Рускиот претседател, Владимир Путин, денеска и’ нареди на армијата на земјата да го зголеми бројот на своите војници за 180.000 на вкупно 1,5 милиони, во време кога воената операција на Москва во Украина трае повеќе од две и пол години.

Указот на Путин, објавен на официјалната веб-страница на владата, ќе стапи на сила на 1 декември. Со него се определува вкупниот број на руски воен персонал на речиси 2,4 милиони, вклучително и 1,5 милиони војници, и ѝ наредува на владата да ги обезбеди потребните средства.

Претходното зголемување на бројот на руски војници се случи минатиот декември, кога со декретот на Путин вкупниот број на руски воен персонал беше околу 2,2 милиони, вклучувајќи 1,32 милиони војници.

Израелскиот министер за одбрана, Јоав Галант, денеска изјави дека истекува времето за договор со Хезболах за запирање на судирите по должината на израелско-либанската граница.

Во разговор со својот американски колега Лојд Остин, Галант истакна дека можностите за договор во северната арена се при крај бидејќи Хезболах продолжува да се здружува со Хамас“, пишува „Тајмс оф Израел“.

Галант исто така му рекол на американскиот секретар за одбрана дека какво и да е сценариото, израелските одбранбени сили ќе продолжат да дејствуваат со цел да го уништат Хамас и да обезбедат враќање на заложниците што ги држи Хамас во Газа.

Хезболах почна да лансира ракети и беспилотни летала во северен Израел по избувнувањето на конфликтот во Газа по нападот врз Израел од страна на палестинската милитантна група Хамас на 7 октомври минатата година.

Поради преоптовареност на системот за прифаќање баратели на азил, Германија од денеска воведува контроли на сите државни граници, кои ќе траат најмалку шест месеци.

Новата регулатива се однесува на премините кон Данска, Холандија, Белгија, Луксембург и Франција, пренесува „Дојче веле“.

Почнувајќи од денеска, германската федерална полиција не само што ќе ги контролира патниците на источната и јужната копнена граница туку и на северната и западната граница, најмалку шест месеци.

Германија овој чекор го оправда со големиот број мигранти, кои илегално влегуваат во земјата, и со преоптоварувањето на системот за прифаќање бегалци, изјави германската министерка за внатрешни работи, Ненси Фесер.

Иако треба да биде исклучок во рамките на Европската Унија, тие правила очигледно веќе не важат, оценува германското радио и укажува дека дополнителните контроли би можеле да доведат до тешкотии во движењето на луѓе и стоки, со оглед на тоа што Германија е во центарот на шенген-зоната.

Контролите на внатрешните граници се предвидуваат само под одредени услови, но самите земји членки одлучуваат дали се исполнети овие услови, а за воведување гранични контроли, единствено се должни да ја информираат Европската комисија во Брисел.