмот може да е резултат на обемот на тероризам извршен од муслимански екстремисти во Велика Британија.
Во мај 2019 година, генералниот директор на МИ5, Ендрју Паркер, напиша дека од повеќекратните терористички закани со кои се соочува Велика Британија исламистичкиот тероризам останува најакутен. Паркер истакна дека во 2018 година 80 отсто од случаите со кои се занимавал биле спроведени од луѓе инспирирани од идеологијата на Исламската држава, но кои никогаш не биле во контакт со неа во Сирија или Ирак.
Службата за безбедност на Велика Британија исто така во мај минатата година призна дека бројот на екстремни десничари осомничени за тероризам е апсолутно замаглен од бројот на терористички случаи поврзани со исламот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Голем број деца исчезнаа во поплавите во Тексас, потврдени 27 жртви

Околу 27 луѓе, меѓу кои и девет деца, загинаа во поплавите во централниот дел на Тексас, соопштија властите денеска, додека спасувачите продолжуваат со потрагата по преживеани, вклучително и десетици исчезнати од летниот камп за девојчиња.
Канцеларијата на шерифот во округот Кер во Тексас соопшти дека повеќе од 800 луѓе се евакуирани од регионот додека нивото на водата се повлекува од подрачјето околу реката Гвадалупе, околу 137 километри северозападно од Сан Антонио.
„Нема да застанеме додека не ја најдеме и последната личност“, изјави шерифот на округот, Лери Леита, на прес-конференција.
Исчезнати девојчиња од летниот камп
Од 23 до 25 лица од летниот камп Mystic Summer се водат како исчезнати, од кои повеќето се девојчиња. Нивото на реката нагло се зголемило за девет метри во близина на кампот.
Американската национална метеоролошка служба соопшти дека вонредната состојба поради поплавите главно е завршена за округот Кер – епицентарот на поплавите, откако бурата донесе околу 30 сантиметри дожд рано во петокот. Но, за поширокиот регион останува во сила предупредувањето за поплави до 19 часот попладне.
Округот Кер се наоѓа во Texas Hill Country – рурална област позната по нерамниот терен, историските градови и други туристички атракции.
Обемна спасувачка операција
Заменик гувернерот на Тексас, Дэн Патрик, изјави дека 500 спасувачи трагаат по непознат број лица кои сè уште се водат како исчезнати, вклучувајќи и многу кои биле во подрачјето покрај реката прославувајќи го Денот на независноста.
Американскиот претседател Доналд Трамп изјави дека федералната влада работи со Тексас и локалните шерифи за одговор на поплавите.
„Меланија и јас се молиме за сите семејства погодени од оваа ужасна трагедија. Нашите храбри спасувачи сè уште се на терен и го прават она што најдобро го знаат“, напиша тој на социјалните мрежи.
Поплави без предупредување
Далтон Рајс, градоначалник на Кервил, центарот на округот, изјави за новинарите во петокот дека екстремните поплави го погодиле подрачјето пред зори, речиси без предупредување, поради што властите не успеале навреме да издадат наредби за евакуација. Реката Гвадалупе за помалку од два часа пораснала над нивото кое се смета за голема поплава.
Фото: ЕПА
Свет
Невреме во Турција: Авион принудно слета по удар од гром

Авионот, кој летал од Анкара до Бингол во Турција, извршил итно слетување на аеродромот Елазиг откако бил погоден од гром.
Пилотот, откако гром удрил во опашниот дел од авионот, ја променил рутата и од безбедносни причини слетал на аеродромот во градот Елазиг, објави Хабер.
Авионот слета без никакви проблеми, а патниците беа транспортирани од аеродромот до Бингол по копнен пат, објавија турските медиуми.
Свет
Голема свадба на синот на Рамзан Кадиров: Дијамантски часовник од 27 милиони долари, златен пиштол и луксузен Мерцедес

Седумнаесетгодишниот син на лидерот на Чеченија, Рамзан Кадиров, Адам Кадиров, се ожени со девојка по име Медни, за која се верува дека е роднина на пратеникот во Думата, Адам Делимханов, близок сојузник на Кадиров.
Свадбата траела три дена, од четврток до сабота, и се одржала во селото Ахмат-Јурт , родното место на семејството Кадиров.
Според неофицијални информации, Медни е ќерка на чеченскиот сенатор Сулејман Геремеев, исто така близок сојузник на Кадиров и роднина на Делимханов. Наводно, бракот бил склучен уште на 8 јуни 2024 година.
Подготовките за прославата траеле со месеци, а покани биле испратени и до делегации од Блискиот Исток, вклучувајќи го и амбасадорот на ОАЕ во Русија, Мохамед Ахмед Ал Џабер, кој го прекинал одморот во Абу Даби за да присуствува на настанот во Грозни, пишува „Новаја Газета“, повикувајќи се на извор од руското Министерство за надворешни работи.
Свадбата наводно била одложувана двапати, при што една од причините била желбата на Рамзан Кадиров неговиот син Адам да има приватна средба со претседателот на Русија, Владимир Путин. Се споменува и дека првично била планирана заедничка свадба со постариот син Зелимхан (Ели) минатото лето, но Кремљ тоа не го одобрил поради возраста на Адам.
Рамзан Кадиров преку својот канал на Телеграм соопшти дека претседателот Путин лично му честитал на семејството за свадбата, за што изразил „искрена благодарност“.
Сепак, најголемо внимание привлекоа луксузните детали: на раката на Адам Кадиров бил забележан скап часовник Jacob & Co. Billionaire Ashoka со 320 дијаманти, проценет на околу 27,7 милиони долари. Според пресметките на Марија Певчих од руската антикорупциска организација ФБК, просечен граѓанин на Чеченија би требало да работи повеќе од 1.500 години без да потроши ни денар за да може да си го дозволи тој часовник.
Командантот на специјалната единица „Ахмат“, Апти Алаудинов, исто така го привлекол вниманието со својот часовник, за кој се претпоставува дека е Badollet Observatoire 1872 Chronograph, со цена до 320.000 долари.
Видеа од свадбата го прикажуваат Адам Кадиров како вози специјална верзија на Mercedes G-класа, модел кој е забранет за увоз во Русија и чини околу 190.000 долари. На истите снимки се гледа и како пука со златен пиштол во воздух – што е забрането со рускиот закон, особено бидејќи се работи за малолетник и за употреба на вистинско оружје во свечени прилики.
Иако е малолетен, Адам Кадиров веќе извршува повеќе функции: тој е шеф на безбедносната служба на својот татко, од април 2025 година е секретар на Советот за безбедност на Чеченија и надзорник на Министерството за внатрешни работи и универзитетот за специјални сили. Тој е и носител на бројни државни одликувања и титулата Херој на Чеченската Република.