Австрија ќе обезбеди милион дози вакцини против Ковид-19 за земјите од Западен Балкан, покрај дозите што веќе ги испраќа во регионот во име на Европската унија, изјави денеска австрискиот канцелар, Себастијан Курц.

Курц ова го објави по самитот со колегите од земјите од поранешна Југославија, кои не се членки на Европската унија. На состанокот беше присутен и претставник од Албанија.

Австрија на Балканот дистрибуира 651.000 дози вакцини од ЕУ.

„Покрај тоа, сакаме да дадеме билатерален придонес како Република Австрија и решивме како Влада да обезбедиме еден милион дози вакцини за земјите од Западен Балкан“, рече Курц пред новинарите по самитот.

Дозите ќе се доставуваат од август до крајот на годината, посочи тој, без да прецизира кои земји ќе ги добијат или како ќе се распределат меѓу нив.

Тој исто така не кажа кој вид на вакцина ќе биде доставена.

Европските дози на вакцини од „Фајзер“ и „Бионтек“ што Австрија ги испраќа во земјите од Западен Балкан во април беа распределени по потреба.

Босна и Херцеговина доби најмногу, а следеа Албанија и Македонија.

Повеќе од 350 доктори и здравствени работници во Индонезија се заразиле со Ковид-19, а десетици биле хоспитализирани. Сите имале примено вакцина на кинеската компанија „Синовак“, пренесува „Ројтерс“ повикувајќи се на изјави на официјални лица, кои изразиле загриженост за тоа дека некои вакцини не се доволно ефикасни против позаразните видови на коронавирусот.

„Повеќето здравствени работници биле асимптоматски и се во самоизолација“, изјави Бадау Исмојо, шеф на здравствената канцеларија во областа Кудус во централна Јава. Тој рекол дека десетици се хоспитализирани со треска и ниско ниво на сатурација во крвта.

Областа Кудус, во која има 5.000 здравствени работници, се бори со зголемен број на заболени со индискиот вид на коронавирус за кој се верува дека е позаразен и поради кој бројот на хоспитализации е зголемен за над 90 проценти.

„Податоците покажуваат дека заразените во Кудус го имаат делта сојот на Ковид-19. Мнозинството здравствени работници во Индонезија примија вакцина на ‘Синовак’, а ние сè уште не знаеме колку таа вакцина е ефикасна против сојот делта“, изјави Дики Будиман, епидемиолог од Австралискиот универзитет Грифит.

Портпаролот на „Синовак“ не беше достапен за коментар за ефикасноста на вакцината против поновите соеви на вирусот, пишува „Ројтерс“.

Светската здравствена организација (СЗО) ја одобри вакцината на „Синовак“ за итна употреба на почетокот на месецов.

Претседавачот со Претседателството на Босна и Херцеговина, Милорад Додик, изјави дека одлуката на Парламентот на Црна Гора за резолуцијата за Сребренаница е непријателски чин.

Според него, несфатливо е црногорскиот парламент да донесе резолуција за Сребреница без таа да биде изгласана во БиХ.

„Ако Собранието на БиХ не донело сличен документ, тогаш се поставува прашањето зошто тоа го стори Црна Гора, и прашањето е дали станува збор за акт на мешање во внатрешните работи. Ако политиката на БиХ не можела да постигне консензус за тоа прашање, како е можно тие да имаат право да зборуваат за тоа“, рече Додик.

Парламентот на Црна Гора не докажа ништо во врска со Сребреница, додаде тој, но докажа дека е против Србите.