Алармот во средното училиште „Тамблер Риџ“ се огласил кратко откако Дариан Квист пристигнал на настава. Кога станало јасно дека не станува збор за вежба, матурантот и неговите соученици брзо реагирале.

„Ги зедовме масите и ги забарикадиравме вратите“, изјавил тој за „Си-би-си Радио Вест“, пишува „Си-ен-ен“.

Квист опишал дека тој и останатите ученици поминале околу два часа забарикадирани во училницата. Атмосферата станала уште понапрегната кога некои почнале да споделуваат „вознемирувачки“ фотографии кои, според неговите зборови, прикажувале „што навистина се случува“ во останатиот дел од училиштето, вклучувајќи сцени со крв. Ситуацијата се смирила дури по пристигнувањето на полицијата, која на крајот безбедно ги извела учениците од зградата.

Во меѓувреме, на паркингот пред училиштето чекала мајката на Дариан, Шели Квист. За инцидентот дознала од колега од блиска лабораторија кој ја прашал „дали знае што се случува во средното училиште“. Како што пристигнувале сè повеќе информации, станувала посвесна за сериозноста на ситуацијата.

„Човек никогаш не мисли дека вакво нешто може да се случи“, изјавила таа. Признала дека ја фатила паника која не попуштила сè додека не го видела својот син безбеден, меѓу учениците што биле изведувани од зградата.

Шок во малата канадска заедница по масовното пукање

Во пукањето што го потресе Тамблер Риџ во Британска Колумбија, животот го загубиле девет лица, а 25 биле повредени. Последиците од нападот во оваа мала, рурална заедница во западната канадска провинција длабоко ги погодиле нејзините тесно поврзани жители.

Шест лица биле убиени во средното училиште „Тамблер Риџ“.

„Тешко е со зборови да се опише стравот и ужасот што го чувствувате знаејќи дека сакана личност е во опасност“, изјавил Крис Норбери, локален советник чија сопруга работи во училиштето. Тој истакнал дека Тамблер Риџ досега бил исклучително безбедно место.

„Ние тука не ги заклучуваме вратите. Ова е неверојатно безбедна заедница“, рекол тој.

Градоначалникот Дарил Краковка, кој жителите на градот ги смета за свое „семејство“, изјавил дека лично ја познава секоја жртва.

„Тука сум 19 години, ние сме мала заедница“, изјавил тој.

Локалниот новинар Трент Ернст, кој известувал од терен по нападот, го сумирал општиот шок.

„Секогаш постои чувство дека ваквите работи се случуваат некаде на друго место, не тука. Сега тоа е разбиено“, рекол тој.

Родителите чекаат информации за своите деца

Родителите на децата кои го посетуваат училиштето во кое се случил масакрот се собрале во локална сала каде што чекаат вести, пишува „Би-би-си“.

„Родителите се одведени во месната сала каде што чекаат вести дали ова ги погодило нивните деца. Во толку тесно поврзана заедница, ова е многу тешко за луѓето што живеат таму“, пишува „Би-би-си“.

Во напад што се случил во училиштето „Патонг Пратан Кири Вит“ во тајландската провинција Сонгкла, во близина на границата со Малезија, напаѓач повредил повеќе наставници и ученици. Вооружена полиција пристигнала на местото на настанот кратко по завршувањето на наставата, додека стотици ученици бегале од училишниот двор кон околните улици, пишува „Сан“.

Според првичните информации, неколку наставници и ученици останале заробени во училишната зграда. Полицијата од округот Хат Јаи потврдила дека се обидува да воспостави контакт и да преговара со напаѓачот. Обезбедувач кој успеал да избега од напаѓачот изјавил за медиумите дека напаѓачот пукал и го ранил директорот на училиштето.

„Успеав да избегам. Директорот е застрелан. Во училиштето има уште деца кои ги држи како заложници“, изјавил тој.

Полицијата верува дека напаѓачот има 18 години. Пред самиот напад, полициската станица во округот Тунг Лунг примила пријави дека младиот човек се однесувал непредвидливо и се заканувал дека ќе ја повреди сопствената мајка во семејната куќа, која се наоѓа во близина на училиштето.

Силни полициски сили и единици за специјални операции го опколиле училиштето за да ја стават ситуацијата под контрола. Граѓаните биле предупредени, за сопствена безбедност, да го избегнуваат тоа подрачје. Во тек е евакуација на лицата кои се засолниле на безбедни места во рамките на училишниот комплекс.

Фондацијата „Мае Таптим Јала“ на својата Фејсбук-страница објавила дека еден наставник бил застрелан и итно пренесен во болница. Фотографии од местото на настанот покажуваат голем број возила на итната помош и полицијата, додека собрани сведоци го следат развојот на ситуацијата.

Портпаролот на Кремљ, Дмитриј Песков, се осврна на извештајот на „Фајненшел тајмс“ според кој украинскиот претседател Володимир Зеленски на 24 февруари има намера да претстави план за претседателски избори и референдум за мировен договор со Русија. Песков порача дека за тоа „е прерано да се зборува“, пишува „Украинска правда“.

„Гледаме дека во медиумите се појавуваат контрадикторни информации. Еден извор тврдеше дека почнале подготовки за избори, додека друг извор од администрацијата, од канцеларијата на киевскиот режим, тоа го демантираше“, изјави Песков.

Портпаролот на Кремљ додаде дека ваквите информации треба внимателно да се следат и да се земат предвид.

„Но, сепак треба да се водиме од релевантни извори“, заклучи тој.

„Фајненшел тајмс“ претходно, повикувајќи се на свои извори, објави дека претседателот Зеленски на 24 февруари ќе претстави план за претседателски избори, заедно со референдум за мировен договор со Русија. Канцеларијата на претседателот на Украина сè уште официјално не се огласила за овој извештај.

Недамнешните истражувања на јавното мислење покажуваат дека мнозинството Украинци се против одржување избори пред завршување на непријателствата. Поголемиот дел, исто така, ги отфрлаат предлозите за предавање на целиот регион Донбас под руска контрола во замена за безбедносни гаранции од САД и Европа.

Сепак, 55 отсто од Украинците поддржуваат одржување референдум за мировен договор за завршување на војната со Русија, додека 32 отсто се против. Во меѓувреме, украинската организација „Граѓанска мрежа ОПОРА“ потсети дека важечкиот закон забранува референдуми за време на вонредна состојба.

Тие истакнуваат дека во такви услови е невозможно да се обезбеди учество на милиони Украинци во странство и на воениот персонал, да се ублажат безбедносните закани и кампањите за дезинформации, како и целосно да се обнови оштетената изборна инфраструктура. Дури и ако непријателствата престанат, подготовката за ваков референдум би барала значително време и сложени реформи.