САД повторно во ноември ќе дозволат влез на патници од Кина, Индија, Велика Британија и од многу европски земји, кои примиле втора доза вакцина против Ковид-19, објави денеска Белата куќа.

Одлуката, објавена од координаторот на Белата куќа за борба против коронавирусот, Џеф Зајентс, претставува ненадеен пресврт во политиката на администрацијата на Бајден, која минатата недела соопшти дека сѐ уште не е време за укинување на кои било мерки, објави „Ројтерс“.

Мерките спречија десетици илјади странци да дојдат во САД за да ги видат членовите на семејството, а деловните патувања исто така беа драстично намалени.

Забраните за влез за неамерикански државјани првпат беа воведени за патници од Кина во јануари 2020 година под мандат на Доналд Трамп, а потоа забраните беа проширени и во други земји во наредните месеци.

САД ќе прифатат целосно вакцинирани патници од шенген-зоната, како и од Велика Британија, Ирска, Кина, Индија, Јужна Африка, Иран и од Бразил.

Американските центри за контрола и превенција на болестите (ЦДЦ) ќе одлучат кои вакцини ќе бидат прифатени за влез во земјата. Странците ќе мора да достават доказ за вакцинација пред патувањето и нема да мора да одат во карантин по пристигнувањето.

Грција ќе им понуди на лекарите и на другиот медицински персонал трета доза од вакцината против Ковид-19, објави денеска Министерството за здравство.

Здравствените советници веќе препорачаа вакцинација за ранливите групи и за оние над 60 години, пишува „Ројтерс“.

Вакцинацијата не е задолжителна, рече Мариос Темистоклеус, генерален секретар задолжен за вакцинација против Ковид-19.

Грција денеска пријави 2.126 нови инфекции и 39 смртни случаи, со што вкупниот број на заразени се искачи на 632.908, а смртните случаи на 14.505 од почетокот на пандемијата.

Приведениот напаѓач на универзитетот во Русија, Тимур Бекмансуров, објавил долго детаљно објаснување за својата подготовка за нападот, во кое тврди дека тоа било негов сон за масовно убиство, со сите можни средства и додал дека не е терорист.

Бекмансуров утрото влезе во Пермскиот државен универзитет, што е водечка образовна институција во градот, на нешто повеќе од 1.000 километри источно од Москва и почнал да пука, при што убил најмалку шест лица, а ранил уште 28.

18-годишникот – студент во прва година, бил на универзитетот десет дена и студирал форензичка наука.

Во изјава за новинската агенција ТАСС претставник од регионалната медицинска служба рекол дека стрелецот е жив, но ранет и во моментот се наоѓа на интензивна нега.

Пред нападот убиецот на социјалната мрежа „Вконтакте“ напишал дека неговата мотивација не е религиозна или политичка, туку сон што го имал долго време поради неговата омраза кон сите околу него, исто така истакнувајќи дека размислува да користи автомобил, бомба или нож наместо пиштол. Тој исто така детаљно опишал како купил пиштол и обуката за огнено оружје, како и процесот на добивање лиценца.

Mass shooting in Russia University Perm pic.twitter.com/5puJ3KVD87

— Wallstreetbets (@wallsteetbets) September 20, 2021

Според официјалната портпаролка на Министерството за внатрешни работи, нападот го спречил помлад полициски поручник, сообраќаен инспектор, кој прв влегол во главната зграда.

За време на нападот видеата објавени на социјалните мрежи покажуваат како студенти скокаат од прозорците за да избегаат од напаѓачот.

Според извор на „Раша тудеј“, копчето за аларм на универзитетот не се вклучило бидејќи чуварот бил еден од првите убиени.