Свет
Во Нов Зеланд и Австралија предупредување за цунами по силниот земјотрес во Тихиот Океан

Властите на Нов Зеланд денеска ги повикаа жителите на северниот брег да се повлечат кон внатрешноста поради опасност од цунами, а Австралија исто така прогласи тревога по земјотресот со јачина од 7,7 степени што потресе области во јужниот дел на Тихиот Океан.
„Очекуваме крајбрежјето на Нов Зеланд да биде изложено на невообичаено силни струи и непредвидлив раст на нивото на морето“, соопшти агенцијата за итни случаи.
„Секој што е на отворено море или на крајбрежјето треба да се повлече кон копното и да се оддалечи од плажите, крајбрежните области и пристаништата“, додава агенцијата.
Австралиската агенција за метеорологија објави дека цунами им се заканува на островите и областите по должината на крајбрежјето.
Силен земјотрес со јачина од 7,7 степени денеска ги погоди островите Лојауте и Нова Каледонија во Тихиот Океан, објави Американскиот геофизички институт (УСГС).
Епицентарот на земјотресот бил на околу 400 километри југоисточно од островите Лојауте и околу 430 километри од Вануату, соопшти УСГС.
Нова Каледонија се наоѓа во југозападниот дел на Тихиот Океан, околу 1.500 км источно од Австралија.
Областа околу Нова Каледонија и соседната Вануату е дел од Пацифичкиот огнен прстен, една од сеизмички најактивните зони на планетата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
40 ранети во Израел, двајца критично

Вкупно 40 лица побарале медицинска помош по вечерашниот ирански ракетен напад врз Израел, соопштија локалните здравствени служби. Двајца од повредените се во критична состојба.
Најголем број пациенти се лекуваат во болницата Ичилов во Тел Авив – 18 лица.
Според лекарите, пријавените повреди вклучуваат рани од шрапнели, вдишување чад и состојба на шок.
Свет
Израелската војска: Иран истрела помалку од 100 балистички ракети, повеќето ги пресретнавме

Портпаролката на израелската војска, Ефи Дефрин, рече дека помалку од 100 балистички проектили биле истрелани од Иран кон Израел.
Дефрин рече дека „повеќето од ракетите биле пресретнати од воздушната одбрана или паднале пред да стигнат до израелска територија“.
„Регистрирани се ограничен број погодоци на згради, а дел од штетата е предизвикана од фрагменти од пресретнати проектили“, додаде тој.
Според израелските медицински служби, во нападот биле ранети 40 лица.
Свет
Нетанјаху: Ова е можност за иранскиот народ да се спротивстави на режимот

Израелскиот премиер Бенјамин Нетанјаху вечерва и порача на јавноста дека можат да ги напуштат засолништата, откако новиот бран ирански ракети прелета над израелска територија.
„Иранскиот режим никогаш не бил послаб. Ова е можност за иранскиот народ да се спротивстави на режимот“, рече Нетанјаху во вечерашното обраќање.
Тој директно им се обрати и на граѓаните на Иран: „Јас сум со вас, израелскиот народ е со вас“, рече тој.
Министерот за одбрана на Израел, Израел Кац изјави дека Иран „ја преминал црвената линија со лансирање ракети кон израелските цивилни области“ и најави: „Техеран ќе плати висока цена“.
Оваа иранска одмазда следеше по израелските воздушни напади на иранска територија, при што беа погодени нуклеарни постројки и беа убиени високи команданти и научници.