Во Грција се потврдени уште 358 нови случаи на коронавирус, а пет лица починаа како резултат на инфекција со вирусот.

Националната организација за јавно здравје соопшти дека од крајот на февруари, кога е регистриран првиот случај на Ковид-19, вкупно се заразени 16.286 лица, од кои се верува дека речиси 3.000 биле заразени во странство, а 6.808 се поврзани со веќе познати случаи, јавува агенцијата АНА.

Вкупно 73 лица се на апарати за дишење. Од болниците се пуштени 191 пациент, кои оздравеле од вирусот. Досега починаа 357 лица како резултат на инфекција со коронавирусот, од кои 132 се жени.

Уапсен е болнички лекар од евангелистичката клиника „Бетел“ во Билефелд под сомнение дека им давал седативи на жени што доаѓале кај него на преглед.

Тој потоа ги силувал и го снимал сето тоа, објавија германските медиуми.

„Згрозени сме од овие обвинувања за кои се чини има многу докази. Оваа вест нè погоди како струен удар“, изјави директорот на клиниката, Матијас Ернст, пренесува „Ројтерс“.

Локалните медиуми објавија дека неименуван лекар е уапсен и дека биле пронајдени видеа при претрес во неговата куќа. Како што се наведува, лекарот претходно бил осомничен дека им препишувал непотребни лекови на пациентите, а неговото име повеќе го нема на списокот на вработени на веб-страницата на клиниката.

Засега е непознато колку жени силувал и дали го снимал секој напад.

Неколку лица се повредени кога полицијата употребила водни топови за време на протестот во Минск, а повеќе од 10 лица се приведени, пренесува „Ројтерс“.

Според очевидци на британската агенција, илјадници луѓе денеска излегле на улиците во Минск во знак на протест против ненадејната инаугурација на претседателот на Белорусија, Александар Лукашенко.

Демонстрантите носеле знамиња на опозицијата во црвена и бела боја, а автомобилите свиреле додека поминувале во знак на солидарност. Руската новинска агенција „Интерфакс“ објави дека неколку лица биле повредени кога биле употребени водни топови, а РИА соопшти дека повеќе од 10 лица биле приведени во притвор.

Демонстрантите почнале да се собираат во мали групи во Минск, некои извикувале: „Саша (прекар за Лукашенко), излези, ќе ти честитаме!“

Опозицискиот политичар Павел Латушко рече дека полагањето заклетва било како тајна средба на крадците.

Лукашенко денеска положи заклетва за новиот мандат на претседателот на Белорусија на ненадејна инаугурација, која претходно не беше најавена.