Портпаролката на руското Министерство за надворешни работи, Марија Захарова, изјави дека постои опасност од провокации од страна на САД и Украина во пресрет на претстојните Олимписки игри што треба да се одржат во Кина.

На овој начин Захарова одговори на објавата на „Блумберг“ дека наводно кинескиот претседател Си Џинпинг побарал од рускиот претседател Владимир Путин да не ја напаѓа Украина за време на Олимпијадата, од 4 до 20 февруари.

„Тоа се лажни вести, односно ‘специјална операција’ на американските служби преку медиумите“, рече таа.

Захарова наведе и дека „Блумберг“ во својот натпис не го прецизирал изворот на веста, па затоа, како што додаде, очигледно е дека станува збор за провокација која не е поткрепена со никакви докази.

„Ги разбирам американските медиуми. Русија одамна е ‘ѓаволот’ во целата приказна. Ова е многу добар момент -Олимпијадата во Кина која американските медиуми ја плукаат од првиот ден“, додаде Захарова.

Најмалку седум лица загинаа во експлозија во западниот авганистански град Херат.

Уште девет лица се повредени во претежно шиитската област, изјави д-р Ариф Џалали, директор на провинциската болница Херат. Повеќето од примените во болницата се жени, додаде тој. Портпаролот на провинциската полиција Махмуд Шах Расоли рече дека експлодирала бомба прикачена на возило.

Засега никој не ја презеде одговорноста за нападот.

Прикачувањето бомби на долната страна на возилата е стара тактика на талибанците, кои моментално владеат во Авганистан, a ја користеа против поранешните власти и истакнати Авганистанци. Истата тактика во Авганистан ја користеше Исламската држава против шиитите.

Исламската држава ја презеде одговорноста за голем број напади откако талибанците ја презедоа контролата врз Авганистан во август. Талибанците, пак, ги ловат соработниците на Исламската држава напаѓајќи ги нивните скривалишта.

Двете екстремистички групи се судираат откако Исламската држава се појави во Авганистан на почетокот на 2015 година.

„Фокс њуз“ објави дека на семејствата на персоналот на американската амбасада во Киев им било наредено да почнат да ја напуштаат земјата веќе в понеделник.

Стејт департментот на САД не го потврди тоа.

Портпаролот на Стејт департментот за „Спутник“ изјави дека граѓаните на САД „треба да бидат свесни за извештаите дека Русија планира значителна воена акција против Украина“.

„Ако се донесе одлука да го промениме нашиот однос кон американските дипломати и нивните семејства, американските граѓани не треба да очекуваат евакуација спонзорирана од американската влада. Моментално се достапни комерцијални летови“, изјави портпаролот за Спутник.

Соопштението дојде набргу откако новинар на Фокс њуз објави на Твитер, цитирајќи неименувани американски претставници, дека Стејт департментот „наредува семејствата на персоналот на американската амбасада во Украина да почнат да ја напуштаат земјата в понеделник“.

Според Фокс њуз, исто така се очекува и Стејт департментот да ги охрабри Американците да почнат да ја напуштаат Украина со комерцијални летови, „додека тие се уште се достапни“.

Си-Ен-Ен во петокот објави дека американската амбасада во Украина се обратила до Стејт департментот со барање да им се дозволи на секундарниот персонал да ја напушти земјата.