Претседателскиот комитет на кампањата „Доналд Трамп за претседател“ ги отфрли шпекулациите дека се занимава со заеднички активности за собирање средства со Патриотската партија, основана минатата недела во Џорџија, пренесува „Спутник“.

Комитетот рече дека контактирал со Федералната изборна комисија (ФЕЦ) од загриженост дека јавноста може да биде наведена да поверува дека активностите на Патриотската партија се одобрени од експретседателот или неговата кампања кога тоа не е точно.

На 22 јануари Мајкл Џозеф Гол објави документ до ФЕЦ во кој тврди дека кампањата на Трамп собира средства заедно со Патриотската партија.

„Ние не го поддржуваме овој напор, немаме ништо со тоа и знаеме за тоа само преку јавното известување“, рече портпаролот на Трамп, Џејсон Милер во СМС-порака.

Кампањата на Трамп исто така истакна дека тој не планира да ја напушти Републиканската партија за да формира нова организација. Милер рече дека експретседателот е посветен на реизборот на републиканците на идните избори.

По неговиот пораз на претседателските избори во 2020 година, Трамп навести дека може да се кандидира за претседател во 2024 година.

„Ние се обидуваме да добиеме уште четири години. Во спротивно, ќе се видиме за четири години”, им рече републиканецот на новинарите на прием во Белата куќа во декември 2020 година.

Само еден претседател на САД отслужи два последователни мандати, демократот Гровер Кливленд избран во 1884 и во 1892 година.

Шпекулациите за можно враќање на Трамп се интензивираа во деновите пред инаугурацијата на Џо Бајден, а медиумите објавија дека бизнисменот политичар сака да формира своја партија бидејќи се вознемири зашто некои републиканци одбија да ги поддржат неговите тврдења дека демократите ги местат изборите.

Без оглед дали е вистина или не, неговата судбина сега лежи во рацете на американскиот Сенат бидејќи се соочува со второто судење за импичмент.

Претставничкиот дом ја одобри постапката претходно овој месец со префрлување на процесот во Сенатот. Судењето е закажано на 9 февруари. За да биде осуден, потребно е двотретинско мнозинство. Сенаторите може да гласаат и за забрана Трамп повторно да добие јавна функција.

.

Во Бугарија, 60 лица починаа од коронавирус во последните 24 часа, а потврдени е нови 772 случаи на оваа инфекција, меѓу 13.540 тестирани лица. Од почетокот на пандемијата во Бугарија, потврдени се 215.589 случаи на коронавирус, а починале 8.880 лица, пренесува БТА. Има 26.582 активни случаи, од кои 2.822 заразени лица се во болница.

Европската Унија ги поздрави продолжените истражувачки разговори меѓу Турција и Грција, рече во понеделникот шефот за надворешни работи на блокот, Јозеф Борел, пренесува „Анадолија“.

На прес-конференција по состанокот на министрите за надворешни работи на ЕУ, Борел ги нарече започнатите разговори важен чекор кон унапредување и консолидирање на дијалогот и соработката. Тој исто така ги пофали важните пораки и гестови на турските власти за надминување на минатогодишните тензии со ЕУ.

„Ги разгледавме сите прашања што предизвикаа многу проблеми во нашите односи во 2020 година и се согласивме да ги надминеме “, рече тој во врска со посетата на Брисел на турскиот министер за надворешни работи, Мевлут Чавушоглу, минатата недела.

Борел исто така изрази надеж дека преговорите за Кипар предводени од ОН ќе продолжат до крајот на февруари, први вакви разговори од 2017 година.

Вчера во Истанбул заврши 61. рунда технички преговори предводени од делегациите на Република Турција и Грција. Тема на преговорите беше согледување на актуелната ситуација во регионот, како и можните потези во светло на последните случувања.

Делегациите постигнаа договор следната рунда разговори за отворените билатерални прашања да биде организирана во главниот грчки град Атина.

Меѓу членовите на турската делегација беше заменик-министерот за надворешни работи на Турција, Серат Унал, и портпаролот на кабинетот на турскиот претседател, Ибрахим Калин. Калин на Твитер објави дека во Истанбул продолжиле техничките преговори кои не се одржуваа изминатите четири и пол години.

„Сите проблеми можат да се решат, вклучително и оние во Егејското Море, со силното лидерство на нашиот претседател. Во потполност сме определени за тоа“, наведе Калин.

Тој исто така порача дека регионалниот мир и стабилност се во интерес на сите.