Властите во Пекинг соопштија дека во последните 24 часа немало нови случаи на Ковид-19 во кинеската престолнина.

Како што се наведува, за прв пат нема заболени од почетокот на јуни кога имаше нагло зголемување на бројот на заразени лица во Пекинг, кога беа воведени карантински мерки заради појава на вирус во близина на пазарот на големо.

Властите сè уште истражуваат што довело до повторно појавување на епидемијата.

Неименуван претставник на управата на пазарот за локалните медиуми изјавил дека, наводно, вирусот бил пронајден на даските за сечење на увезен лосос.

Повеќе од 70 земји предупредуваат дека се во опасност да останат без лекови против ХИВ поради пандемијата на коронавирус, се вели во студијата спроведена од Светската здравствена организација.

Од нив, 24 земји соопштиле дека имаат критично низок број на антиретровирусни лекови, или АРВ, кои во голема мера се користат како терапија за лекување на ХИВ, или забележале нарушувања во нивниот синџир на снабдување како резултат на пандемијата, соопшти СЗО, Пренесува „Си-ен-би-си“.

„Наодите од оваа студија се многу загрижувачки“, рече генералниот директор на СЗО, Тедрос Аданом Гебрејесус.

„Земјите и нивните развојни партнери мора да сторат сé што можат за да им обезбедат на лицата на кои им е потребен третман со ХИВ и натаму да имаат пристап до лекови. Не можеме да дозволиме пандемијата на „Ковид-19“ да ги поништи тешко добиените придобивки во глобалниот одговор на оваа болест“, додаде Тедрос.

СЗО и Заедничката програма на Обединетите нации за ХИВ / СИДА проценија дека смртноста на СИДА во субсахарска Африка би можела да се зголеми двојно, како резултат на шестмесечно нарушување на пристапот до антиретровирусни лекови.

Иако не постои лек за ХИВ, вирусот што предизвикува СИДА, антиретровирусни лекови го контролираат вирусот и го спречуваат пренесувањето на инфекцијата на други. Затворањето на копнениот и воздушниот транспорт, неуспехот на снабдувачите да испорачуваат лекови и ограничениот пристап до здравствени услуги беа меѓу причините за нарушувањата утврдени во студијата на СЗО.

Повеќе од 25 милиони луѓе добиле антиретровирусно лекување во 2019 година, соопшти СЗО, додавајќи дека очекува тие цели да не се исполнат во 2020 година.

Во експлозија на цистерна со гориво во Колумбија загинаа 7 лица, а повредени се повеќе од 40, соопштија властите. Експлозијата се случила откако голем број луѓе се собрале околу камионот што се превртел,со намера да го соберат горивото што протекува.

На видеото се прикажани десетици луѓе околу возилото превртено на страната на патот, на околу 65 километри од градот Баранквил. Многумина носеле празни пластични шишиња, додека некои дошле да му помогнат на возачот.

Одеднаш се формирал голем оган и луѓето почнале да бегаат.

Некои претрпеле сериозни изгореници, додека некои од загинатите не можеле веднаш да ги идентификуваат.

Колумбискиот сенатор Армандо Бенедети рече дека инцидентот укажува на долгогодишни проблеми како што се неводење грижа од државата и голема сиромаштија и нееднаквост.

„Сето ова се случи затоа што тие бараа начин да преживеат“, напиша Бенедети.

Инспекторите сметаат дека несреќата се случила откако возачот заспал зад воланот. Инцидентот се случил во време кога болниците во таа област биле преполни поради зголемениот број на заразени со коронавирус.