Поранешниот премиер на Судан, Садик ал-Махди (84), почина од последиците на коронавирус.

Тој почина три недели по хоспитализацијата во Обединетите Арапски Емирати, соопштија неговото семејство и партијата Ума.

Махди беше последниот демократски избран премиер, кој со воен удар во 1989 година беше соборен од власта, а на негово место дојде доскорешниот претседател Омар ал-Башир, пренесе „Ројтерс“.

Махди ја предводеше умерената партија Ума и остана влијателен политичар, дури и откако Башир беше симнат од власт во април минатата година.

Семејството на Махди минатиот месец соошти дека тој бил позитивен на Ковид-19 и бил пренесен на лекување во ОАЕ, неколку дена по краткиот престој во болница во Судан.

Американскиот претседател Доналд Трамп забележа мала победа во правната битка. Имено, во Пенсилванија беше наредено да се прекинат сите понатамошни изборни активности во врска со потврдувањето на резултатите од изборите во таа држава.

Судијката Патриша Мекалоф нареди прекинување на верификацијата на изборните резултати по барање на републиканците.

Овој успех, иако далеку од можноста за поништување на предвидената победа на новоизбраниот претседател Џозеф Бајден, ги одржува во живот тврдењата на Трамп за изборни манипулации, пренесува „Вашингтон тајмс“.

Трамп објави на Твитер дека одлуката на Пенсилванија е голема вест.

Адвокатскиот тим на Трамп наведува дека се спорни околу 670.000 гласови за кои тие бараат да бидат отфрлени.

Иранските компании наскоро ќе започнат со тестирање на вакцината против коронавирус врз луѓе, изјави официјалната претставничка на Министерството за здравство, Сима Садат Лари. Таа додаде дека Техеран соработува и со Русија во врска со вакцините против коронавирус.

„Експертите и членовите на администрацијата на нашата земја имаа преговори и соработуваат со руски производители на вакцини, а во моментов се разгледуваат релевантните документи“, рече Лари. Како што најави, се очекува посета на покана од руска страна.

Иранскиот амбасадор во Русија, Казем Џалали, кон крајот на септември рече дека Иран има намера да соработува со Москва во врска со производството на вакцината против Ковид-19 и дека е можно да се потпише договор за заедничко производство на вакцината, наведува „Спутник“.

Четири компании моментално работат на вакцини против коронавирус и тие ја информираа Светската здравствена организација за тоа колку далеку отидоа во тој процес. „Една или две компании најверојатно наскоро ќе започнат со тестирање на вакцината врз луѓе“, рече Лари.

Според иранското Министерство за здравство, земјата се обидува да обезбеди вакцини на три начини – преку фондот КОВАКС, чија задача е да обезбеди пристап до вакцините на меѓународно ниво, преку соработка со странски земји и сопствени напори.

Бројот на заболени во Иран надмина 760 000.