Рускиот нафтен гигант „Лукоил“ соопшти дека е во завршна фаза од продажбата на својата имотна структура во Бугарија, вклучувајќи ја рафинеријата „Лукоил Нефтохим Бургас“ и мрежата бензински станици. Компанијата предупреди дека ќе преземе правни мерки доколку специјалниот управител назначен од бугарската влада ги повреди нејзините сопственички права.

Вашингтон на крајот на октомври воведе санкции за „Лукоил“ и „Роснефт“ со цел да го ограничи руското финансирање на војната во Украина. Рокот за завршување на трансакциите со „Lukoil International“ е продолжен до 13 декември, а за бугарските подружници до 29 април 2026 година.

Бугарската влада минатата недела именуваше специјален управител со овластувања да го продолжи работењето и, доколку е потребно, да продава удели во рафинеријата. „Лукоил“ соопшти дека очекува неговото назначување да не го попречи процесот на продажба.

Компанијата истакна дека работи со неколку потенцијални купувачи. Меѓу заинтересираните се турскиот „Cengiz Holding“, азербејџанската државна нафтена компанија SOCAR, како и казахстанскиот „Казмунајгаз“, меѓународната трговска куќа Vitol, турскиот фонд Oyak и унгарската компанија MOL. Унгарскиот премиер Виктор Орбан претходно потврди дека MOL доставил понуда.

„Лукоил“ најави дека компанијата ќе ги заштити своите легитимни интереси доколку бидат прекршени, потсетувајќи дека во Бугарија има инвестирано над 4,5 милијарди долари во последните 25 години.

Повеќе од 412 милиони деца во земјите со ниски и средни приходи живеат во сиромаштија и се лишени од основни потреби како образование, здравствена грижа и соодветна исхрана, се наведува во извештајот на УНИЦЕФ објавен по повод Меѓународниот ден на детето.

Според извештајот, најпогодени се децата во субсахарска Африка, а сериозна состојба е забележана и во јужна и југоисточна Азија и регионот на Пацификот. УНИЦЕФ предупредува дека напредокот постигнат во последната деценија е загрозен поради намалување на меѓународната развојна помош.

Агенцијата истакнува дека сиромаштијата е поширок проблем од финансиската немаштија – 65 проценти од децата во земјите со ниски приходи немаат пристап до санитарни услови.

Извршната директорка на УНИЦЕФ, Катрин Расел, повика владите и компаниите да не ги намалуваат средствата за најранливите и да продолжат да вложуваат во клучни услуги за децата.

Секој мировен план за Украина ќе мора да ги елиминира корените на конфликтот, изјави портпаролот на Кремљ, Дмитриј Песков, пренесе „Ројтерс“.

Тој посочи дека иако имало контакти со САД, во моментов нема преговори со Вашингтон за таков план.

Претходно денес, две лица запознаени со прашањето открија дека САД му сигнализирале на претседателот Володимир Зеленски дека Украина треба да прифати рамка подготвена од Вашингтон за завршување на војната со Русија, во која се предлага Киев да се откаже од територија и дел од оружјето.

„Аксиос“, кој прв објави за планот од 28 точки , објави дека Украина и Европа ќе добијат безбедносна гаранција од САД во замена за тоа Киев да ѝ отстапи делови од источна Украина на Русија кои моментално не се под контрола на Москва.

Песков појасни дека нема што да додаде на она што беше кажано на августовскиот самит во Анкориџ, Алјаска, меѓу рускиот претседател Владимир Путин и американскиот лидер Доналд Трамп.

„Не можеме да додадеме ништо ново на она што беше кажано во Анкориџ“, истакна тој, додавајќи дека нема формални консултации или преговори со САД за мировен план за Украина.

„ Како такви, консултациите во моментов не се во тек. Секако, има контакти, но нема процес што би можел да се нарече консултации “, објасни Песков.

На прашањето дали Путин бил информиран за „мировниот план од 28 точки“, Песков одговори: „Немам што да додадам на она што веќе го кажав“.

„Спогодбата мора да доведе до елиминирање на коренските причини за овој конфликт“, нагласи тој.

Путин ја претставува војната како пресвртница во односите на Москва со Западот, за кој вели дека ја понижил Русија по падот на Советскиот Сојуз во 1991 година со проширување на НАТО и посегнување по она што тој го смета за сфера на влијание на Москва, вклучувајќи ги Украина и Грузија.

Рускиот лидер побара Украина да се откаже од својата амбиција да се приклучи на Алијансата, да се прогласи за неутрална земја и да ги ограничи своите вооружени сили.

Поранешниот американски претседател Џо Бајден, западноевропските лидери и Киев ја опишаа војната во Украина како грабеж на територија во империјален стил и постојано ветуваа дека ќе ги поразат руските сили.