Министерот за здравство на Хрватска, Вили Берош, преку својата страница на „Фејсбук“ им се обрати на граѓаните и рече дека наредил целосна мобилизација на здравствениот систем.

„Актуелната состојба со коронавирусот нè принудува сите во здравствениот систем вонредно да се ангажираме, од лекари од примарна здравствена заштита, итна помош, институти за јавно здравје, до сите болници“, напиша тој на почетокот на својата порака.

„Како министер за здравство, наредив целосна мобилизација на целиот систем на јавно здравје во Хрватска. Ова е вистинско време да покажеме целосна посветеност кон нашата професија”, порача Берош на „Фејсбук“.

Во последните 24 часа Хрватска пријави 1.413 нови случаи на коронавирус. 897 пациенти се во болница, од кои 57 се на апарати за дишење. Регистрирани се и 18 смртни случаи.

Хрватските медиуми со денови известуваат дека хрватскиот здравствен систем веќе е пред колапс, а епидемиолозите најавуваат уште поголем број новозаразени лица.

Во Австрија стапија на сила нови мерки за заштита и сузбивање на коронавирусот, а една од нив е забраната за носење визири.

Официјалните лица проценија дека маските кои добро се прилепуваат на лицето се единствената соодветна мерка за заштита во сите затворени простории, додека другите заштити за лицето и носот не се доволни.

Причината за забрана на визирите и мини визирите кои стојат на брадата и ја покриваат устата и повеќе или помалку носот и кои најчесто ги носат вработените во ресторани и продавници, се студиите кои наведуваат дека овој вид на покривка не е доволен за да се спречи ширењето на аеросоли во споредба со класичните маски кои добро се прилепуваат за устата и носот.

„Механичките средства за заштита како што се визири или мини визири се покажаа несоодветни во спречувањето на ширење на Ковид-19 и мора да бидат забранети“, се вели во соопштението на австриските власти.

Луѓето кои не можат да носат маски од здравствени причини ќе бидат изземени од ова правило.

Американска студија објавена во септември покажа дека од сите маски“, визирите обезбедуваат најмала заштита од коронавирусот.

Германскиот институт Роберт Кох исто така издаде соопштение во кое се наведува дека употребата на визири не може да биде алтернатива за покривање на устата и носот, бидејќи постојните студии покажуваат дека визирите не апсорбираат секретирани респираторни капки.

Потпретседателот на Европската комисија, Маргаритис Схинас е позитивен на коронавирус.

Тој на „Твитер“ изјави дека поради здравствената состојба е во самоизолација.

„Само што открив, за време на редовен тест за Ковид, дека сум позитивен. Затоа сум во самоизолација. Останете здрави”, напиша Схинас.