Свет
Вонбрачната ќерка на поранешниот белгиски крал Алберт Втори доби право да се нарекува принцеза
Вонбрачната ќерка на поранешниот белгиски крал Алберт Втори во четвртокот победи во седумгодишна битка за своите кралски права – и сега може официјално да се нарече принцеза, пренесува „Њујорк пост“.
Делфин Боел сега може да се нарекува Делфин од Саксен-Кобург-Гота, принцеза на Белгија, откако Апелацискиот суд во Брисел пресуди дека има право на истите кралски титули и привилегии како и трите други деца на татко ѝ.
„Законската победа никогаш нема да ја замени татковската љубов, но дава чувство на правда“, рече Боел во изјавата објавена преку нејзините адвокати.
52-годишната уметница тврдеше дека Алберт е нејзин вистински татко две децении пред да им се обрати на судовите за утврдување на татковството во 2013 година – годината кога тој се откажа од престолот и го загуби законскиот имунитет поради нејзините тврдења.
Поранешниот монарх ја отфрлаше Боел како негова ќерка до јануари кога се согласи да направи ДНК-тест по налог на судот и под закана од казна од 5.000 евра за секој ден што ќе го одбива тестот. Неговите адвокати рекоа дека научните заклучоци покажуваат дека тој е биолошки татко на Делфин Боел.
Боел тврдеше дека нејзината аристократска мајка Сибил де Селис Лонгшамп имала врска со Алберт помеѓу 1966 и 1984 година. Шпекулациите за скандалот со татковството првпат се појавија во неовластена биографија за сопругата на Алберт, кралицата Паола, во 1999 година.
Алберт ги призна брачните проблеми со Паола во 70-тите години на минатиот век, но никогаш не призна дека имал вонбрачна врска. Поранешниот крал, чиј син Филип сега е крал, сè уште има право да поднесе жалба на судската одлука.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Во лизгањето на земјиштето во Индонезија 25 луѓе го загубија животот
Спасувачите денеска ги прекинаа операциите за пребарување на жртвите во лизгањето на земјиштето во индонезиската покраина Западна Јава, откако беа пронајдени 14 тела на вториот ден од операциите, со што вкупниот број потврдени жртви достигна 25, пренесе ДПА, повикувајќи се на официјален претставник.
Обилните дождови што почнаа еден ден претходно предизвикаа лизгање на земјиштето вчера изутрината во близина на село во округот Западен Бандунг.
Официјални претставници изјавија дека до 80 лица се уште се водат како исчезнати.
„Сите тела беа евакуирани до 16 часот во центарот за идентификација на жртвите од катастрофата. Подоцна во текот на денот, спасувачките операции беа прекинати поради безбедносни причини, бидејќи условите на теренот во погодената област останаа нестабилни и постоеше ризик од понатамошно лизгање на земјиштето“, изјави Аде Диан Пермана, раководител на службата за пребарување и спасување во Бандунг.
Лизгањето на земјиштето често се случува во Индонезија за време на дождовната сезона, особено во густо населените и планински области на Јава, најнаселениот остров во земјата, пренесе ДПА.
Свет
Зеленски побара од сојузниците повеќе муниција за одбрана на Укаина
Украинскиот претседател Володимир Зеленски денеска побара од сојузниците повеќе муниција за противвоздушната одбрана на Украина со цел подобро да се спротивстави на руските напади, што оставија стотици илјади жители на Киев без електрична енергија и греење сред зима.
„Само оваа недела, Русите лансираа повеќе од 1.700 борбени беспилотни летала, повеќе од 1.380 наведувани бомби и 69 ракети од различни видови. Затоа ракетите за системите за противвоздушна одбрана се потребни секој ден, и ние продолжуваме да соработуваме со САД и Европа за да обезбедиме подобра заштита на нашиот воздушен простор“, рече Зеленски по пристигнувањето во Вилнус, објавија француските медиуми.
Зеленски во Вилнус се сретна со претседателот на Литванија, Гитанас Науседа. На средбата станало збор за поддршката на украинскиот енергетски систем и воената соработка меѓу двете земји.
Свет
Поради снежно невреме повеќе од 700.000 домови во САД останаа без струја
Снежно невреме го погоди поголемиот дел од САД, оставајќи стотици илјади луѓе без струја, додека влошување на временските услови се очекува и во областите на Њујорк, Филаделфија и Вашингтон.
Најтешко погодени се државите Мисисипи, Луизијана и Тексас, каде што околу 730.000 домаќинства останаа без струја, а се проценува дека дури 190 милиони луѓе се изложени на ризик од прекини во снабдувањето со електрична енергија и греење.
Невремето зафати површина од околу 3.000 километри, од Ново Мексико до Мејн, а во неколку држави е прогласена вонредна состојба. Снежните врнежи и мразот предизвикаа големи проблеми во сообраќајот, затворање на патиштата и откажување на илјадници летови.
Властите ги повикуваат граѓаните да останат дома, додека центри за затоплување на населението се отворени во Њујорк и Вашингтон.

