Свет
„Волстрит џурнал“: Трамп со цртеж од гола жена и порака за „прекрасна тајна“ му го честитал роденденот на Епштајн

„Волстрит џурнал“ денес објави дека името на Доналд Трамп се појавило на лична порака до Џефри Епштајн од 2003 година, на која американскиот претседател одговорил дека е лажна.
Весникот пишува дека писмото е едно од неколкуте во албум со кожен повез посветен на прославата на 50-тиот роденден на Епштајн, речиси три години пред да се појават обвинувањата за сексуална злоупотреба против финансиерот.
Трамп бргу одговори на објавата на неговата платформа „Тру соушал“ велејќи дека ќе ги тужи весникот и Руперт Мардок, кој го контролира неговиот издавач, „Њуз корп“.
„’Волстрит џурнал’ и Руперт Мардок беа лично предупредени директно од претседателот Доналд Џ. Трамп дека наводното писмо е лажно и дека ако го објават, ќе бидат тужени“, напиша Трамп.
„Никогаш во животот не сум нацртал слика“, објави Трамп, а потоа додаде: „Тоа не е мој јазик. Тоа не се мои зборови“. Недолго потоа корисниците на социјалните мрежи се сетија дека во 2005 година Трамп нацртал цртеж од хоризонтот на Њујорк за хуманитарна аукција. Цртежот бил повторно продаден во 2017 година за 30.000 долари.
Портпаролот на „Волстрит џурнал“ и нејзината матична компанија одбија да коментираат за нивната приказна и за аканата на Трамп за тужба.
Весникот објави дека писмото, на кое го пишувало името на Трамп, содржело неколку реда текст врамени со контура на гола жена, која изгледала како рачно нацртана со дебел маркер. Весникот објави дека писмото завршува со „Среќен роденден – и нека секој ден биде уште една прекрасна тајна“ и е потпишано со „Доналд“.
Потпретседателот Џ. Д. Венс одговори на сторијата на платформата „Икс“ велејќи: „Извинете за мојот јазик, но оваа сторија е целосна и апсолутна глупост. ‘Волстрит џурнал’ треба да се срами од себе што ја објави“. Други влијателни личности од американската десница, кои досега инсистираа на транспарентност во врска со случајот на Епштајн, застанаа во одбрана на претседателот. Сега тие изјавија дека не веруваат во сторијата.
Според информациите од „Волстрит џурнал“, писмото со потпис на Трамп било дел од албум составен за 50-тиот роденден на Епштајн од Гислен Максвел, негова блиска соработничка, која подоцна била осудена за трговија со деца за сексуална злоупотреба поврзана со Епштајн. Максвел наводно ги собрала писмата.
Тој албум бил меѓу документите што години подоцна ги прегледало Министерството за правда на САД за време на истрагата за Епштајн, пишува весникот.
Трамп бил постојано фотографиран со Епштајн во текот на 90-тите и во почетокот на 2000-тите, а неговото име се појавува во дневниците за летови на приватниот авион на Епштајн. Но, Трамп тврди дека го прекинале контактот пред Епштајн да се изјасни за виновен во 2008 година за подведување малолетници. Тој додаде дека не разговарале најмалку 15 години пред повторното апсење на Епштајн во 2019 година.
Вчера, беше објавено дека администрацијата на американскиот претседател ќе побара од судот да дозволи објавување на транскриптите од големата порота во случајот на починатиот Епштајн. Соопштението доаѓа откога некои поддржувачи на Трамп реагираа жестоко на извештајот, во кој се заклучува дека нема докази што би ги поткрепиле некои долгогодишни теории за случајот на Епштајн.
Министерството за правда и ФБИ минатата недела изјавија дека нема докази оти Епштајн, обвинет за подведување малолетни девојчиња, наводно на моќни и познати поединци, имал листа на клиенти или уценувал моќни и влијателни личности.
Тие исто така го отфрлија тврдењето дека Епштајн бил убиен во затвор потврдувајќи дека извршил самоубиство со бесење. Додадоа дека повеќе немаат намера да објавуваат информации за истрагата.
„Врз основа на смешниот обем на публицитет што му беше даден на Џефри Епштајн, ја замолив државната обвинителка Пам Бонди да ги обезбеди сите релевантни сведочења од големата порота, под услов судот да одобри. Оваа измама, извршена од демократите, треба веднаш да престане!“, напиша Трамп на својата платформа „Тру соушал“.
Кратко по изјавата на Трамп, Бонди изјави на „Икс“ дека Министерството за правда е подготвено денес да побара од судот да ги објави тие транскрипти. Бонди неколку месеци претходно најави објавување големи откритија за Епштајн, вклучувајќи „многу имиња“ и „многу записи за летови“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
(Видео) Зеленски објави видео од нападите врз Украина: „Војната мора да заврши. И Москва мора да го чуе зборот: „Стоп“.“

Украинскиот претседател, Володимир Зеленски, остро реагираше на ноќните руски напади низ Украина, велејќи дека тие јасно ги демонстрираат намерите и пристапот на Москва кон војната.
Во своето обраќање, Зеленски рече дека руските сили ги таргетирале станбените згради и клучната цивилна инфраструктура во неколку региони.
„Дури и во овој момент, Русите ги напаѓаат Харков, Запорожје, Сумскиот регион и Одеса, уништувајќи станбени згради и нашата цивилна инфраструктура. Русите намерно убиваат луѓе, особено деца. Досега, седум лица се убиени во напад со беспилотно летало во Харков, најмладото е девојче на возраст од само една и пол година, а десетици се повредени, вклучувајќи деца“, рече Зеленски.
„Во Запорожје, ракетните напади повредија 20 лица, а убија три. Мое сочувство до семејствата и најблиските на сите жртви.“
Тој особено го истакна нападот врз енергетскиот објект во Одеса, подвлекувајќи ги неговите пошироки импликации. „Исто така, имаше намерен руски напад врз енергетски објект во Одеса, во сопственост на азербејџанска компанија, што имплицира дека тоа бил напад не само врз нас, туку и врз нашите односи и енергетска безбедност“, објасни тој.
Пред состанокот во Вашингтон, Зеленски ги поврза нападите со денешниот важен дипломатски состанок во Вашингтон, чија главна тема е токму завршувањето на војната.
„Тие се свесни дека денес во Вашингтон се одржува состанок на кој ќе се разговара за завршувањето на војната. Ќе разговараме со претседателот Трамп за клучните прашања. Покрај Украина, во разговорот ќе учествуваат и лидерите на Обединетото Кралство, Франција, Германија, Италија, Финска, Европската Унија и НАТО. Сите бараат достоинствен мир и вистинска безбедност“, рече украинскиот претседател.
Тој предупреди дека „руската воена машина продолжува да уништува животи и покрај сè“ и дека „Путин ќе изврши демонстративни убиства за да го одржи притисокот врз Украина и Европа, како и да ги понижи дипломатските напори“.
Затоа тој упати јасен апел за помош и безбедносни гаранции.
„Токму затоа бараме помош за да се спречи убивањето. Затоа се потребни сигурни безбедносни гаранции. Затоа Русија не треба да биде наградена за нејзиното учество во оваа војна“, нагласи Зеленски, завршувајќи со порака упатена директно до Москва:
„Војната мора да заврши. И Москва мора да го чуе зборот: „Стоп“.“
фото: принтскрин
Свет
Трамп: Кина нема да изврши инвазија врз Тајван додека сум јас на власт; Кина: Тоа е наша работа

Тајван е внатрешно прашање на Кина, соопшти денес Министерството за надворешни работи на Кина, како одговор на изјавата на американскиот претседател Доналд Трамп дека кинескиот претседател Кси Џинпинг му рекол дека нема да го нападне островот додека Трамп е на функција.
Трамп ги даде овие забелешки во интервју за „Фокс њуз“ пред разговорите во Алјаска со рускиот претседател Владимир Путин за војната во Украина. На прашањето за забелешките на Трамп на дневната прес-конференција во Пекинг, портпаролката на кинеското Министерство за надворешни работи, Мао Нинг, рече дека Тајван е неотуѓив дел од територијата на Кина.
„Прашањето за Тајван е чисто внатрешно прашање на Кина. Ќе направиме сè што можеме за да го олесниме мирното обединување. Никогаш нема да дозволиме никому да го одвои Тајван од Кина на кој било начин“, рече таа.
Кина го смета Тајван за своја територија и вети дека ќе се обедини со демократскиот остров, потег на кој владата на Тајван остро се спротивставува. Во својот одговор на изјавата на Трамп, Министерството за надворешни работи на Тајван соопшти дека секогаш внимателно ги следи интеракциите меѓу високите функционери од САД и Кина.
фото: принтскрин
Европа
(Видео) Русите објавија снимка од тенк со американски и руски знамиња како влегува во битка со Украинците

„Русија Тудеј“ објави видео на кое се гледа американски оклопен транспортер M113 во рацете на руската војска.
Според РТ, тенковските екипажи на 70-от моторизиран полк му доставиле на нивниот воен дописник Влади Андрица видео на кое се гледа возило со високо развеани руски и американски знамиња, кое брза кон бојното поле во близина на селото Мала Токмачка.
Според истите извори, станува збор за оклопен транспортер кој бил запленет од украинската армија, потоа поправен и вратен во употреба. РТ тврди дека сега се користи во борбени мисии од страна на руската армија.
Објавувањето на оваа снимка доаѓа веднаш по средбата меѓу американскиот претседател Доналд Трамп и рускиот претседател Владимир Путин во Алјаска. Главна тема на разговор беше војната во Украина, но не беше постигнат договор за прекин на огнот.
По средбата, Трамп изјави дека средбата била „продуктивна“ и дека очекува преговори меѓу Русија и Украина. Путин изгледаше доста задоволен од средбата со Трамп и зборуваше за постигнатото „разбирање“ и најави можност следната средба да се одржи во Русија.
фото: принтскрин