Рускиот фонд за директни инвестиции (РДИФ), производител на вакцината „Спутник В“, поднесе барање до Европската агенција за лекови за регистрација на вакцината во Европската Унија и очекува таа одлука да биде донесена во февруари, објави РДИФ на својот официјален твитер-профил за вакцината „Спутник В“.

Во соопштението издадено од РДИФ на „Твитер“ се вели дека тимовите на производителот на вакцината „Спутник В“ и Европската агенција за лекови (ЕМА) извршиле експертска анализа на 19 јануари и дека врз основа на таа анализа, ЕМА ќе донесе одлуки во врска со регистрацијата.

Официјални претставници на американската одбрана изразија загриженост за можни инсајдерски напади или други видови на закани од редовите на безбедносните сили ангажирани во обезбедувањето на инаугурацијата на Џо Бајден, пишува АП.

Пентагон, наводно, го повикал Федералното биро за истраги (ФБИ) да ги провери сите 25.000 припадници на Националната гарда во Вашингтон, по наводите дека учесниците во неодамнешните немири во Капитол имале поддршка од припадници на безбедносните сили кои ја обезбедувале зградата.

Според извештаите, во пресрет на инаугурацијата на новиот претседател, 12 припадници на Националната гарда се отстранети од должност откако биле поврзани со десни екстремистички групи или објавиле екстремистички ставови на интернет, објави АП, повикувајќи се на двајца неименувани функционери кои навеле дека сепак не постоела закана за Бајден.

Не е прецизирано со кои екстремистички групи биле поврзани припадниците на армијата, ниту во која единица на Националната гарда служеле.

Втората руска вакцина против Ковид-19 обезбедува стопроцентна заштита, соопшти здравствениот регулатор „Роспотребнадзор“, врз основа на резултатите од клиничките испитувања, објави руската новинска агенција ТАСС.

Русија во ноември почна масовно тестирање со вакцината „епивакорона“, развиена од Институтот „Вектор“ во Сибир.

Москва претходно објави дека нејзината вакцина „спутник В“ е ефикасна 92 процента.