Британскиот принц Ендру објави дека се повлекува од јавниот живот, пренесува „Ројтерс“. Тој навел дека контроверзиите за неговиот непромислен однос со американскиот финансиер Џефри Епштајн, кој е осуден за педофилија, му нанеле голема штета на кралското семејство.

Ендру истакнал дека се откажува од сите свои јавни должности во иднина. Принцот побарал и дозвола од неговата мајка, кралицата Елизабета Втора, да се повлече.

Обидите на британскиот принц да ги разјасни пријателските односи со Епштајн во интервју за Би-би-си пред неколку дена предизвикаа многу негативни реакции. Тој првпат во интервју одговараше на прашања во врска со осудениот педофил, во кое призна дека било грешка тоа што престојувал во неговата куќа.

Принцот категорично негира дека имал сексуални односи со Американката Вирџинија Робертс, која го обвини дека сексуално ја злоупотребувал кога била малолетна.

Најмалку петмина сириски војници и шест ирански воени советници загинаа во воздушните напади извршени од израелските воздухопловни сили во населбите во Дамаск, објави телевизискиот канал „Ал-Хадат“. Според каналот, ракетите удриле во неколку армиски позиции во областа Ал-Кунитра, како и објекти во Ал-Кисва и Кудсаја, каде што биле сместени иранските воени специјалисти.

Претходно, лекар во болницата во близина на Дамаск изјави за новинската агенција САНА дека двајца цивили починале од рани од шрапнел во Баит Сабер.

„Една од ракетите удри во станбена зграда и ја уништи. Исто така, неколкумина беа повредени“, прецизирал лекарот.

Извештаи за повреди доаѓаат и од предградието Кудаја, западно од Дамаск, претходно честа цел на израелските ракети. Агенцијата додаде дека ракетите биле лансирани од Голанската Висорамнина и од либанскиот град Марџајун.

„Израелските агресори извршија силен ракетен напад, но сириските воздушни одбранбени системи успеаја да пресретнат повеќе проектили“, изјавил сириски воен извор за САНА.

Претседателот на Србија, Александар Вучиќ, за утре закажа седница на Советот за национална безбедност поради можната шпионска афера, во која наводно се вклучени руски разузнавач и српски агент, објави „Блиц“.

Автентичноста на снимката на која се гледа како Георги Клебај му дава пари на наводен српски агент ја потврди Безбедносно-информативната агенција (БИА).

По седницата, се очекува да бидат познати повеќе детали за овој случај, на кој работат српските безбедносни служби.

Претходно денеска, премиерката на Србија, Ана Брнабиќ, оцени дека доколку се утврди оти во овој случај навистина станува збор за шпионажа, тоа ќе биде сериозен проблем што бара сериозна реакција.