Шпанскиот крал, Фелипе Шести (52) во понеделникот започна 10-дневен карантин, откако бил во близок контакт со лице заразено со коронавирус.

Кралот ги откажал сите јавни собири за време на карантинот.

Кралицата Летиција и нејзините две ќерки ќе продолжат со планираната кралска програма, пишува Ројтерс.

Шпанија од почетокот на пандемијата регистрирала 1,58 милиони случаи на коронавирус, а 43.131 починале.

Aдминистрацијата на претседателот на САД, Доналд Трамп, даде формално одобрување новоизбраниот претседател Џо Бајден да започне со преземањето на власта.

Трамп синоќа на Твитер потврди дека препорачал да започнат првичните протоколи за предавање на власта.

„Препорачувам Емили Марфи и нејзиниот тим да направат што треба во однос на првичните протоколи и му кажав на мојот тим да го направи истото“, напиша Трамп.

Марфи е администратор во Службата за општа администрација (ГСА), и синоќа таа испрати писмо до новоизбраниот претседател Бајден дека нејзината канцеларија е подготвена да започне со формално предавање.

„Оваа улога ја сфаќам сериозно и поради најновите случувања кои вклучуваат правни предизвици и потврда на резултатите од изборите, денес го испраќам ова писмо за да ви ставам на располагање средства и услуги“, напиша Марфи во писмото до Бајден.

Одлуката на претседателот доаѓа по речиси три неделна неизвесност со непризнавање на резултатите, повикувајќи се на нерегуларности како гласање на починaти или отселени лица, двојно гласање или гласање под принуда.

Вакцината против коронавирус, што ја развива Универзитетот во Оксфорд во соработка со „АстраЗенека“, ќе чини меѓу три и четири долари, објави денес британски „Телеграф“. Тестирањето покажало дека вакцината ќе биде ефикасна до 90 проценти, во спречувањето на вирусот.

„ Оксфордската вакцина е вакцина за целиот свет. Додека „Фајзер“ и „Модерна“ објавија дека успешно го завршија тестирањето на вакцината во трите фази, британскиот тим првично истакна дека нивната цел е да го направат нивниот производ достапен за целата планета. Не се работи само за вакцина што ќе може да се транспортира и чува на нормални температури, туку и да биде достапна за секого “, се наведува во текстот на „Телеграф“.

Целта поставена од научници од Оксфорд и „АстраЗенека“ е вакцината да им биде достапна на посиромашните земји во светот, се додава во текстот.

„ Со цена од само три до четири долари по доза, вакцината на Оксфорд е само мал дел од цената на вакцината на „Фајзер“ и „Модерна“, што ќе се продава по цена од 20 до 32 долари, што е скапо за многу земји во развој“, наведува „Телеграф“.

Директорот на тимот што ја направи вакцината во Оксфорд, Ендру Полард, вели дека тие направиле „вакцина за светот“.

„ Нашата цел беше да ја направиме вакцината достапна насекаде. Мислам дека успеавме да го сториме тоа. Ова се многу возбудливи периоди за здравјето на луѓето”, рече Полард.