За разлика на претходните европски комисии, сегашната има вистинска политичка волја за проширување на Европската Унија, изјави денес во Загреб хрватскиот премиер Андреј Пленковиќ додавајќи дека е можна некаква одлука до 2030 година ако некои кандидати се технички подготвени.

„За разлика од Комисијата на (Жан-Клод) Јункер или првиот мандат на Урсула фон дер Лајен, кога не чувствував искрена политичка волја во центарот на политиката во Брисел за постигнување проширување за која било земја кандидат, овој пат морам да признам дека атмосферата е малку поинаква“, рече Пленковиќ на Вториот годишен самит на Хрватска.

„Можеби е време некој друг да ѝ се приклучи по Хрватска“
„Овој пат можеме да ја почувствуваме политичката волја во извршната власт на ЕУ, дури и кај повеќето земји членки, дури и кај големите, дека можеби е време некој друг да ѝ се приклучи по Хрватска, која се влезе на 1 јули 2013 година“, додаде Пленковиќ.

Комисијата би сакала да отвори преговарачки кластери со Украина и Молдавија до крајот на оваа година. Сепак, земјите членки одлучуваат за ова едногласно. Досега нема таква едногласност бидејќи Унгарија остро се спротивставува на членството на Украина во Унијата, анализираат медиумите.

Хрватскиот премиер потсети дека постојат две групи земји кандидатки: Украина и Молдавија во едната група, а земјите од Југоисточна Европа и Западен Балкан во другата група, и ја посочи Црна Гора како лидер. „Мислам дека би можеле, ако успеат да бидат технички подготвени, да имаме политичка одлука за некои пред 2030 година“, рече Пленковиќ.

Сепак, тој ги повтори своите тврдења дека апсорпцискиот капацитет на блокот ќе биде клучен за динамиката на проширувањето осврнувајќи се на четвртиот Копенхашки критериум од 1993 година, кој се однесува на буџетските трошоци за проширување и на влијанието на новите членки врз односите меѓу земјите што придонесуваат и оние што го користат.

„Речиси 80 проценти од европскиот буџет, всушност, го полнат 10-те најбогати земји на Унијата, а приближно 20 проценти одат за сите други односи. Побогатите земји, основачите, големите силни економии, не се нужно возбудени што помалите земји, кои многу малку придонесуваат, седнуваат на маса и во суштина одлучуваат за главните политики еднакво, особено кога станува збор за прашања каде што е потребна едногласност“, рече премиерот.

Тој потсети дека Германија, Франција и Италија еднаш се откажаа од двајца комесари во Комисијата во корист на проширувањето.

„А сега тие имаат ист број влијателни луѓе како и земјите што многу малку придонесуваат. Затоа процесот на донесување одлуки и буџетските импликации се во срцето на процесот на проширување“, објасни тој.

Фото: ЕПА

Портпаролот на Кремљ, Дмитриј Песков, денес изјави дека транзицијата на Европа кон поскапи извори на енергија наместо руски гас ќе го забрза губењето на нејзиниот економски потенцијал и ќе доведе до пад на конкурентноста на Европската Унија.

„На овој начин Европа се осудува на значително поскапи извори на енергија, што неизбежно ќе има последици за европската економија и ќе доведе до намалување на конкурентноста. Ова само ќе го забрза процесот што веќе е забележан во последните години, а тоа е губење на водечката позиција на европската економија“, рече Песков одговарајќи на прашање за реакцијата на Кремљ на изјавата на претседателката на Европската комисија, Урсула фон дер Лајен, дека Европа повеќе нема да зависи од рускиот гас, пренесува „РИА новости“.

Тој истакна дека ако Европа го одбие гасот од Русија, таа ќе биде зависна од извори на енергија кои се поскапи, а понекогаш и значително поскапи од рускиот гас.

Европскиот совет денес објави дека е постигнат договор со Европскиот парламент за постепено укинување на увозот на руски гас до 2027 година како дел од напорите за ставање крај на енергетската зависност од Русија.

Регулативата претставува правно обврзувачка, фазна забрана за увоз и на течен природен гас (ЛНГ) и на гас преку цевководи од Русија со целосна забрана, што ќе почне кон крајот на 2026 година за ЛНГ и есента 2027 година за цевководите.

Како што е наведено во соопштението, ова придонесува за општата цел за постигнување отпорен и независен енергетски пазар на ЕУ, а воедно и за одржување на безбедноста на снабдувањето.

Привремениот договор сега треба да биде одобрен од Советот и од Парламентот пред неговото формално усвојување.

Учеството на рускиот гас во увозот на ЕУ беше 12 проценти во октомври, значително помалку од 45 проценти пред почетокот на војната во Украина во 2022 година, пренесува „Танјуг“.

Фото: ЕПА

Претседателката на Европската комисија (ЕК), Урсула фон дер Лајен, изјави дека денес Европа влегува во ера на целосна енергетска независност од Русија откога Европејците постигнаа договор за прекин на увозот на руски гас до есента 2027 година.

„Денес е историски ден за Унијата. Синоќа постигнавме принципиелен договор за предлогот на Комисијата за постепено укинување на руските фосилни горива. Вртиме нова страница, засекогаш. Ова е зората на нова ера, ера на целосна енергетска независност на Европа од Русија“, изјави Фон дер Лајен на прес-конференција, пренесува „Фигаро“.

Според неа, планот REPowerEU донесе резултати.

„Тој нè заштити од најлошата енергетска криза во последните неколку децении и ни помогна да преминеме од руски фосилни горива на други со рекордна брзина. Денес трајно го запираме тој увоз. Со исцрпувањето на воениот фонд на Путин се солидаризираме со Украина и го фокусираме нашето внимание на нови енергетски партнерства и можности за тој сектор“, рече таа, како што е објавено на веб-страницата на ЕК.

Таа нагласи дека ЕУ „конечно и засекогаш ја затвора славината за руски гас“.

„Европа избра енергетска безбедност и независност. Никогаш нема да се вратиме на нашата опасна зависност од Русија. Никогаш нема да се вратиме на нестабилни снабдувања и манипулација на пазарот. Никогаш нема да се вратиме на енергетска уцена и економска изложеност. И ние сме посилни од кога било со Украина во нејзината потрага по слобода“, рече Фон дер Лајен.

Ден Јергенсен, комесар за енергетика и домување, рече дека Европската Унија ефикасно и трајно ќе го суспендира увозот на руски гас и ќе се движи кон постепено укинување на руската нафта во согласност со привремениот политички договор постигнат денес од Европскиот парламент и Европскиот совет.

„Оваа историска одлука ќе стави крај на зависноста на ЕУ од несигурен снабдувач, кој постојано ги дестабилизира европските енергетски пазари, ја загрозуваше безбедноста на снабдувањето со енергија со уцена и ѝ штетеше на европската економија. Како што е наведено во планот REPowerEU, целосното повлекување од руските фосилни горива е клучен чекор за да се обезбедат енергетската независност, конкурентноста, отпорноста и стабилноста на пазарот на Европа“, рече тој.

Денешната спогодба обезбедува постепено, но трајно прекинување на увозот на руски гас, со прекин на увозот на течен природен гас (ЛНГ) до 31 декември 2026 година, а увозот на гас преку цевководи до 30 септември 2027 година, беше наведено на веб-страницата на ЕК.

По исклучок, земјите членки може да го продолжат овој рок до 31 октомври 2027 година во случај нивните нивоа на складирање да бидат под потребните нивоа на полнење.

Промените на постојните договори ќе бидат дозволени само за тесно дефинирани оперативни цели и не може да доведат до зголемување на обемот или цените.

Затоа, најдоцна до ноември 2027 година, ЕУ постепено и засекогаш ќе го укине увозот на руски гас, беше наведено на веб-страницата на ЕК, пренесува „Танјуг“.

Фото: ЕПА