Генералниот секретар на НАТО Јенс Столтенберг изрази загриженост дека руската војна во Украина може да излезе од контрола и да се претвори во војна меѓу Русија и на воената алијанса.

„Во Украина има страшна војна. Тоа е и војна која може да стане вистинска војна која би ескалирала во голема војна меѓу НАТО и Русија. Работиме секој ден за да го избегнеме тоа“, изјави Столтенберг во интервју за норвешката телевизија НРК.

Столтенберг, поранешниот премиер на Норвешка, изјави дека „нема сомнеж дека е можна војна од целосен обем“ и додаде дека е важно да се избегне конфликт „во кој се вклучени неколку земји во Европа“.

Рускиот претседател Владимир Путин го обвини Западот дека ја користи Украина како алатка против Русија.

„Западот многу години бесрамно ги експлоатираше и ги исцрпуваше неговите ресурси, поттикнуваше геноцид и терор во Донбас и фактички ја претвори земјата (Украина) во колонија. Сега тој цинично го користи украинскиот народ како топовско месо, како овен против Русија, продолжувајќи да ја снабдува Украина со оружје и муниција, испраќа платеници и ја турка на самоубиствен пат“, рече Путин.

САД и испраќаат на Украина пакет помош во вредност од 275 милиони долари за да и помогнат да ја зајакне нејзината воздушна одбрана од беспилотни летала, изјави денеска портпаролот на Белата куќа за национална безбедност Џон Кирби.

Кирби им рече на новинарите дека Вашингтон е многу загрижен поради продлабочувањето и растечкото одбранбено партнерство меѓу Иран и Русија и дека САД ќе ги користат своите алатки за да го нарушат тој однос, вклучително и прашањата поврзани со беспилотните летала, објави Ројтерс.

Тој рече, како што пренесува медиумот, дека американската влада ќе ги покани и земјите партнери да разговараат и да се справат со партнерството меѓу Русија и Иран.

Американскиот секретар за одбрана Лојд Остин изјави дека Русија го проширува и модернизира својот нуклеарен арсенал.

На церемонијата на именување на новиот командант на американската стратешка команда, која го надгледува нуклеарниот арсенал, Остин рече дека Кремљ ја продолжува „својата сурова и неиспровоцирана војна против Украина“, објави Ројтерс.

„Целиот свет виде како Путин е вклучен „во длабоко и неодговорно звецкање со нуклеарно оружје“, рече Остин.

Рускиот претседател Владимир Путин претходно предупреди дека секоја земја што ќе се осмели да ја нападне Русија со нуклеарно оружје ќе биде „избришана од лицето на земјата“, пренесе Ројтерс.

Путин рече дека Русија нема уредба прво да изврши превентивен нуклеарен напад, за разлика од САД, но дека напредното руско хиперсонично оружје и гарантира на Русија дека може силно да одговори доколку некогаш е во опасност.