Вакцината „спутник В“ исто така може добро да ги заштити животните од коронавирусот, изјави директорот на Државниот истражувачки центар за епидемиологија и микробиологија „Гамалеја“, Александар Гинцбург.

Тој истакна дека сè уште има приоритети во однос на вакцинацијата.

„Убеден сум дека ‘спутник В’ добро ќе ги заштити животните, но прво мора да ги вакцинираме луѓето“, рече Гинцбург.

Тој забележа дека е потребно да се вакцинираат животните не само за да се заштитат туку и да се запре циркулацијата на вирусот помеѓу нив и луѓето.

„’Спутник В’ беше тестиран на животни во центарот ‘Гамалеја’ и врз нив беа извршени сите претклинички тестови, па со сигурност можеме да кажеме дека дејствува. Вакцината направена специјално за животни е многу поевтина од вакцината за луѓе“, нагласи Гинцбург.

Вакцината „спутник В“ е регистрирана во речиси 60 земји со вкупно население од приближно три милијарди луѓе. Ефикасноста на препаратот е 91,6 процент, што беше потврдено во списанието „Лансет“, едно од најстарите и најценети медицински списанија во светот.