Русија покани војници од 19 земји да учествуваат во Парадата на победата на Црвениот плоштад, изјави денеска рускиот министер за одбрана, Сергеј Шогу.

Тој на прес-конференцијата во Москва соопшти дека 64.000 луѓе ќе учествуваат на победничките паради во Русија, што ќе се одржат на 24 јуни, а 14.000 лица на парадата на Црвениот плоштад, јави руската телевизија „Ѕвезда“.

Шојгу додаде дека на парадата во Москва ќе бидат прикажани 225 единици оружје, воена и специјална опрема, а ќе учествуваат и 75 авиони.

„Посетителите ќе можат да видат повеќе од 20 нови модели на воена опрема, вклучувајќи ги и авионите су-57 и миг-31К“, рече Шојгу.

Во Русија, вкупно 1.850 парчиња опрема и 511 авиони ќе бидат прикажани на победничките паради во девет града херои и 19 градови во кои се распоредени седишта на воените окрузи и морнарицата.

Федерален суд на САД во Вашингтон постави нов преседан со одлуката дека Иран, Сирија, Хамас и Исламски џихад можат да бидат сметани за одговорни и дека мора да платат отштета за смртните случаи предизвикани од постапките на одредени напаѓачи „осамени волци“, пренесува „Џерусалем пост“.

Одлуката- која може целосно да ги смени правилата на игра- значи дека терористичките групи и државни спонзори на терор би можеле да бидат погодени со пресуди за отштета од милиони, па дури и милијарди долари за Интифадата на ножот во 2015-2016 и за други напади на т.н. „осамени волци“ ако има доказ што ги поврзува со конкретни напади.

Иако одлуката за приближно пет години стариот случај во корист на невладината организација „Шурат Хадин“ и повеќето од 44 тужители што ги претставува беше официјално донесена во неделата, таа беше објавена дури утрово.

Неколку од случаите на тужителите беа отфрлени. Честопати во такви случаи, некои случаи се отфрлаат заради прашања во врска со нивното американско државјанство, помали проблеми со статусор или со темелните прашања за наводната штета.

Судот сега само одлучи за одговорноста, но може да поминат години пред да донесе одлука за реална отштета за одредени напади од времето на Интифадата на ножот, како и за некои други напади помеѓу 2008-2018 година.

Поранешниот официјален претставник на COGAT, Арје Шпицен, и антитерористичкиот експерт Ноа Меридор, беа клучни во случајот објаснувајќи пред судот како терористичките групи и државните спонзори на теророт можат да работат зад сцената за да ги олеснат терористичките напади, кои во моментот се чини дека се спонтани и изведени од  „осамени волци “.

„Шурат Хадин“ во минатото издејствува пресуди против Иран, Сирија, Хамас и други терористички групи, но ова е првпат некој да добие случај пред американски суд против ваквите групи за спонзорирање „осамени волци“.

Пензионираниот припадник на американските морнарички „фоки“, Еди Галагер, поднесе  тужба против секретарот на морнарицата, Кенет Брајтвајт, и известувачот на „Њујорк тајмс“, Дејвид Филипс, под обвинение дека објавиле негови лични документи во весникот во обид да извршат притисок врз него, пренесува „Спутник“.

„Нашето семејство поднесе повеќе барања за истраги за да ѝ овозможи на морнарицата да спроведе своја внатрешна ревизија, но и покрај добро документираната корупција, операцијата за шпионажа која вклучува обвинител, манипулации со медиумите и други груби етички прекршувања, морнарицата одби да се смета за одговорна“ , се вели во изјавата на фондацијата „Пајп хитер“, непрофитна организација основана од Галагер и неговата сопруга за правна поддршка на ветерани.

Според тужбата, Филипс, наводно, добил 500 страници доверливи документи од кривичната истрага на морнарицата. Галагер исто така го обвини новинарот за измислување детали и давање лажни или погрешни изјави во своите извештаи за да му наштети на угледот.

Галагер, кој беше „фока“ 15 години, претходно беше прогласен невин за прободување до смрт на еден заробен тинејџер, борец на Исламска држава, пукање кон невооружени ирачки цивили и други кривични дела во контроверзниот процес.

За време на судењето, еден од сведоците – „фоката“ од морнарицата на САД, Кори Скот- призна дека тој самиот го задушил заробеникот до смрт. Галагер беше осуден за позирање со труп.

„Њујорк тајмс“ сепак ги отфрли тврдењата бидејќи потпретседателот за комуникации, Даниел Роудс-Ха рече дека Филипс го направил она што би требало да го прави секој добар новинар, додавајќи дека тужбата на Галагер е полна со теории на заговор.