Бројот на лица загинати во катастрофалниот земјотрес и цунамито што го погоди индонезискиот остров Сулавеси се зголеми на 1.944, објавија официјалните претставници.

Повеќето од жртвите се од градот Пал, кој е еден од најзагрозените, изјави претставник на службата за итни случаи, објави АП. Речиси 5.000 лица сè уште се водат како исчезнати.

Најголем број од исчезнатите се исто така во градот Пал, на островот Сулавеси, кој беше најтешко погоден од земјотресот и цунамито што се случи пред повеќе од една недела.

Подрачјето на Пал, со приближно 350.000 жители, на 28 септември првин го погоди земјотрес со јачина од 7,5 степени според Рихтеровата скала по што следуваше цунами со бранови високи околу три метри.

Спасувачката акција и натаму е во тек, под урнатините сè уште се бараат луѓе што останале затрупани, а властите стравуваат дека бројот на загинати и натаму би можел да расте.

По неколку дена чекање, во земјата почна да пристигнува меѓународна помош, која им е потребна на 200.000 луѓе. Пристапните патишта и аеродромот се оштетени, па пристапот на помошта е отежнат.